Свет
Во Грузија уапсен осомничениот за убиството на рускиот пилот во Сирија
Серкан Куртулуш, човекот кој е осомничен за убиството на рускиот пилот во Сирија е уапсен во Грузија по потерница на Интерпол, пренесуваат грузиските и турските медиуми. Турција веќе побарала негово испорачување.
Куртулуш, кого Русите го опишаа како шеф на мафијашка група, која во ноември 2015 година го убила пилотот Олег Пешков, е уапсен во Тбилиси на 29 јуни и се наоѓа во затвор во грузискиот град Рустав.
Турците веднаш побараа негова екстрадиција, а покрај убиството на рускиот пилот, го товарат и за воспоставување на мафијашка организација во неколку турски градови, за вооружени напади и уцени.
Во ноември 2015 година турски ловци соборија руски Су-24 кај границата со Сирија. Турција тврдеше дека рускиот авион го нарушпил турскиот воздушен простор, а Москва ги отфрли обвинувањата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Прослава на улиците на Техеран поради нападот врз Израел
Стотици Иранци излегоа на улиците на Техеран за да го прослават нападот во кој беа истрелани речиси 200 проектили кон Израел.
Свет
Советникoт за национална безбедност на САД: Нападот беше поразен и неефикасен
Американскиот советник за национална безбедност, Џејк Саливан, одржа прес-конференција во Белата куќа.
Тој потврди дека Соединетите Држави соработуваат со Израел за да го проценат влијанието на нападот и повтори дека во овој момент се знае дека никој не е убиен.
„Накратко, овој напад се чини дека е поразен и неефикасен“, нагласи тој.
Како што нагласи, нападот претставува значајна ескалација од страна на Иран.
„Подеднакво е значајно што успеавме да зачекориме напред со Израел и да создадеме ситуација во која никој не е убиен во Израел колку што знаеме во моментов“, додаде тој.
Потврди дека Белата куќа јасно ставила до знаење дека ќе има последици за овој напад.
Претставник на американското Министерство за одбрана изјави дека разурнувачите на американската морнарица во Средоземното Море пресретнале ирански балистички ракети за време на нападот врз Израел.
Американски разурнувачи учествуваа и во пресретнувањето на ирански балистички ракети и беспилотни летала на 13 април, соборувајќи неколку проектили лансирани кон Израел.
Свет
Мексико официјално ја доби својата прва жена претседател во историјата
Поранешната градоначалничка на Мексико Сити, Клаудија Шејнбаум, денеска официјално стана првата жена претседател на Мексико од независноста на земјата во 1821 година, наследувајќи го популарниот Андрес Мануел Лопез Обрадор на таа позиција.
Шејнбаум, климатски научник со еврејско потекло, положи заклетва пред претставници и сенатори во Мексиканскиот конгрес.
Во јуни таа победи на изборите со речиси 60 отсто од гласовите, откако излезе пред владејачката левичарска партија Движење за национална обнова (Морена) и сојузниците.
Тие имаат и удобно мнозинство во парламентот, што им овозможува да го променат Уставот без поддршка од опозицијата. На инаугурацијата пристигнаа бразилскиот претседател Луис Инасио Лула да Силва и првата дама на САД Џил Бајден.
Поранешната градоначалника на Мексико Сити ја превзема функцијата од нејзиниот ментор, Андрес Мануел Лопез Обрадор, кој ја воведе во политиката во 2000 година како заменик за еколошки прашања во градското собрание на мексиканската престолнина.
Веднаш по победата таа најави дека нејзината влада ќе биде фискално одговорна и ќе ја почитува автономијата на централната банка. Најави и дека ќе ја зајакне безбедноста на земјата, но не кажа како ќе го направи тоа по најнасилните избори во модерната мексиканска историја, пред кои беа убиени 38 кандидати.
Аналитичарите тврдат дека организираните криминални групи го зајакнале и го прошириле своето влијание за време на мандатот на Лопез Обрадор.
Ја удвои минималната плата, ја намали сиромаштијата, за време на неговиот мандат зајакна пезото, а невработеноста се намали, што го направи исклучително популарен, напиша Ројтерс.
Тој беше многу присутен во кампањата за овие избори, обидувајќи се да ги прикаже како референдум за неговото политичко наследство. Шејнбаум ги отфрли тврдењата на критичарите дека таа ќе биде негова „марионета“, иако најави дека ќе продолжи со многу од неговите политики.