Свет
(Видео) Двајца загинати во свлечиште во Кина, продолжува потрагата по десетици исчезнати лица

Во свлечиштето на земјиштето во кинеската провинција Јунан рано утринава загинаа две лица, а десетици се водат како исчезнати, додека спасувачките операции се во тек при снежно време под нулата.
Најмалку 47 лица од 18 домаќинства се водат како исчезнати, објави државната кинеска централна телевизија. Две исчезнати лица се пронајдени мртви.
Одронот погоди две села во југозападниот град Жаотонг, покривајќи куќи во подножјето на ридот, објави ЦЦТВ.
„Планината штотуку се урна, десетици беа затрупани“, изјави очевидец за државната телевизија во соседната провинција Гуижоу. Тој рече дека четворица негови роднини се затрупани под урнатините.
„Сите спиеја во своите домови“, рече тој.
Пожарникарите се качуваат низ урнатините за да бараат преживеани во слаб снег, објави ЦЦТВ. Не е јасно што го предизвикало одронот.
Кина испрати речиси 1.000 спасувачи и 200 спасувачки возила, се вели во извештајот. Кинескиот потпретседател Џанг Гуокинг отиде со работна група на местото на одронот за да ја води спасувачката работа.
Повеќе од 500 луѓе се евакуирани од своите домови.
Јунан е една од неколкуте провинции во јужниот регион на земјата која моментално се соочува со екстремно ниски температури, според Националниот метеоролошки центар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Ќе се сретнам двапати со Трамп во наредните денови

Претседателот на Србија, Александар Вучиќ, синоќа изјави дека во следните три до четири дена ќе се сретне двапати со претседателот на Соединетите Американски Држави, Доналд Трамп, јавува Анадолу.
„Ќе се сретнам двапати, од различни причини, во следните четири дена. Не ми верувајте на збор, ги измешав датумите и временските зони“, рече Вучиќ за време на обиколката на работите во новата детска клиника „Тиршова 2“, одговарајќи на новинарско прашање за тоа кога ќе се сретне со американскиот претседател, додавајќи дека „сè ќе се случи во следните три или четири дена“.
Тој, исто така, најави дека очекува италијанската премиерка Џорџa Мелони да го посети Белград во август или септември, која ја опиша, заедно со претседателката на Европската комисија, Урсула фон дер Лајен, како една од најмоќните жени во светот.
Свет
Адидас: Нашите патики ќе поскапат поради царините

Како што објави Би-би-си, спортскиот гигант „Адидас“ предупреди дека царините што ги воведе американскиот претседател Доналд Трамп ќе доведат до повисоки цени за популарните модели на тениски патики на американскиот пазар.
„Бидејќи во моментов речиси ниту еден од нашите производи не произведуваме во САД, овие повисоки царини на крајот ќе предизвикаат зголемување на трошоците за сите наши производи наменети за американскиот пазар“, изјави извршниот директор на „Адидас“, Бјорн Гулден.
Компаниите во делот на текстилот и обувките се меѓу најтешко погодените од новите царини, бидејќи поголемиот дел од своето производство го имаат во земји како Кина и Виетнам, кои сега се соочуваат со значителни американски царини.
„Адидас“ не кажа за колку ќе се зголемат цените, но рече дека трговската војна „го спречила“ планираното подобрување на финансиските прогнози на компанијата. Гулден додаде дека „моментално е невозможно да се квантифицира“ точно колку ќе се зголемат трошоците поради царините или да се процени каков ефект ќе имаат тие врз побарувачката за производите на „Адидас“.
„Поради неизвесноста околу преговорите меѓу САД и различните извозници, не знаеме колку ќе бидат царините на крајот. Поради ова, не можеме да донесеме конечни одлуки за понатамошните чекори“, рече Гулден.
Виетнам стана глобален центар за производство на спортски обувки и сега се соочува со едни од највисоките американски царини. Најк, Пума и Адидас имаат големи производствени капацитети во Југоисточна Азија.
Администрацијата на Трамп тврди дека царините имаат за цел да го поттикнат враќањето на производството во САД. Но, компании како „Адидас“ предупредуваат дека на САД им недостасуваат фабрики со специјализирана опрема и работници со потребното знаење за производство на спортски обувки.
Во разговор со новинарите, Гулден откри дека „Адидас“, со цел да го ублажи ефектот од царините, го зголемил извозот на производи во САД пред нивната примена и ги пренасочил производите од Кина наменети за американскиот пазар кон други пазари.
Компанијата минатата недела објави прелиминарни финансиски резултати, според кои нејзината добивка речиси се дуплираше – на 610 милиони евра во првите три месеци од годината, што е најсилниот резултат за тој период во историјата на „Адидас“.
Модели како Samba доживеаја голема побарувачка, а продажбата се зголеми на сите пазари надвор од САД.
„Иронично, сега имаме предност што не сме толку зависни од САД како можеби некои од нашите американски конкуренти“, рече Гулден, алудирајќи на главниот конкурент Најк.
Регион
Загина српски воен падобранец

Припадник на 63-та падобранска бригада, виш водник прва класа Милан Станковиќ, почина вечерва во Воената болница во Ниш од повредите здобиени при скок со падобран на воениот аеродром „Михајло Петровиќ“ во Ниш, соопшти Министерството за одбрана на Србија.
Во соопштението се наведува дека по приземјувањето, Станковиќ бил итно реанимиран и пренесен во болница, каде што, и покрај брзата реакција и напорите на лекарите, им подлегнал на повредите околу 19 часот.
Надлежните органи пристигнаа на местото на настанот. Истрагата е во тек. Началникот на Генералштабот на српските вооружени сили нареди формирање комисија за утврдување на околностите на вонредниот настан.
Српски Телеграф пишува дека Станковиќ е роден на 25 декември 1983 година и дека е во српската армија од 2005 година. Зад себе остави сопруга и две деца. Министерот за одбрана Братислав Гашиќ и началникот на Генералштабот на српската армија, генерал Милан Мојсиловиќ, испратија телеграми со сочувство до семејството на починатиот Станковиќ.