Свет
(Видео) Летовите на Хаити беа прекинати откога беше пукано во еден авион
Неколку авиокомпании ги прекинаа летовите за Хаити откако беше пукано во американски патнички авион при обидот да слета во Порт-о-Пренс.
Летот 951 на Spirit Airlines од Форт Лодердејл, Флорида беше пренасочен кон соседната Доминиканска Република, каде безбедно слета на аеродромот во Сантијаго.
Стјуардесата се здобила со полесни повреди, се вели во соопштението на авиокомпанијата и се додава дека нема повредени патници.
Ова е втор пат во последните три недели да биде пукано во авион над главниот град на Хаити. Хаити е зафатен од длабока политичка криза, а вооружените банди контролираат голем дел од земјата.
Вчера беше поставен нов премиер од страна на владејачкиот совет на земјата, откако претходниот лидер Гери Конил беше сменет помалку од шест месеци откако беше назначен.
Spirit Airlines flight NK951 attempting to land in Haitian capital Port-au-Prince has been struck by gunfire, forcing it to be diverted to the Dominican Republic.
At least one person, a flight attendant, was grazed by a bullet, a source said.
All flights in and out of the… pic.twitter.com/NBBOzvRRmI
— Breaking Aviation News & Videos (@aviationbrk) November 11, 2024
Непотврдените снимки од инцидентот објавени на социјалните мрежи покажуваат неколку дупки од куршуми во внатрешноста на авионот, каде што екипажот седи за време на полетувањето и слетувањето.
Спирит ерлајнс соопшти дека штетата е „многу веројатно предизвикана од куршуми“ откриени за време на инспекција на аеродромот во Сантијаго. Авионот е повлечен од употреба, додаде Спирит.
Авиокомпанијата, исто така, ги прекина летовите за Хаити „до дополнително проценување на ситуацијата“.
Две други американски авиокомпании, American Airlines и JetBlue, исто така, ги прекинаа летовите за Хаити најмалку до четврток.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Зеленски: Подготвени сме за мировни преговори, но не отстапуваме територија
Украинскиот претседател Володимир Зеленски изјави дека Киев е подготвен за мировни преговори насекаде освен со Русија и Белорусија, доколку тие разговори би можеле да ја завршат војната, но дека украинските сили нема да се повлечат ниту чекор на бојното поле за да отстапат територија.
Зеленски, исто така, изјави во разговорот со новинарите дека Европејците се блиску до одлука за префрлање на замрзнатите руски средства во Украина, објави Укринформ.
Зеленски ги повика американските конгресмени да донесат построги санкции кон Русија и рече дека на Украина ќе ѝ треба стабилно финансирање од своите европски сојузници уште две или три години.
Свет
Зеленски: Дроновите „Шахед“ стануваат поопасни од балистичките ракети
Украинскиот претседател, Володимир Зеленски, предупреди дека иранските дронови „Шахед“ стануваат поопасни од балистичките ракети поради нивната огромна големина и постојана модернизација, објави Укринформ.
„’Шахед’ сега станаа поопасни од балистичките ракети на некои места. Соборуваме балистички ракети барем таму каде што имаме Патриот. А за да собориме толку голем број ‘Шахед’ на таква висина, потребно е да користиме сè. Пресретнувачи, Ф-16, хеликоптери – користиме сè. И многу зависи од времето. По снег ќе видиме како ќе користиме хеликоптери. Дожд и слично – авијацијата веќе не гледа сè толку добро“, нагласи Зеленски.
Тој објави дека во ноември е планирано да се достигне производство од 500 до 800 дронови-пресретнувачи дневно, но предупреди на потребата од обука на нов персонал.
„Мораме да подготвиме оператори. Многу мобилни противпожарни групи се стационирани на овој или оној објект, сега ни требаат многу оператори кои ќе работат со пресретнувачи“, додаде Зеленски.
Тој, исто така, нагласи дека Украина ќе одговори на руските напади, а особено, се планира зголемување на борбената употреба на ракетите „Фламинго“ и ракетите со беспилотни летала „Рута“.
Пред два дена Зеленски објави податоци за нападите во претходната недела. Според овие податоци, Руската Федерација употребила повеќе од 50 ракети, речиси 1.200 ударни беспилотни летала и повеќе од 1.360 наведувани бомби против Украина од 20 до 26 октомври.
Од почетокот на годината, Русија испалила околу 770 балистички ракети и повеќе од 50 хиперсонични ракети од типот „Кинжал“ кон Украина.
фото:принтскрин
Свет
Трамп би сакал повторно да се сретне со Ким Џонг Ун, но Пјонгјанг молчи
Американскиот претседател Доналд Трамп повеќе пати предложи средба со севернокорејскиот лидер Ким Џонг Ун додека се подготвува за посета на Јужна Кореја оваа недела, каде што доби поддршка од официјални лица за идејата, но Пјонгјанг досега молчи.
Северна Кореја не коментираше јавно, а американските и јужнокорејските претставници изјавија дека не се во тек конкретни подготовки. Пред заминувањето на Трамп од САД, Северна Кореја лансираше, како што рече, нови хиперсонични балистички ракети.
Но, Трамп го искористи своето патување во Азија за да ја сигнализира својата подготвеност да се сретне со севернокорејскиот диктатор, надевајќи се дека ќе ги оживее серијата самити што двајцата ги одржаа за време на првиот мандат на Трамп.
„Имав само добри односи со него“, рече Трамп во понеделник.
„Би сакал да го видам ако сака, ако воопшто ја добие оваа порака. Не споменавме ништо, но тој знае дека одам таму. Ако сака да се сретнеме, со задоволство би се сретнал со него.“
На прашањето што би можело да го донесе Ким на преговарачка маса, Трамп рече дека санкциите би можеле да бидат одговорот.
„Тоа е доста голема работа за почеток“, рече тој. „Би рекол дека е најголемата можна.“
Двајцата одржаа самити во 2018 и 2019 година пред разговорите да пропаднат за нуклеарниот арсенал на Пјонгјанг. Северна Кореја е под строги меѓународни санкции поради тоа оружје, како и поради нејзините балистички ракети.
Ким минатиот месец посочи дека е отворен за средба со Трамп доколку САД се откажат од барањето Ким да се ослободи од својот нуклеарен арсенал, но отфрла било какви преговори со Јужна Кореја.
„Лично, сè уште имам убави спомени од американскиот претседател Трамп“, рече тој во говорот, според државната новинска агенција КЦНА.
„Ако САД се откажат од својата апсурдна опсесија со нашата денуклеаризација и ја прифатат реалноста и искрено сакаат мирен соживот, нема причина да не седнеме на преговарачка маса со САД.“
фото: принтскрин

