Свет
(Видео) „Најнапредниот, најспособниот и најсмртоносниот авион некогаш изграден, ниту еден друг авион не е ни блиску до овој“: Трамп го претстави новиот Ф-47

Американскиот претседател Доналд Трамп денеска соопшти дека Пентагон и доделува договор на компанијата „Боинг“ за производство и одржување на борбен авион од шестата генерација, кој ќе се вика Ф-47. Трамп го опиша новиот авион како „нешто што никој досега не го видел“.
Говорејќи во Овалната соба на Белата куќа заедно со секретарот за одбрана Пит Хегсет и водачите на американските воздухопловни сили, Трамп рече дека развојот на овој нов борбен авион е „долго време во изработка“ и дека Боинг ќе го изгради по „ригорозен и темелен натпревар меѓу водечките американски воздушни компании“ за програма позната како „Next Generation Air Dominance“.
Трамп додаде дека новиот Ф-47 ќе биде „најнапредниот, најспособниот и најсмртоносниот авион некогаш изграден“ и дека експерименталната верзија на овој авион „лета во тајност речиси пет години“.
„Уверени сме дека овој авион ги надминува можностите на која било друга земја… Секој друг авион што сум го видел, секој од нив, не е ни блиску до ова. Речиси е невидлив и има невидена моќ. Ја има најголемата моќ од сите млазни авиони од ваков тип што некогаш биле изградени, како и неспоредлива способност за маневрирање. Никогаш претходно не е изградено ништо случно“, рече Трамп.
Американскиот претседател заклучи дека непријателите на Америка „никогаш нема да видат што доаѓа“ доколку овој авион се користи во борба, и рече дека противниците „нема да знаат што ги погодило кога ќе се соочат со флота од овие величествени авиони“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Украина: Најмалку 12 загинати во руските напади со дрон, САД да извршат притисок

Најмалку 12 лица загинаа, а 60 се повредени во напади со руски беспилотни летала и ракети низ Украина, соопштија регионалните власти и службите за итни случаи.
Државната служба за вонредни состојби наведува дека меѓу загинатите има три деца во Житомир и еден маж на околу седумдесет години во јужниот град Миколаев.
Зеленски ги повика САД да извршат притисок врз Русија.
„Без навистина силен притисок врз руското раководство, оваа бруталност нема да престане. Во тоа секако можат да помогнат санкциите. Одлучноста сега е клучот – решителноста на САД, европските земји и сите оние ширум светот кои сакаат мир“, рече Зеленски.
Руското Министерство за одбрана соопшти дека во текот на ноќта противвоздушната одбрана соборила вкупно 110 украински беспилотни летала над неколку региони низ земјата.
Свет
Израелската армија пресретна ракета од Јемен, се огласија сирените

Израелската армија соопшти дека пресретнала ракета лансирана од Јемен кон Израел. Сирените се огласија во неколку области на земјата, соопшти претходно израелската војска.
Сирени се огласија и во некои делови на Ерусалим, соопштија новинарите на АФП.
Од почетокот на војната меѓу Израел и Хамас во октомври 2023 година, јеменските Хути, кои се врзани со Иран, продолжија да истрелуваат ракети врз Израел во знак на солидарност со Палестинците во Газа. Повеќето од проектилите на таа група биле пресретнати или неуспешни. Хутите не го коментираа последното лансирање ракета.
Свет
Американец со закана изнудил експлицитни снимки на 108 девојчиња, најмалото имало само пет години

Американецот Чејс Малиган се изјасни за виновен дека принудил најмалку 108 девојчиња на возраст од пет до 17 години да прават експлицитни видеа преку Интернет во период од четири години.
Малиган, како дел од договорот за признавање на вината со обвинителите, признал дека ги изнудувал таквите видеа од девојчињата заканувајќи се дека ќе ги објави видеата што веќе ги имал, ќе им каже на нивните родители или ќе ги нападне нивните семејства, пишува Вашингтон пост.
Повеќето од жртвите живеат во САД, но Малиган уценувал и девојчиња од Австралија, Канада, Данска, Шпанија, Обединетото Кралство и Филипините, комуницирајќи со нив преку „Снепчет“, „Инстаграм“, „Скајп“, „Дискорт“, „Роблокс“ и други апликации.
Истрагата почна во летото 2022 година, кога инспекторите дознале дека лице кое користи профил на „Снепчет“ експлоатирало две дванаесетгодишни девојчиња, како и петгодишно девојче во Тенеси.
Откако ја пронашле адресата, Малиган бил уапсен во неговиот дом во Мерлинед. На Малиган (28) му се заканува затворска казна од минимум 15, а најмногу 60 години за изнуда, експлоатација и производство на детска порнографија.