Свет
(Видео) Жена преживеа под урнатините и по 222 часа: „Ја слушнавме како бара помош, пресреќни сме“

Во градот Кахраманмараш денеска е спасена 42-годишна жена, која поминала 222 часа под урнатините, објави турската телевизија ТРТ.
„Слушнавме ‘помош!’ под урнатините. Бевме обземени од радост! Успеавме да стапиме во контакт“, велат спасувачите.
Во текот на ноќта 77-годишната Фатма Гунгор била спасена од урнатините на седумкатница во градот Адијаман, 222 часа по првиот земјотрес, јавуваат турските медиуми. Во вторникот во Турција беа спасени уште девет преживеани бидејќи фокусот на хуманитарните напори се префрли на оние што сега немаат засолниште или храна во студените услови.
Турскиот претседател Реџеп Таип Ердоган вети дека ќе продолжи со спасувачките напори и брзата обнова на уништените згради повеќе од една недела по разорниот земјотрес што ги погоди неговата земја и соседна Сирија. Бројот на загинати во двете земји надмина 41.000, а преживеаните, кои останаа без домови, се справуваат со зимските температури.
„Ќе продолжиме да работиме додека не го најдеме последниот граѓанин што остана под урнатите згради“, рече Ердоган доцна во вторникот по состанокот на владата одржан во седиштето на Агенцијата за управување со катастрофи и вонредни состојби.
Процената на штетите на неколку десетици илјади уништени објекти ќе биде завршена за една недела, а реконструкцијата ќе почне за неколку месеци, тврди турскиот претседател.
„Ќе ги обновиме сите куќи и работни места, уништени или непогодни за живеење поради земјотресот, и ќе ги предадеме на нивните вистински сопственици“, додаде тој.
Повеќе од 105 илјади луѓе се повредени во земјотресот, а повеќе од 13 илјади сè уште се во болници, рече Ердоган.
Повеќе од 2,2 милиона луѓе веќе ги напуштиле најтешко погодените области, а стотици илјади згради станаа непогодни за живеење.
„Луѓето многу страдаат. Аплициравме за шатор, помош или нешто слично, но досега не сме добиле ништо“, изјави за „Ројтерс“, Хасан Саимуа, бегалец, кој со своето семејство престојува на игралиште во градот Газијантеп во југоисточна Турција.
Саимуа и другите Сиријци најдоа засолниште во Газијантеп откога избегаа од војната дома. Кога поради земјотресот повторно станаа бездомници, на игралиштето направија импровизирани шатори од пластични чаршафи, ќебиња и картон.
„Потребите се огромни и растат од час на час“, рече Ханс-Хенри П. Клуге, директор на Светската здравствена организација за Европа. „Речиси 26 милиони луѓе во двете земји имаат потреба од хуманитарна помош.
„Исто така, постои зголемена загриженост за новите здравствени проблеми поврзани со студеното време, хигиената и санитарните услови и ширењето заразни болести кај ранливите луѓе особено изложени на ризик“, предупреди Клуге.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп: На Украина ќе ѝ биде многу тешко да го врати Крим

Доналд Трамп коментираше за прашањето на Крим откако се појави информација дека неговиот мировен план вклучува признавање на руската контрола врз територијата од страна на САД.
Тој рече дека Украина „изгубила многу територија“ за време на војната, додавајќи: „Ќе направиме сѐ што можеме работејќи со Украина“.
Зборувајќи конкретно за Крим, Трамп изјави дека територијата била „предадена“ додека Барак Обама бил претседател. „Тоа нема никаква врска со мене“, рече Трамп.
Сепак, тој додаде дека ќе биде „многу тешко“ за Украина да го врати Крим.
Потоа американскиот претседател нагласи дека „нема лојалност кон никого“, туку дека има „лојалност кон спасување животи“.
„Мислам дека ќе постигнеме договор“, рече тој, додавајќи: „Мислам дека сме многу блиску до договор“.
Свет
Макрон: Путин треба конечно да престане да лаже

Францускиот претседател Емануел Макрон изјави дека Владимир Путин е единствената личност што стои на патот на мировниот предлог поддржан од САД и Европа.
„Единственото нешто што претседателот Путин треба да го направи е конечно да престане да лаже“, рече Макрон за време на посетата на Мадагаскар, објави АФП.
„Тој им кажува на американските преговарачи дека сака мир, а во исто време продолжува да ја бомбардира Украина“, додаде тој.
Макрон рече дека Украинците сакаат да чујат само едно: дали Путин се согласува на безусловно примирје? Тој нагласи дека „ако Путин каже „да“, оружјето би можело да замолкне утре и да се спасат животи“.
„Американскиот гнев треба да биде насочен само кон едно лице – претседателот Путин“, заклучи Макрон.
Вчера, Доналд Трамп го обвини Володимир Зеленски дека го отфрла мирот и рече дека може „да избере помеѓу мир и уште три години војна“, додека утрово му рече на Путин: „Владимир, престани! 5.000 војници умираат неделно. Ајде да го завршиме мировниот договор“.
Свет
Трамп: Ако нема договор, ќе воведеме царини за две до три недели

Актуелниот американски претседател Доналд Трамп изјави дека ќе почне да воведува царини за земјите што нема да постигнат трговски договори со САД во рок од „две до три недели“.
На прес-конференцијата одржана во Овалната соба, Трамп рече дека очекува САД да постигнат „одлични договори“ за време на тековните преговори. „Ако не постигнеме договор со компанија или земја, ќе воведеме царина“, рече Трамп.
Тој додаде дека неговата администрација досега разговарала за трговски договори со 90 земји. „Тоа ќе се случи, би рекол, во следните неколку недели, што велите вие? Мислам дека да, за две или три недели. Ќе ставиме бројка за тоа“, рече тој.
На 2 април, ден што го нарече Ден на ослободувањето, Трамп објави основна царина од 10 проценти за стоки од сите земји. Но, некои региони, како што се Европската Унија со царина од 20 проценти и Виетнам со 46 проценти, би се соочиле со уште повисоки царини.
Сепак, на 9 април, тој најави 90-дневно одложување на овие „реципрочни“ царини. Тој рече дека повеќето земји ќе бидат погодени со царини од 10 проценти. Во објава на социјалната мрежа Truth Social истиот ден, Трамп рече дека ја наметнува оваа пауза бидејќи повеќе од 75 земји им се обратиле на САД за да започнат преговори и ниту една од нив не одговорила со контрамерки.
Сепак, Кина не доби иста понуда. САД сега имаат царина од 145 проценти за кинеските производи, додека Кина возврати со царина од 125 проценти за американските производи.
Трамп ги користи царините како алатка за преговори уште од самиот почеток. На 3 април, тој изјави дека би бил спремен да ги намали царините за земјите што им нудат на САД „нешто феноменално“, анализираат светските медиуми.