Свет
Вознемиреност поради изјавите на израелските министри Палестинците трајно да се иселат од Газa
Шефот на Обединетите нации за човекови права, Волкер Турк, рече дека е многу вознемирен од изјавите на високите израелски претставници, кои ги повикуваат Палестинците да ја напуштат Газа.
„Многу сум вознемирен од изјавите на високите израелски функционери за плановите за префрлање цивили од Газа во трети земји“, напиша Турк на социјалната мрежа Х.
Тој додаде дека меѓународното право забранува присилно пренесување заштитени лица во или депортација од окупираната територија, пренесува „Ал Арабија“.
Израелскиот министер за национална безбедност, Итамар Бен-Гвир, во понеделникот повика на промоција на „решенија за поттикнување на емиграцијата на жителите на Газа“ и повторно воспоставување израелски населби во Појасот Газа.
Еден ден претходно, екстремно десничарскиот израелски министер за финансии, Безалел Смотрич, исто така повика на враќање на доселениците во Газа додавајќи дека Израел треба да охрабри околу 2,4 милиона Палестинци од енклавата да ја напуштат.
Израелската влада на премиерот Бенјамин Нетанјаху официјално не предложи планови за иселување на жителите на Газа или враќање на еврејските доселеници на територијата по избувнувањето на војната откога палестинската милитантна група Хамас го нападна јужен Израел на 7 октомври.
Повеќето жители на Газа беа принудени да ги напуштат своите домови поради борбите меѓу Израел и Хамас.
Шефот на европската дипломатија, Жозеп Борел, остро ги осуди, како што рече, запаливите и неодговорни изјави на израелските министри Гвир и Смотрич, во кои тие повикаа на преселување на Палестинците.
„Силно ги осудувам запаливите и неодговорните изјави на израелските министри Бен Гвир и Смотрич, кои го навредуваат палестинското население во Газа и повикуваат на план за нивна емиграција“, напиша Борел на социјалната мрежа „Икс“ („Твитер“).
Борел додава дека присилното раселување е строго забрането како сериозно кршење на меѓународното хуманитарно право.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Брутално претепан познатиот албански водител Елтон Тозај, може да остане слеп
Познатиот албански водител Елтон Тозај бил нападнат и брутално претепан синоќа околу 19:30 часот на автопатот Тирана-Драч, под околности кои сè уште остануваат вознемирувачки и нејасни, објавија медиумите.
Според информациите објавени од неговото семејство, на неговиот профил на социјалните мрежи, новинарот бил брутално нападнат од неколку лица. Во насилството врз Тозај му биле нанесени сериозни физички повреди.
„Семејството објави дека Елтон Тозај моментално е во сериозна здравствена состојба и е на интензивна медицинска нега. Според нив, ситуацијата е деликатна, бидејќи новинарот се бори да не го изгуби видот, што го прави овој настан уште поалармантен“, наведуваат медиумите.
Од полицијата засега нема информација околу настанот.
Свет
Бурата Јоханес ја погоди Шведска, повеќе од 40.000 домаќинства без струја
Бурата Јоханес ја погоди Шведска носејќи силни ветрови и снежни врнежи, додека повеќе од 40.000 домаќинства останаа без електрична енергија.
Според метеоролозите, бурата се шири брзо и се очекува ветровите да се зајакнат во текот на денот.
Бурата започна ноќеска од северот на земјата, со многу силни ветрови, додека жолти и портокалови временски предупредувања беа издадени за поголемиот дел од Шведска, пренесе локалниот портал Expressen.
Свет
По рускиот напад над 2.600 станбени згради, 187 градинки, 138 училишта и 22 социјални згради се без греење во Киев
Околу 600.000 потрошувачи во Киев и околниот регион останаа без електрична енергија.
Енергетските екипи се на терен и вложуваат максимални напори за што поскоро враќање на снабдувањето, објави премиерката на Украина Јулија Свириденко на социјалните мрежи.
„Работиме на решавање на последиците од ноќниот напад врз Киев и регионот. Предупредувањето за воздушна опасност во Киев беше на сила 10 часа. Една жена почина во регионот на Киев. Во главниот град досега се повредени 32 лица“, рече Свириденко.
Службите за итни случаи се на терен, кои, заедно со медицинските екипи, ги расчистуваат урнатините и им пружаат помош на жртвите. Премиерката додаде дека во нападот се оштетени цивилни и енергетски објекти.
Во моментов, над 2.600 станбени згради, 187 градинки, 138 училишта и 22 социјални згради се без централно греење“

