Свет
(Видео) Двајцата астронаути заглавени на Меѓународната вселенска станица со месеци, конечно, се враќаат на Земјата

Двајца астронаути на НАСА заглавени на Меѓународната вселенска станица се упатуваат назад на Земјата со „Спејс Икс“ за да ја завршат драматичната мисија што започна со пробен лет на Боинг пред повеќе од девет месеци, јавува Асошиетед прес.
Watch Dragon depart the @Space_Station and return to Earth with the Crew-9 astronauts → https://t.co/ZZEmGU8Aar https://t.co/kWcj6rvu1V
— SpaceX (@SpaceX) March 18, 2025
Буч Вилмор и Суни Вилијамс се простија од Меѓународната вселенска станица – нивниот дом од минатата пролет – заминувајќи во капсула „Спејс Икс“ заедно со уште двајца астронаути. Капсулата се одвоила во раните утрински часови, а се очекува да слета на брегот на Флорида до вечер, во зависност од временските услови.
Тие очекуваа да бидат на Меѓународната вселенска станица само една недела по лансирањето во новата капсула „Старлајнер“ на Боинг на 5 јуни. Но, многу проблеми што се појавија на патот до вселенската станица ја принудија НАСА да го испрати „Старлајнер“ назад празен и да ги пренесе астронаутите во „Спејс Икс“, одложувајќи го нивното враќање до февруари. Тогаш проблемите со капсулата „Спејс Икс“ додадоа уште еден месец доцнење. Доаѓањето на нивните замени вчера значеше дека Вилмор и Вилијамс конечно би можеле да си заминат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп бара имиња на странските студенти кои студираат на „Харвард“: Сакаме да знаеме од каде се

Американскиот претседател, Доналд Трамп, изјави дека неговата администрација сака имиња и земји на сите странци кои студираат на Харвард, сугерирајќи дека странските земји, особено оние кои се непријателски настроени кон САД, треба да придонесат за финансирање на образованието на нивните студенти.
„Зошто Харвард не соопшти дека речиси 31 отсто од нивните студенти се од странски земји, и додека некои од нив воопшто не се пријателски расположени кон Соединетите држави, тие не плаќаат ништо за образованието на своите студенти, ниту пак имаат намера да го направат тоа“, напиша Трамп на „Тру соушал“.
Тој истакна дека неговата администрација сака да знае кои се и од каде се странските студенти и додаде дека Харвард „не е многу отворен“.
„Ги сакаме тие имиња и земји“, рече Трамп.
Според податоците на Харвард, во оваа учебна година 27 отсто од студентите доаѓаат од странство, а најмногу се од Кина, Канада, Индија, Јужна Кореја и Велика Британија.
Во учебната 2024-2025 година на Харвард беа запишани 6.793 студенти на додипломски и магистерски студии од 147 земји.
Странските студенти немаат право на какво било федерално финансирање, според делот за финансиска помош на веб-страницата на Харвард, додавајќи дека колеџот има свои пари за стипендии, кои се достапни за странски студенти.
Свет
Малта ќе ја признае Палестина следниот месец

Премиерот на Малта, Роберт Абела, денеска најави дека Малта ќе ја признае државата Палестина следниот месец.
Соопштението дојде за време на политички настан на кој Абела ги покрена локалните и глобалните прашања, со посебен фокус на хуманитарната криза во Газа, пренесува „Малта тудеј“.
„Не можеме да ги затвориме очите пред оваа човечка трагедија која секој ден се влошува“, весникот го цитираше малтешкиот премиер Абела осврнувајќи се на израелското бомбардирање на Газа, во кое загинаа речиси 54.000 Палестинци.
Абела рече дека овој потег е морална одговорност и дека Палестина ќе биде признаена по конференцијата на 20 јуни.
Регион
Дванаесет лица се полесно повредени во судирот помеѓу двата автобуси во Хрватска

Дванаесет лица се полесно повредени во судирот на два автобуси попладнево на А1 кај излезот Вучевица кај Сплит.
Тројца претежно имале скршеници и како превентивна мерка се задржани во болница на опсервација, пишува „Индекс“.
Сообраќајната несреќа во која учествувале два автобуси се случила околу 13 часот и 45 минути на А1 во правец кон Загреб.
На местото на несреќата веднаш биле испратени служби за итна медицинска помош, полиција и пожарникари.
Во текот на попладневните часови беше извршен увид на местото на инцидентот.
Неофицијално се дознава дека сите повредени се полнолетни хрватски државјани кои се враќале од поклоничко патување.