Свет
(Видео) „Нешто големо се случува во Газа“, вели дописникот на Скај Њуз

Сегашните напади врз Газа се „многу позначајни“ од што било видено во последните неколку недели, вели дописникот на Скај Њуз за Блискиот Исток, Алистер Бункал.
Бункал вели дека засега се знае дека во тек е силно бомбардирање на Газа, а линиите за комуникација се прекинати.
„Прашањето е зошто, и многу е можно тоа да е затоа што вечерва ги прошируваат копнените операции“, вели тој.
„Тоа значи дека, по последните две ноќи кога видовме како израелската армија влегува во Газа на прилично ограничен начин, тоа сугерира дека можеби доаѓа нешто поголемо“, рече тој.
„Дали ова значи дека ќе се случи копнената инвазија што ја ветија сите од премиерот надолу? Можеби“, додава тој.
Бункал вели дека би бил изненаден доколку вечерва се изврши копнена инвазија бидејќи израелскиот премиер Бенјамин Нетанјаху молчи, а вчера „многу јасно стави до знаење дека тоа е негова одлука и одлука на воениот кабинет“.
„Она што го гледаме вечерва е од поголема магнитуда отколку што сме виделе во, би рекол, неколку недели“, вели Бункал.
„Ги засиливме нападите, жестоко напаѓаме подземни цели“
Даниел Хагари, портпарол на ИДФ, на прес-конференција рече: „Во последните неколку часа ги зголемивме нашите напади во Газа. Воздухопловните сили силно напаѓаат подземни цели и терористичка инфраструктура, во значителен обем“.
Хамас ги повикува арапските земји: Запрете го масакрот
Хамас, исламистичката организација која го нападна Израел пред три недели и брутално уби 1.400 луѓе, од кои повеќето цивили, вечерва ги повика сите арапски земји и меѓународната заедница да „помогнат да се запрат злосторствата и масакрот на нивниот народ“.
Многу ракети беа истрелани од Газа кон централен Израел. Тоа е веројатно одговор на вечерашното брутално израелско бомбардирање на Газа.
Палестинската мобилна компанија објави дека нејзините телефонски услуги се прекинати поради силните бомбардирања во Појасот Газа.
„Интензивното бомбардирање во последниот час предизвика уништување на сите преостанати меѓународни врски што ја поврзуваат Газа со надворешниот свет“, објави компанијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Зеленски: Путин сака примирје само за време на неговата парада

Украинскиот претседател, Володимир Зеленски, изјави дека светот не сака да чека до 8 мај за најавеното примирје на рускиот претседател, Владимир Путин, да трае само неколку дена и повика прекинот на огнот да трае најмалку 30 дена.
„Од некоја причина, сите треба да почекаат до 8 мај и дури тогаш да постигнат прекин на огнот за да се обезбеди мир за Путин за време на парадата“, рече Зеленски во видео обраќање објавено синоќа.
Рускиот претседател Владимир Путин објави тридневно примирје во војната со Украина што ќе стапи на сила следниот месец по повод 80-годишнината од победата на Советскиот Сојуз и неговите сојузници во Втората светска војна.
„Ние ги цениме човечките животи, а не парадите. Примирјето не треба да трае неколку дена само за да продолжи убивањето потоа“, додаде украинскиот претседател, коментирајќи ја најавата на Путин за ограничено примирје.
Зеленски повика на „целосен и безусловен прекин на огнот од најмалку 30 дена“ за да се обезбеди „основа за вистинска дипломатија“.
Свет
Победа на либералите во Канада

Канадската Либерална партија, предводена од премиерот Марк Карни, е на добар пат да победи на федералните избори, велат канадските медиуми, по кампањата обележана со провокации и царини од страна на американскиот претседател Доналд Трамп. Гласовите сè уште се пребројуваат, а филијалите на CNN, CTV и CBC, предвидуваат дека либералите ќе освојат доволно места за да формираат нова влада.
Со оглед на тоа што гласовите сè уште се пребројуваат, CBC News вели дека е прерано да се каже дали новата влада ќе биде мнозинска или малцинска влада – за мнозинска влада се потребни 172 места.
Марк Карни, новиот канадски премиер и лидер на Либералната партија, им се обрати на своите поддржувачи по неговата изборна победа. Енергичен и решителен, тој го започна својот говор прашувајќи: „А кој е подготвен да изгради силна Канада?“, што беше проследено со ентузијастичен аплауз.
„Влегов во политиката затоа што чувствував дека на Канада ѝ се потребни големи промени“, објасни Карни, наведувајќи дека тие промени ќе бидат водени од канадските вредности што ги научил на семејната маса и на хокеарскиот мраз. Тој ги нагласи понизноста, амбицијата и единството како клучни вредности на неговата идна влада.
За Карни, понизноста е соработка со сите политички партии, провинции и домородни народи, но и подготовка за тешки предизвици.
„Америка ја сака нашата земја, нашите ресурси, нашата иднина“, предупреди тој, на што публиката спонтано одговори со извици „никогаш“.
„Претседателот Трамп се обидува да нè скрши за Америка да може да владее над нас. Тоа никогаш, ама баш никогаш нема да се случи“, рече тој цврсто, додавајќи дека Канада е на „историска пресвртница“ бидејќи „стариот интеграциски однос со САД е завршен“.
Свет
Шпанија и Португалија повторно имаат струја

Елекетричната енергија е обновена речиси целосно низ Шпанија и Португалија по вчерашниот масовен прекин што предизвика хаос во двете земји.
„Електричната енергија е обновена речиси целосно низ цела Шпанија по големиот прекин, при што околу 99,16 проценти од снабдувањето со електрична енергија е обновено до 6 часот наутро“, соопшти операторот на електричната мрежа „Ред Електрика“ утрово.
И во соседна Португалија, електричната енергија е обновена во повеќето домаќинства. „Околу 95 проценти од 6,5 милиони корисници во земјата се вратија на мрежата“, објави операторот на електричната мрежа РТП.
Официјалната причина за прекинот сè уште не е позната. Милиони луѓе во Шпанија и Португалија останаа во темница откако одеднаш снема струја, комуникациските мрежи беа прекинати, семафорите престанаа да работат, а лифтовите беа блокирани.
Шпанскиот премиер, Педро Санчез, во телевизиско обраќање вчера вечерта, вети дека струјата ќе биде обновена до вторник. Тој не ја прецизираше причината за прекинот, но рече дека не се исклучува ниедна можност.