Свет
(Видео) Уапсен сериски убиец на жени во Америка, телата ги оставал на плажите во Њујорк

Еден осомничен е уапсен за серија убиства на жени во близина на плажата Гилго на јужниот брег на Лонг Ајленд, Њујорк, изјавија за Њујорк Тајмс три лица запознаени со случајот.
Полицајците опколија блок згради на Првата авенија во паркот Масапеква, а на местото на настанот беа видени повеќе полициски возила и полицајци.
Станува збор за серија убиства што се случуваат повеќе од една деценија. Како што пренесува Њујорк Тајмс, 11 тела биле откриени во оддалечена област на околу 40 милји од центарот на Менхетен.
Во мај 2010 година, Шенан Гилберт, 24-годишна проститутка од Џерси Сити, исчезнала на Лонг Ајленд. Таа исчезна за време на придружба во Оук Бич, затворена заедница на околу пет километри од плажата Гилго.
Седум месеци подоцна, полицијата на округот Суфолк откри четири завиткани тела покрај Оушн Парквеј, на околу три милји од местото каде што Гилберт последен пат била видена жива. Во 2011 година, тие беа идентификувани со ДНК како Амбер Лин Костело, Морин Брејнард-Барнс, Меган Вотерман и Мелиса Бартелеми.
Сите биле во дваесеттите години и работеле како проститутки. Подоцна истата година беа пронајдени посмртните останки на Валери Мек, 24-годишна мајка од јужен Њу Џерси, која работела како проститутка и исчезнала пред 20 години.
На тој простор се пронајдени вкупно останките на девет жени, маж и мало дете. Полицијата соопшти дека верува дека некои од убиствата се дело на сериски убиец, но истрагата со години е неплодна.
Во 2020 година, истражителите на прес-конференција открија фотографија од, како што рекоа, значаен доказ собран на почетокот на истрагата: црн кожен ремен украсен со пар букви околу 1,25 сантиметри. Истражителите рекоа дека тоа значи иницијали „W H“ или „H M“.
Посмртните останки на Шенан Гилберт беа пронајдени во декември 2011 година, но инспекторите рекоа дека не веруваат дека нејзината смрт е поврзана со сериски убиец. Семејството Гилберт не се согласи и бараше објавување на повеќе докази.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Напад во кривичниот суд во Њујорк, има повредени

Тројца судски службеници денес биле нападнати со нож и повредени во зградата на Кривичниот суд на Менхетен, потврдија два извори од њујоршката полиција кои се запознаени со нападот.
„Осомничениот напаѓач е приведен по нападот врз службениците во зградата на судот на Централната улица во Њујорк. Нападот се случил близу фоајето“, изјавил неименуван полициски извор за NBC.
Еден судски службеник се здобил со посекотини на лицето, друг на вратот, а третиот бил повреден кога осомничениот го фрлил на подот обидувајќи се да побегне, се наведува во извештајот на американската телевизиска мрежа.
Сите тројца повредени се медицински згрижени и се чувствуваат добро, а истрагата е во тек, иако засега не е јасно што бил мотивот за нападот.
Свет
„Ерусалим пост“: Трамп ќе му даде на Иран последна шанса

Американскиот претседател, Доналд Трамп, планира да му упати на Иран последна шанса за договор, објави „Ерусалим пост“, повикувајќи се на американски и европски претставници.
Според неофицијални информации, новата понуда би можела да биде уште поповолна од онаа од пред недела и половина, но сепак би се базирала на американското барање за нулта толеранција за збогатување ураниум.
Според истиот извор, Иран се обидел да посредува со американската администрација преку Оман и Катар со цел да ги запре израелските напади и да ги обнови преговорите за нуклеарната програма. Саудиска Арабија наводно дејствува преку посебен канал со иста цел – постигнување прекин на огнот.
Свет
Претседателот на Иран: Не сакаме ширење на војната

Иранскиот претседател Масуд Пезешкијан изјави дека Иран не сака да ја прошири војната со Израел, но ќе одговори пропорционално на секој напад, пренесува државната иранска новинска агенција.
Пезешкијан ова го рекол за време на телефонскиот разговор со турскиот претседател Реџеп Таип Ердоган.
„Иранските научни, воени и цивилни објекти беа под израелска агресија, при што беа убиени цивили, научници и воени водачи“, рече Пезешкијан.
„Иран не ја започна оваа војна, но ќе одговори според нивото на напад“, изјави.
Тој додаде дека учеството на Иран во нуклеарните преговори со САД зависи исклучиво од прекинот на нападите на ционистичкиот режим врз земјите во регионот.
Турскиот претседател Ердоган, според турската државна агенција, му рекол на Пезешкијан дека Турција е подготвена да игра улога на посредник за да помогне во деескалацијата на конфликтот и да го поддржи враќањето на преговорите за нуклеарната програма.