Израелската војска соопшти дека иранските сили стационирани во Сирија истрелале околу 20 ракети врз израелски воени цели на Голанската Висорамнина, на што било соодветно одговорено. Некои од ракетите биле пресретнати од израелските одбранбени системи.

Сириските медиуми објавија дека израелската војска лансирала неколку ракети врз Дамаск и други делови на Сирија уништувајќи радарски систем и отпад со воена опрема. Притоа биле уништени десетици ирански воени цели во Сирија, како одговор на ракетирањето врз Голанска Висорамнина.

Портпаролот на израелската армија, Јонатан Конрикус, изјави дека тоа е најсериозен обид на иранската специјална единица Ал Кудс да го нападне Израел. „Четири од иранските ракети беа пресретнати, а другите не погодија израелски цели“, изјави Конрикус.

Во соопштението на израелската армија се наведува дека извршила воздушни напади врз десетина објекти на Ал Кудс во Сирија, меѓу кои штабови, воени и логистички комплекси на иранската специјална единица, ирански воен камп северно од Дамаск, магацини на Ал Кудс што се лоцирани на меѓународниот аеродром во Дамаск, набљудувачки пунктови, како и локациите од каде што биле истрелани ракетите врз Израел.

Израелските авиони ја нападнале и сириската противвоздушна одбрана, откако отворила оган врз авионите, но ниту еден не погодила. Израел ја известил Русија пред нападите согласно со механизмот за избегнување судири меѓу израелската и руската армија во Сирија од 2015 година.