Европската комисија денес објави 2,3 милијарди евра поддршка за Украина за да ѝ помогне да се обнови од штетите предизвикани од руската инвазија. Средствата вклучуваат 1,8 милијарди евра гаранции за кредити и 580 милиони евра грантови од меѓународни и билатерални јавни финансиски институции, изјави претседателката на Европската комисија, Урсула фон дер Лајен, на конференција во Рим за плановите за обнова на Украина.

Вкупниот износ од 2,3 милијарди евра е дел од Инвестициската рамка за Украина. Фон дер Лајен рече дека се очекува рамката да мобилизира до 10 милијарди евра инвестиции во Украина.

Шефицата на ЕК, исто така, најави формирање нов фонд за обнова на Украина, поддржан од Европската инвестициска банка, Франција, Германија, Италија и Полска. Со почетен капитал од 220 милиони евра, фондот има за цел да мобилизира 500 милиони евра до 2026 година, соопшти Комисијата.

Заменик-министерот за надворешни работи, Сергеј Рјабков, денес изјави дека контрадикторните постапки и зборови на администрацијата на американскиот претседател Доналд Трамп ја отежнуваат работата, иако Москва е посветена на подобрување на односите со Вашингтон.

„Администрацијата на Трамп е многу контрадикторна во своите постапки и изјави. Ова не ја олеснува работата“, изјави Сергеј Рјабков, цитиран од државната новинска агенција ТАСС.

„Сепак, ние упорно и доследно го следиме правецот кон нормализација на нашите односи“, додаде тој.

Рјабков рече дека Русија знае како да се спротивстави на какви било можни дополнителни санкции од Вашингтон, објави новинската агенција „Интерфакс“.

„Знаеме како да се спротивставиме на санкциите. Можеме да видиме дека развивме алатки и шеми во последните години. Ова во голема мера задоволува одредени мерки преку замена“, рече Рјабков.

Предлогот за гласање за недоверба на претседателката на Европската комисија, Урсула фон дер Лајен, и нејзината Комисија не помина во Европскиот парламент во Стразбур.

Фон дер Лајен и Европската комисија преживеаа гласање за недоверба, при што 175 пратеници гласаа за предлогот, 360 беа против, а 18 беа воздржани, според медиумите.

Бројот на гласови „за“ беше далеку под потребното двотретинско мнозинство од вкупниот број гласови за предлогот да биде усвоен.

Урсула фон дер Лајен не беше присутна во салата за време на гласањето.

Групата на социјалистите и демократите (С&Д) во замена за својата поддршка доби ветување во врска со следниот долгорочен буџет на ЕУ, а ова ветување ќе биде ставено на тест веќе следната недела кога Комисијата ќе го објави својот предлог, според написите.

Десничарските групи „Патриоти за Европа“, „Европа на суверени нации“, како и многумина од европските конзервативци и реформисти и неколку делегации од левата страна на политичкиот спектар гласаа за предлогот за недоверба.