Свет
(Видео) Над 70 авиони префрлаат руски сили во Казахстан
Повеќе од 70 авиони Ил-76 и пет авиони Ан-124 префрлаат единици на рускиот контингент во Казахстан во рамките на силите на Организацијата за договорот за колективна безбедност (ОДКБ), изјави претставникот на Министерството за одбрана на Русија, генерал-мајор Игор Конашенков.
„Воздушната група формирана од Министерството за одбрана на Русија 24 часа на ден префрла единици на рускиот контингент од мировните сили на ОДКБ во Казахстан“, изјави Конашенков, а пренесува РИА Новости.
Во исто време, Министерството за одбрана на Русија соопшти дека руските мировни сили им помогнале на безбедносните сили на Казахстан да преземат целосна контрола над аеродромот во најголемиот град Алмати.
Претходно беше најавено дека руските мировници ќе ги чуваат владините згради и ќе ѝ помагаат на казахстанската армија да го одржува редот.
Аеродромот беше окупиран од група демонстранти пред два дена, но репортер на „Ројтерс“ од местото на настанот информира дека тие биле потиснати од казахстанските сили.
Казахстанскиот претседател Касим-Џомарт Токаев денеска соопшти дека мировни сили од Русија и соседните земји се дојдени во Казахстан привремено и на негово барање со цел да се обезбеди мирот.
Вакво насилство е невидено во земјата со која од советско време цврсто владее лидерот Нурсултан Назарбаев, чии политики продолжија и покрај тоа што се повлече од претседателската функција пред три години, со Токаев како негов наследник, кој има поддршка од официјална Москва.
Претседателот на Белорусија, Александар Лукашенко, кој важи за близок соработник на Владимир Путин, смета дека ситуацијата во Казахстан е обид за напад на постсоветските земји кои граничат со Русија, со цел, како што кажа, „Русија да се удави во крв“.
„Потребно им е да ја удават Русија во крв. Уште еднаш повторувам: ако Русија пропадне, нема ни да забележиме каде ќе завршиме. Едноставно ќе нè прегазат. Како што велам – ќе нè сомелат како воденички камења и ќе нè исплукаат “, ја коментираше Лукашенко состојбата во Казахстан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Свет
Уапсен уште еден осомничен за терористичкиот напад во Москва
Уште едно лице е уапсено во врска со терористичкиот напад на градското собрание Крокус во Москва на 22 март, соопшти денеска за „ТАСС“ портпаролот на полицијата.
„Уапсен е уште еден потенцијален осомничен во случајот со терористичкиот напад на Крокус. Инспекторите ја испитуваат неговата улога во тој напад“, изјави претставник на полицијата.
Полицијата уапсила државјанин на Таџикистан. Досега во врска со случајот се уапсени 11 лица, меѓу кои и четворица извршители на нападот.
Според последните податоци, во терористичкиот напад во концертната сала „Крокус сити хол“ во Москва загинале 145 лица.
Свет
Почина бебето кое беше извадено од утробата на мртвата мајка во Газа
Почина бебето кое во неделата со царски рез во Газа беше спасено од утробата на мртвата мајка, пишува Би-Би-Си.
Бебето е родено по итен царски рез извршен врз трудница која била убиена во израелски напад врз градот Рафа во Газа.
Освен мајката на Сабрин Ал Сакани, меѓу загинатите се и таткото на новороденото девојче и нејзината тригодишна сестра Малак.
Бебето при раѓањето тежело 1,4 килограми, а се родило во триесеттата недела од бременоста на мајката. Веднаш по царскиот рез беше сместено во инкубатор во болницата во Рафа заедно со уште едно бебе.
Но, девојчето после неколку дена почнало да има сериозни здравствени проблеми. Лекарите го реанимирале, но сепак починало вчера.
16 деца биле убиени за време на два воздушни напади на Рафа минатиот викенд, при бомбардирање на комплекс од станбени згради.
Израелските одбранбени сили (ИДФ) соопштија дека цел биле борците и инфраструктурата на Хамас и воените комплекси.