Свет
Врховниот лидер на Иран: Злото што го изврши Израел не треба ниту да се минимизира ниту да се преувеличува
Иранските официјални лица треба да одлучат како да му ја покажат моќта на Иран на Израел по израелскиот напад врз Иран пред две ноќи, изјави утринава врховниот лидер на земјата Али Хамнеи, пренесува иранската официјална новинска агенција ИРНА.
„Злото што го изврши ционистичкиот режим (Израел) пред две ноќи не треба ниту да се минимизира ниту да се преувеличува“, рече Хамнеи, пренесе ИРНА.
Иран го минимизираше израелскиот воздушен напад врз ирански воени цели вчера, велејќи дека предизвикал само ограничена штета, додека американскиот претседател Џо Бајден повика на прекин на ескалацијата што предизвика страв од сеопфатен пожар на Блискиот Исток.
Бројни израелски авиони извршија три бранови напади врз ракетни фабрики и други места во близина на Техеран и во западен Иран, објави израелската армија.
Иранскиот парламент денеска одржува состанок зад затворени врати за да разговара за одговорот на нападот. Според извештаите на иранските медиуми, претседателот на парламентот и поранешен генерал на Корпусот на гардата на Исламската револуција, Мохамад Багер Галибаф претседава со дискусиите.
Иранскиот парламент има ограничено влијание, а вистинската моќ е на државното раководство предводено од врховниот лидер Али Хамнеи. Сепак, по овогодинешните избори, мнозинството конзервативци доминираат во парламентот, што веројатно ќе влијае на расположението кај радикалните крила на војската.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Илон Маск: Вистинската закана за демократијата се оние кои го обвинуваат Трамп за истото
Американскиот милијардер Илон Маск изјави дека вистинската закана за демократијата ја претставуваат оние кои за такво нешто го обвинуваат поранешниот американски претседател и републикански кандидат на претстојните избори, Доналд Трамп.
Маск одговараше на прашања на учесниците на предизборниот митинг за поддршка на Трамп во сојузната држава Пенсилванија. Маск јавно ја поддржа кандидатурата на Трамп и донираше 75 милиони долари за неговата кампања.
Потсетувајќи го на немирите во американскиот Конгрес на 6 јануари 2021 година, еден од учесниците на состанокот го праша Маск што мисли за реториката на некои демократи и аналитичари дека американската демократија ќе биде во опасност доколку Трамп повторно се врати.
Маск рече дека вистинската закана за демократијата се оние кои велат дека изборот на Трамп е закана за демократијата.
„За време на тие настани Трамп се јави и бараше ненасилство и мирни протести“, го бранеше Маск.
Свет
Израелскиот министер за одбрана по нападот врз Иран: Се отвораат нови стратешки можности
Израелскиот министер за одбрана Јоав Галант го информираше својот американски колега Лојд Остин за израелскиот напад врз Иран, кој во соопштението за печатот го опиша како „успешен“.
Во соопштението, канцеларијата на Галант соопшти дека двајцата зборувале за прецизните напади врз производствени капацитети за ракети, ракети земја-воздух и иранските воздушни способности.
Израелскиот министер му се заблагодари на Остин за непоколебливата поддршка на САД за одбраната на Израел од иранската агресија.
Тие, исто така, разговарале за стратешките можности што се појавиле како резултат на оперативните достигнувања, како во северните така и во јужните области, се вели во соопштението, осврнувајќи се на конфликтите во Либан и Газа.
Свет
Трамп: Америка ќе влезе во нова светска војна доколку победи Камала Харис
Поранешниот американски претседател и претседателски кандидат на Републиканската партија на претстојните избори во Соединетите Американски Држави, Доналд Трамп изјави дека актуелниот американски потпретседател и неговата ривалка од Демократската партија, Камала Харис, ќе ги воведат САД во нова светска војна доколку таа победува на изборите на 5 ноември, пренесува агенцијата „Анадолија“.
Во рамки на предизборната кампања, Трамп синоќа зборуваше на митинг во државата Пенсилванија. Трамп ја оцени неговата ривалка Харис како недоволно способна да се справи со лидерите како рускиот претседател Владимир Путин и кинескиот лидер Си Џинпинг на политичката сцена.
Посочувајќи дека светот никогаш не бил толку блиску до глобална војна, Трамп вети дека оваа војна нема да се случи доколку тој повторно стане претседател на САД.
„Да се стави Камала Харис за претседател значи да се коцка со животите на милиони луѓе. Харис дефинитивно ќе не одведе во Трета светска војна бидејќи е премногу неспособна за да си ја врши работата правилно“, рече Трамп.