Ќерката на 𝟪𝟢-годишната жена која почина откако крузер ја остави на оддалечен остров, ја обвини бродската компанија за „недостаток на грижа и недостаток на здрав разум“. Телото на Сузан Рис беше пронајдено на островот Лизард, во Големиот корален гребен, еден ден откако таа не се врати на бродот од организирано планинарење, објави Би-би-си.

Кетрин Рис изјави дека е шокирана и тажна што бродот Coral Adventurer испловил без нејзината мајка, која ја опиша како здрава, активна и страсна планинарка и градинарка.

„Од она малку што ни беше кажано, се чини дека имало недостаток на грижа и здрав разум“, рече таа во четврток.

Сузан Рис, од Нов Јужен Велс, наводно била на првата етапа од 60-дневното крстарење околу Австралија кое тргнало од Кернс претходно оваа недела. Патниците, кои плаќаат десетици илјади долари за патувањето, биле однесени на ексклузивниот остров на еднодневен излет кое вклучувало планинарење и нуркање.

Рис се придружила на групно искачување до највисокиот врв на островот, Кукс Лук, но била одвоена од остатокот од групата бидејќи ѝ требало одмор.

„Полицијата ни кажа дека бил многу жежок ден и дека на мајка ми не и било добро додека се искачувала по ридот“, рекла нејзината ќерка Кетрин. „Бела замолена да се симне без придружба. Потоа бродот отпловил, очигледно без да го провери бројот на патници. Во одреден момент од тој процес, или кратко потоа, мама починала, сама.“

Кетерин додаде дека се надева дека истрагата ќе открие што требало да направи компанијата за да може да го спаси животот на нејзината мајка.

Австралиската агенција за поморска безбедност потврди дека го истражува смртниот случај и дека ќе се сретне со екипажот на бродот кога ќе пристигне во Дарвин подоцна оваа недела.

Портпаролот на Агенцијата за поморска безбедност изјави дека капетанот на бродот првпат ги известил за исчезнувањето на жената околу 21 часот по локално време во саботата. Тим за пребарување се вратил на островот неколку часа подоцна, но потрагата била прекината во раните утрински часови во неделата. Кратко откако потрагата продолжила, хеликоптер го пронашол нејзиното тело наутро.

Главниот извршен директор на „Coral Expeditions“ изјави во среда дека компанијата „длабоко жали“ за смртта и ѝ нуди поддршка на семејството Рис. „Тесно соработуваме со полицијата на Квинсленд и другите власти за да ја поддржиме нивната истрага. Не можеме да коментираме понатаму додека овој процес е во тек“, рече Марк Фифилд.

фото: принтскрин

Лидерите на Европската Унија ја повторија својата поддршка за планот за заем од 140 милијарди евра за Украина врз основа на замрзнати руски средства.

Претседателката на Европската комисија, Урсула фон дер Лајен, изјави дека планот за користење на руски средства останува „законски“, додека ЕК изјави дека „целосно ќе го почитува меѓународното право“.

Сепак, фон дер Лајен призна дека техничките прашања треба да се решат за да се ублажат белгиските сомнежи за потенцијалните правни и финансиски ризици за Euroclear (група за инфраструктура на финансискиот пазар со седиште во Белгија, специјализирана во сегментот на централен депозитар за хартии од вредност), како и за стабилноста на Еврозоната, објави Euractiv.

Данската премиерка Мете Фредериксен нагласи дека „нема алтернатива на овој заем за репарации“.

„Навистина ми се допаѓа идејата Русија да плати за штетата што ја предизвика и изврши во Украина“, рече Фредериксен, чија земја моментално претседава со Советот на ЕУ.

Таа додаде дека е од суштинско значење лидерите на ЕУ да го усвојат планот на претстојниот самит во декември.

Во исто време, портпаролката на ЕК, Паула Пињо, за време на денешниот брифинг, нагласи дека Европската комисија целосно ќе го почитува меѓународното право во својот предлог за користење на руски средства за обезбедување заеми за Украина.

Белгија го држи најголемиот дел од замрзнатите руски средства, кои беа блокирани кратко по руската инвазија на Украина, и е особено претпазлива во однос на репутациските ризици за Euroclear доколку земјите од ЕУ не обезбедат гаранции за нивно враќање во Москва доколку санкциите против Русија одеднаш бидат укинати, објаснува бриселскиот портал.

Кина ќе го испрати најмладиот астронаут во својата историја на вселенската станица како дел од својот следен лет со екипаж, соопштија властите во четврток, додавајќи дека таму ќе бидат и четири лабораториски глувци.

Вселенската станица Тјангонг, управувана од тимови со три астронаути кои ротираат на секои шест месеци, е круната на вселенската програма на Кина вредна милијарда долари, додека се обидува да ги стигне САД и Русија.

Мисијата Шенжоу-21 е закажана да полета во петок во 23:44 часот по локално време од Центарот за лансирање сателити Џиукван во северозападна Кина, изјави Џанг Џингбо, портпарол на Кинеската агенција за вселенски летала со екипаж (CMSA).

Инженерот на летот, Ву Феи, кој штотуку наполни 32 години, ќе стане најмладиот кинески астронаут кој летал во вселената, соопштија властите.

„Се чувствувам исклучително среќен“, им рече тој на новинарите во четврток. „Можноста да ги комбинирам моите лични соништа со славното патување на вселенската програма на Кина е најголемата среќа што ми ја донесе оваа ера.“

Надреден ќе му биде вселенскиот пилот Џанг Лу, 48, кој леташе на мисијата Шенжоу-15 пред повеќе од две години. Специјалистот за товар, Џанг Хонгџанг, 39, е третиот член на екипажот.

Патувањето ќе вклучува и четири лабораториски глувци – два мажјаци и две женки – за првите кинески експерименти со глодари во орбитата, изјави портпаролот на CMSA Џанг.

Командантот Џанг Лу рече дека е уверен дека неговиот тим „ќе ја заврши работата за татковината и нејзиниот народ со целосен успех“.

Вселенската програма на Пекинг, трета која во орбитата испраќа човечки екипаж, претходно слета роботски ровери на Марс и на Месечината.

За време на владеењето на претседателот Кси Џинпинг, Кина ги засили плановите за остварување на својот „вселенски сон“.

Пекинг вели дека планира да испрати мисија со екипаж на Месечината до 2030 година и планира да изгради база на површината на Месечината.

CMSA во четврток објави дека „цврсто се држи“ до таа цел. Во тек се голем број „клучни претстојни тестови“, вклучувајќи го и тестирањето на лунарниот модул Ланјуе и вселенското летало со екипаж Менгжу.

фото: принтскрин