Видео од деца- мигранти со бројки напишани на рацете се рашири како вирус на интернет кога седумгодишно девојче, приведено во САД, почина од сепса.

Локални медиуми во САД известија за оваа практика по смртта на Џеклин Каал Макин, дете од Гватемала, кое со својот татко било приведено поради нелегално преминување на јужната американска граница.

Макин и татко ѝ биле приведени заедно со група од 160 мигранти во Ново Мексико.

Додека се возеле во автобус што ги пренесувал до граничната патрола во Лордсбург, Ново Мексико, таткото на Макин ги известил овластените лица дека неговата ќерка повраќала.

Девојчето починало неколку часа подоцна на 8 декември, во болница во Ел Пасо, Тексас.

Официјалните резултати од аутопсијата допрва ќе бидат објавени. Сепса настанува како резултат на екстремна инфекција кога телото не реагира на не и може да доведе до откажување на органите, велат од Центарот за контрола и превенција на болести.

Од министерството за внатрешна безбедност на САД извесутваат дека таткото негирал оти Макин била болна за време на првичното испрашување.

„Првичните испрашувања не открија никаков доказ за здравствени проблеми“, се вели во соопштение од министерството. „За време на испрашувањето таткото негира дека тој или неговата ќерка биле болни“.

Смртта на девојчето ја потресе јавноста, која е сè позагрижена за миграциските политики на Доналд Трамп, односно фактот дека децата што чекаат да ја преминат границата на САД се обележани со броеви на рацете.

Голем број корисници на социјалните мрежи го споредуваат ова со нацистичката пракса на тетовирање на еврејските затвореници во концентрационите логори.

„Глетки од Аушвиц“, вели еден корисник на „Твитер“.

Според снимката, бројките што децата ги носат на рацете се напишани со маркер.