Унгарскиот премиер Виктор Орбан свика состанок на Советот за одбрана поради последните случувања во војната во Украина и зголемената закана од ескалација на конфликтот, објави портпаролот на Орбан, Берталан Хаваси.

Орбан, заедно со шефовите и државните секретари на релевантните министерства, советникот за национална безбедност на премиерот и командантот на унгарската армија, ќе ја разгледаат ситуацијата по одлуката на САД да дозволат напади на руска територија со оружје доставено во Украина, јави МТИ.

Ќе се разговара и за одлуката на Москва да ја прошири листата на закани на кои Русија би можела да одговори со употреба на нуклеарно оружје, рече тој.

Италија, Шпанија и Грција денеска ги затворија своите амбасади во Киев поради американските информации за можен руски напад со беспилотни летала и проектили врз главниот град на Украина во текот на денот, јави украинската државна телевизија „Суспилна“.

Како што се наведува, податоците на украинското разузнавање укажуваат на можен руски комбиниран напад со беспилотни летала и ракети врз Киев, а не се смета дека потенцијалниот напад е поврзан со вчерашната промена на руската нуклеарна доктрина, пишува „Гардијан“.

Претходно утринава, САД привремено ја затворија својата амбасада во Киев поради „конкретни информации за потенцијален значаен воздушен напад“ во текот на денот, соопшти Стејт департментот.

„Како мерка на претпазливост, Амбасадата ќе биде затворена, а на вработените во неа им е наредено да се евакуираат на безбедно. Амбасадата на САД препорачува граѓаните на САД да бидат подготвени за итна евакуација во случај да биде издадена воздушна тревога“, се вели во соопштението, пренесе „Скај њуз“.

„Укринформ“ објави дека во Киев во сила е воздушна тревога и дека експлозии може да се слушнат во главниот град.

Украинската армија исто така ги предупреди граѓаните за беспилотни летала над Киев и беа активирани системите за противвоздушна одбрана.

Јапонските власти рекоа дека внимателно ќе следат дали Кина го исполнила ветувањето оти ќе спречи понатамошно нарушување на воздушниот простор на Јапонија откога објаснија дека упадот на кинески воен авион пред речиси три месеци бил ненамерен.

Токио протестира и побара објаснување од Пекинг откога кинескиот извидувачки авион „И-9“ на 26 август накратко навлезе во воздушниот простор на Јапонија кај главниот остров Кјушу поради што јапонската војска подигна борбени авиони.

Кабинетот на премиерот објави дека Кина го признала прекршувањето на воздушниот простор и ја уверила Јапонија дека ќе направи напори да спречи повторување.

„Го земаме предвид кинеското објаснување и отсега внимателно ќе ја следиме кинеската воена активност“, изјавија тие.

Кина соопшти дека прекршувањето на воздушниот простор се случило кога пилотот на авионот презел итни мерки како одговор на турбуленциите во областа и дека тоа не било намерно, соопшти јапонското Министерство за надворешни работи. Јапонските власти не открија други детали.

Иако авионите може да се најдат во турбулентни услови, толку значително отстапување од патеката на летот е незамисливо, изјавија јапонските власти.

Телевизијата NHK објави дека јапонските одбранбени претставници рекле дека сè уште го сметаат нарушувањето на воздушниот простор за неприфатливо бидејќи тоа е сериозно нарушување на територијалниот суверенитет.

Претставниците на Токио се загрижени поради зголемената воена активност на Кина околу југозападните води и воздушниот простор на Јапонија. Ова доведе до тоа Токио значително да ја зајакне својата одбрана во областа, која се смета за клучна за стратегијата за одбрана на Јапонија.

Јапонија е загрижена и за воените активности на Кина, Русија и Северна Кореја, пренесуваат медиумите.