Украинскиот претседател Володимир Зеленски во вторникот, во своето новогодишно обраќање до нацијата, рече дека неговата земја ќе направи се за да ја прекине војната со Русија во 2025 година.

„Нека 2025 ни биде годината на Украина. Знаеме дека мирот нема да ни биде подарок, но ќе направиме се за да ја запреме Русија и да ставиме крај на војната“, рече тој во својот говор објавен на социјалните мрежи.

Our 2024. Every single day of it has been won by our warriors, by all our people, by everyone who defends, works, strengthens, and helps.

Hard work and courage, humanity and integrity of the entire nation filled this year. Along with care, development and love, the desire to… pic.twitter.com/uL3Tq3Gb13

— Volodymyr Zelenskyy / Володимир Зеленський (@ZelenskyyUa) December 31, 2024

Зеленски додаде дека Украина треба да се бори во 2025 година на бојното поле, но и на преговарачка маса за да се стави крај на речиси тригодишната руска инвазија.

„Секој ден во наредната година ќе треба да се бориме за Украина што е доволно силна, бидејќи само таква Украина ќе се почитува и слуша“, рече Зеленски.

Следната година носи неизвесност во Украина и стравувања дека ќе има намалување на американската воена и политичка поддршка откако Доналд Трамп ќе ја преземе власта, анализираат медиумите во светот.

Администрацијата на американскиот претседател во заминување Џо Бајден во понеделникот и додели воена и буџетска помош на Украина од речиси шест милијарди долари.

Трамп рече дека ќе го прекине конфликтот во рок од 24 часа по преземањето на должноста, предизвикувајќи стравувања дека Украина ќе биде принудена да ги напушти териториите под контрола на Русија во замена за мир.

„Не се сомневам дека новиот американски претседател е подготвен и способен да постигне мир и да стави крај на агресијата на Путин“, рече Зеленски во својот говор.

Рускиот претседател Владимир Путин не ја спомена конкретно војната во Украина во својот новогодишен говор во вторникот, но ги пофали руските војници за нивната храброст.

Двете бебиња близнаци кои имаа само еден месец, им подлегнаа на повредите по тешката несреќа што се случи вчера во Србија кај Нови Сад.

Според објавеното од тамошните медиуми, бебињата беа тешко повредени во судир на два автомобили на патот Нови Сад-Зрењанин, и беа пренесени во Детската болница во Нови Сад, но поради тежината на повредите починале.

Српската РТС јавува дека во несреќата се повредени и двајца мажи на возраст од 43 и 34 години и една жена на возраст од 34 години, и сите биле пренесени во болница. До несреќата наводно дошло кога возачот на едниот од автомобилите од засега непознати причини преминал на спротивната лента каде директно се судрил со другиот автомобил.

Илјадници луѓе ја дочекаа Новата година на плоштадите во Њујорк и европските метрополи.

Во Њујорк, точно на полноќ традиционално беше спуштена кристална топка на Тајмс Сквер, каде илјадници луѓе присуствуваа на дочекот, иако врнеше силен дожд, пренесе АП.

Топка тешка речиси шест тони содржана од 2.688 кристални триаголници се спушти на столбот на Тајмс Сквер.

На плоштадот настапија американската група TLC и поп-рок групата Jonas Brothers.

Традиционалните новогодишни прослави во Рим годинава се специфични по тоа што ја одбележуваат јубилејната година на Католичката црква, прослава која се одржува еднаш во четвртина век и се очекува оваа година во Рим да донесе околу 32 милиони аџии.

Папата Франциско во вторникот отслужи вечерна миса во базиликата Свети Петар во Рим.

Во Париз Новата година беше пречекана со традиционално одбројување и огномет на Шанзелизе.

Новата година во Лондон се слави со воден топ покрај реката Темза.

Сепак, поради невремето, официјалниот дочек во Единбург, Шкотска беше откажан.

Исто така, поради невремето, во Холандија е откажан новогодишниот огномет, како и традиционалното капење во морето на плажата во Шевенинген, каде повеќе од шест децении секоја година се капат 10.000 луѓе.

Во Швајцарија луѓето традиционално за Нова година влегуваа во водата на ниски температури.

Во Бразил главната новогодишна ноќ беше на плажата Копакабана во Рио де Жанеиро, со огномет кој траеше 12 минути.

Се очекуваше бројот на луѓе кои ја дочекаа Новата година во Копакабана да надмине два милиони, од кои повеќето беа традиционално облечени во бело.

Повеќето европски земји ја дочекаа Новата година со огномет на главните плоштади.

Претходно, 2025 година беше пречекана во поголемиот дел од Русија, Турција, Иран, Сирија.

Новата година пристигна порано во Мадагаскар, во близина на источниот брег на Африка, каде граѓаните славеа со танц и музика.

Етиопија, Сирија, Белорусија, Обединетите Арапски Емирати, Ерменија, Азербејџан и жителите на Антарктикот исто така ја дочекаа 2025 година пред Европа и САД.

Граѓаните ширум источна и југоисточна Азија, вклучително и Индија, Кина, Филипините и Малезија, Хонг Конг и Сингапур, ја дочекаа Новата година уште порано со огномет и дронови.

Прославите се намалени или откажани во Јужна Кореја по авионската несреќа во Муан во неделата во која загинаа 179 луѓе.

Претходно, Новата 2025 година пристигна во Австралија, а во пристаништето во Сиднеј беше пречекана со традиционален огномет.

Два часа пред тоа Нов Зеланд ја дочека Новата година, која беше пречекана во Окленд со огномет, со кој им оддадоа почит на домородните племиња.

Новата година во светот први ја дочекаа жителите на малиот остров Лајн, кој припаѓа на островската држава Кирибати во централниот дел на Тихиот Океан.

Последните населени места каде ќе биде дочекана 2025 година ќе бидат островите Нижуе и Американска Самоа, кои се наоѓаат југозападно од Кирибати во јужниот дел на Пацификот, пренесува Танјуг.