Свет
(Видео) На паркиралиште во Њу Делхи масовно се кремираат починати од Ковид-19
Додека вториот бран на коронавирус се шири низ Индија, мртви тела се собираат побрзо отколку што работниците можат да ги кремираат.
„Пред пандемијата кремиравме осум до десет лица на ден. Сега кремираме 100 до 120“, вели Џитендер Синг Шaнти, шеф на крематориумот Симапури во источен Њу Делхи.
Тие кремираат толку многу тела што морале да го прошират бизнисот на паркинг, каде десетици работници градат нови платформи за кремирање, пишува Си-ен-ен.
Има толку малку простор, а многу тела, па семејствата треба да земат ливче и да чекаат на ред.
Градоначалникот на Северен Делхи, Џај Пракаш, на почетокот на неделава му напиша писмо на премиерот на Делхи, Арвинд Кејривалу, во кое бара одделот за шумарство да обезбеди трајно снабдување со дрва.
Во меѓувреме, семејствата мораат да плаќаат за дрвата за спалување на телата на нивните блиски.
Кремацијата се смета за важен дел од хинду погребните обреди поради верувањето дека телото мора да биде уништено за душата да премине во реинкарнација.
Барка Дат, колумнистка на „Вашингтон пост“, неделава го згубила својот татко поради коронавирусот.
„Кога го кремиравме, немаше место на теренот за кремирање. Имаше тепачка што изби помеѓу неколку семејства. Мораше да повикаме полиција за да го кремираат татко ми. Сепак, имав поголема среќа од повеќето Индијци“, вели Дат.
Индија извести за најголем дневен број на новозаразени лица – 386.452 нови случаи, додека бројот на смртни случаи од Ковид-19 во последните 24 часа се зголеми за 3.498.
Сепак, медицинските експерти веруваат дека вистинскиот број на лица заразени со Ковид-19 во втората по бројност земја во светот, веројатно е пет до десет пати поголем од официјалните извештаи.
Индија регистрирала околу 77 милиони случаи од крајот на февруари, во период на нагло зголемување на инфекциите во вториот бран на пандемијата, покажуваат статистиките на агенцијата „Ројтерс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Словенечкиот премиер најави построги безбедносни мерки по убиството
Словенечкиот премиер Роберт Голоб најави засилување на безбедносните мерки и измени во казнената политика по смртта на 48-годишен маж во Ново Место, кој почина по напад, пренесе „Индекс“.
Во телевизиско обраќање, Голоб рече дека државата ќе направи сè за да ја заштити безбедноста на граѓаните, но предупреди дека „репресивните мерки нема да бидат популарни“.
Тој најави двојно зголемено полициско присуство во југоисточниот дел на земјата и рече дека сите институции – полицијата, обвинителството и судството – ќе добијат поголеми овластувања.
„Овој сторител не стана таков преку ноќ. Тој е производ на систем што не функционирал. За да го смениме тоа, ќе биде потребна цела генерација“, изјави Голоб.
Премиерот ги повика сите политички лидери да покажат одговорност и да не ја користат трагедијата за собирање политички поени.
Регион
Курти не успеа да формира влада
Лидерот на Движењето „Самоопределување“, Албин Курти, соопшти дека актуелната влада ќе продолжи да функционира до одржување на нови парламентарни избори, откако денеска во косовското Собрание не доби доволен број гласови за формирање нов кабинет, пренесе „Фонет“.
„Им благодарам на сите пратеници кои го поддржаа предлогот за новата влада и на граѓаните за поддршката. Бидејќи 56 гласа беа за, 52 против, а четворица воздржани, новиот мандат не може да започне. Во меѓувреме, како актуелна влада продолжуваме кон новите парламентарни избори“, напиша Курти на „Фејсбук“, пренесе „Косев“.
По гласањето, претседателот на Собранието, Димал Баџа, изјави дека одговорноста сега преминува на претседателката Вјоса Османи, која најави консултации со сите партии. Доколку не биде формирана влада, Османи ќе распише нови избори во рок од 40 дена.
Опозициските партии веќе порачаа дека нема да се обидат да формираат влада, бидејќи немаат мнозинство.
Свет
Гувернерот на Калифорнија сака да биде претседател на САД
Гувернерот на Калифорнија, демократот Гавин Њусом, изјави во интервју за „Си-Би-Ес“ дека сериозно размислува за кандидатура за претседател на САД во 2028 година, пренесе „Хина“.
Тој нагласи дека конечната одлука ќе ја донесе по изборите за Претставничкиот дом и Сенатот во 2026 година. „Да, би лажел кога би рекол поинаку“, рече Њусом на прашањето дали планира да се кандидира.
Како што потсетува агенцијата, Њусом оваа година ја зацврсти својата позиција во Демократската партија, особено поради честите судири со актуелниот претседател Доналд Трамп.
Инаку, според Уставот на САД, Трамп нема право на трет претседателски мандат.
Изборите за американскиот Конгрес ќе се одржат во ноември 2026 година.
California Gov. Gavin Newsom says he’s open to a presidential run.
The Democrat and frequent Trump critic said he’ll give serious thought to a White House bid after next year’s midterms. “I’d be lying otherwise,” Newsom said, adding that “fate will determine” his decision and a… pic.twitter.com/uD8OqNrnHE
— CBS Sunday Morning 🌞 (@CBSSunday) October 26, 2025

