Свет
Газа ја напуштија 335 странски државјани и 76 тешко повредени

Најмалку 335 сопственици на странски пасоши и 76 ранети жители на Газа денеска ја напуштија палестинската енклава преку преминот Рафах и влегоа во Египет, и се првата група која има корист од договорот постигнат со посредство на Катар, јавуваат странските агенции.
Според договорот постигнат меѓу Египет, Израел и Хамас, 81 ранет и околу 500 лица со странски пасоши, колку што се наведени, се очекува да можат да го напуштат Појасот Газа во наредните денови, соопштија извори од повеќе земји.
Дипломатски извор запознаен со плановите на Египет изјави за Ројтерс дека приближно 7.500 сопственици на странски пасоши ќе бидат евакуирани од Газа во наредниот период од приближно две недели. Истиот извор, исто така, рече дека луѓето од Газа ќе бидат евакуирани преку аеродромот Ал Ариш, кој ќе биде достапен за нивно полетување.
Дипломатите рекоа дека се очекува првите евакуирани странски државјани прво да отпатуваат за Каиро по пат, а потоа да го продолжат патувањето оттаму со авион. Ограничените евакуации уследија по повеќе од три недели од израелската целосна блокада на Газа и израелското бомбардирање на густо населената енклава и испраќањето копнени трупи како одмазда за нападот на милитантите на Хамас врз Израел на 7 октомври.
Палестински функционер, кој се наоѓа на страната на границата во Газа, рече дека странските сопственици на пасоши ја напуштиле територијата со шест автобуси. Египетски извор изјави дека сите тие ќе мора да поминат безбедносни проверки веднаш штом ќе пристигнат во Египет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Полска ја затвора вратата; „Не им верувајте на Путин и Лукашенко, тие ве лажат“

Полскиот премиер Доналд Туск денеска најави „информативна кампања“ во седумте земји од кои доаѓаат повеќето мигранти за да ги спречат да влезат во Полска преку Белорусија.
Поради оваа миграција, која, по Варшава, беше оркестрирана од Минск и Москва, на крајот на март, Полска го ограничи правото на азил на странците по пристигнувањето на границата со Белорусија.
Туск исто така рече дека „илјадници војници, граничари и полицајци, камери и дронови го следат секој метар од границата 24 часа на ден“.
Туск не прецизираше во кои земји ќе се одвива „информативната кампања“ што ја најави.
Најголем дел од мигрантите кои сакаат да влезат во Полска се од Блискиот Исток и Африка.
„Нашата порака ќе биде едноставна: полската граница е затворена! Не им верувајте на шверцерите, не верувајте му на белорускиот претседател Лукашенко, не му верувајте на Путин! Ве лажат кога велат дека ова е патот до Европа. Тоа не е точно! рече Туск.
Според полските граничари, повеќе од 30.000 луѓе се обиделе илегално да ја преминат границата со Белорусија во 2024 година.
Полска постави метална гранична ограда висока пет метри со софистицирани уреди за надзор и распореди илјадници војници по неа.
Регион
Младо момче пропадна низ отвор на лифт во Сараево

На Природно-математичкиот факултет во Сараево денеска млад човек паднал низ отворот од лифтот, пренесува Radiosarajevo.ba.
„Денеска во 13 часот и 44 минути пријавена е оваа несреќа. Млад човек се обидел да излезе од лифтот и паднал низ отворот“, изјавиле од противпожарната бригада на Сараево.
Пожарникарите за две до три минути биле на местото на несреќата и го ослободиле, а момчето било при свест.
Откако пожарникарите го извлекле младиот човек, брзата помош дошла да го пренесе во болница.
Не е познато според написите, дали младиот човек е потешко повреден.
Свет
Хотелите во Британија сo заканa дека ќе избркаат стотици баратели на азил

Хотели во Велика Британија се закануваат со бркање на стотици баратели на азил откако не ја добиле договорената исплата од сместувачката компанија „Stay Belvedere Hotels“ (SBHL), објавија британските медиуми.
Хотелите, претежно во лондонската област, најавија дека минатиот месец требало да добијат исплати од СБХЛ за сместување на баратели на азил, објави британски „Телеграф“.
Британското Министерство за внатрешни работи минатиот месец го отповика договорот на SBHL поради наводни неправилности.
Се проценува дека моментално има околу 38.000 баратели на азил сместени во хотели во Велика Британија.
Британското Министерство за внатрешни работи одвојува 5,5 милиони фунти дневно за нивно сместување, пренесува Танјуг.