Свет
Во тајност се чува извештај за навредите што Трамп ги упатил кон Меркел и Тереза Меј

Американскиот претседател, Доналд Трамп, наводно користел многу груби зборови во телефонските разговори и ги навредувал своите колеги од светската политичка сцена, пренесува Си-ен-ен.
Според „Спутник“, Трамп не бирал зборови за време на доверливите телефонски разговори, па така тој ја нарекол германската канцеларка, Ангела Меркел, „глупава“ и тврдел дека е под влијание на Русија, а за поранешната британска премиерка Тереза Меј рекол дека е „гуска“ без став за брегзит.
„Некои од работите што ги кажа за Ангела Меркел се едноставно неверојатни: тој ја нарече ‘глупава’ и ја обвини дека е под влијание на Русија. Тој е најсуров во телефонските разговори со оние кои ги смета за слаби водачи, а најблаг е за оние кон кои треба да покаже најцврст став“, наведува извор на Си-ен-ен.
Анонимен германски претставник потврдил дека разговорите се толку невообичаени што во Берлин се преземаат мерки за да се сочува нивната содржина во тајност.
Истиот извор го опишал Трамп како многу агресивен, поради што кругот на луѓето кои учествуваат во следењето на телефонските разговори на Меркел бил стеснет.
Според изворите, понижувачки и навредливи биле и разговорите на Трамп со Тереза Меј, на која американскиот претседател, меѓу другото, ѝ велел дека нема цврст став за прашањата за брегзит, НАТО и имиграцијата.
За време на телефонските разговори, Трамп со потсмев зборувал и за други лидери од западниот свет, како претседателот на Франција, Емануел Макрон, премиерот на Канада, Џастин Трудо, и премиерот на Австралија, Скот Морисон.
Од друга страна, влијателните светски лидери, како рускиот претседател Владимир Путин и турскиот претседател Реџеп Таип Ердоган, често го фалеле Трамп за време на телефонските разговори, поради што високи американски официјални претставници сметаат дека Трамп ја загрозува националната безбедност на земјата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
40 ранети во Израел, двајца критично

Вкупно 40 лица побарале медицинска помош по вечерашниот ирански ракетен напад врз Израел, соопштија локалните здравствени служби. Двајца од повредените се во критична состојба.
Најголем број пациенти се лекуваат во болницата Ичилов во Тел Авив – 18 лица.
Според лекарите, пријавените повреди вклучуваат рани од шрапнели, вдишување чад и состојба на шок.
Свет
Израелската војска: Иран истрела помалку од 100 балистички ракети, повеќето ги пресретнавме

Портпаролката на израелската војска, Ефи Дефрин, рече дека помалку од 100 балистички проектили биле истрелани од Иран кон Израел.
Дефрин рече дека „повеќето од ракетите биле пресретнати од воздушната одбрана или паднале пред да стигнат до израелска територија“.
„Регистрирани се ограничен број погодоци на згради, а дел од штетата е предизвикана од фрагменти од пресретнати проектили“, додаде тој.
Според израелските медицински служби, во нападот биле ранети 40 лица.
Свет
Нетанјаху: Ова е можност за иранскиот народ да се спротивстави на режимот

Израелскиот премиер Бенјамин Нетанјаху вечерва и порача на јавноста дека можат да ги напуштат засолништата, откако новиот бран ирански ракети прелета над израелска територија.
„Иранскиот режим никогаш не бил послаб. Ова е можност за иранскиот народ да се спротивстави на режимот“, рече Нетанјаху во вечерашното обраќање.
Тој директно им се обрати и на граѓаните на Иран: „Јас сум со вас, израелскиот народ е со вас“, рече тој.
Министерот за одбрана на Израел, Израел Кац изјави дека Иран „ја преминал црвената линија со лансирање ракети кон израелските цивилни области“ и најави: „Техеран ќе плати висока цена“.
Оваа иранска одмазда следеше по израелските воздушни напади на иранска територија, при што беа погодени нуклеарни постројки и беа убиени високи команданти и научници.