Одбранбените сили на Украина во текот на ноќта ја погодија базата за складирање нафта „Комбинат Кристал“, која се наоѓа во градот Енгелс, во руската област Саратов, објави на Фејсбук Генералштабот на вооружените сили на Украина, пренесува Укринформ.

Гувернерот на таа област Роман Бусаргин претходно денеска изјави дека руските градови Саратов и Енгелс биле нападнати од украински беспилотни летала во текот на ноќта, но според прелиминарните информации, во нападот нема повредени.

Рускиот гувернер на Телеграм објави дека противпожарните екипи и итните служби биле испратени на местото на несреќата.

Канцеларијата за образование на округот Лос Анџелес соопшти дека училиштата во 19 окрузи во тој дел на Калифорнија денеска се затворени поради ширењето на пожарот.

На повеќе од 30.000 луѓе им е наредено да се евакуираат во јужна Калифорнија по избувнувањето шумски пожар во населбата Пацифик Палисадес во близина на Лос Анџелес, кој досега остави една жена пожарникар тешко повредена, а неколку други со изгореници  објави „Еј-би-си њуз“.

Најмалку 220.916 корисници се без струја во округот Лос Анџелес поради пожарот, кој зафати повеќе од 2.900 хектари земја.

Како што е соопштено, поради силните ветрови во Санта Ана, пожарот во Пацифик Палисадес се шири со брзина од пет фудбалски игралишта во минута.

Земјотрес со јачина од 5,5 степени според Рихтеровата скала денеска го погоди регионот Чинхаи во северозападна Кина.

Епицентарот на земјотресот бил на длабочина од 35 километри, на 433 километри југозападно од Сининг, соопшти Европско-медитеранскиот сеизмолошки центар.

Според досега расположливите податоци, 126 лица загинаа, а 188 се повредени во земјотресот со јачина од 7,1 степени според Рихтеровата скала што вчера го погоди хималајскиот регион на Тибет во југозападна Кина, јави кинеската државна телевизија CCTV, пренесе „Ројтерс“.