Свет
Гебрејсус предупредува дека светот може да се соочи со поопасен вид коронавирус
Говорејќи на 138-та седница на Меѓународниот олимписки комитет, генералниот директор на СЗО, Тедрос Аданом Гебрејсус, предупреди дека може да се појави нов вид коронавирус во светот, што ќе биде дури и поопасен од варијантата делта.
„Колку поголемо пренесување, толку повеќе варијанти ќе се појават со потенцијал да бидат дури и поопасни од варијантата делта што пустоши сега. И колку повеќе варијанти, толку е поголема веројатноста дека една од нив ќе избегне вакцини и ќе нè врати на почеток“, вели тој.
Гебрејсус ја смета пандемијата на Ковид-19 за тест со кој глобалната заедница не успева да се справи и ова може да доведе до понатамошно ширење на заразата во светот.
„Често ме прашуваат кога ќе заврши оваа пандемија? Пандемијата на Ковид-19 ни постави многу прашања за нас самите и за нашиот свет. Таа е тест. И светот паѓа на тој тест“, посочи тој.
„Дури го кажувам ова, повеќе од 100 луѓе ќе ги загубат своите животи од Ковид-19. И додека олимпискиот оган биде изгаснат на 8 август, повеќе од 100 илјади луѓе ќе починат“, продолжи тој.
Гебрејсус е сигурен дека недостигот од вистинска посветеност кај политичарите е причината што светот сè уште не е во можност да се справи со пандемијата и покрај тоа што ги има сите потребни инструменти.
„Особено владите на земјите од Г20 мора да покажат лидерство за да обезбедат итно зголемување и распоредување на алатките потребни за спасување животи“, рече тој.
„Ако одлучат, водечките светски економии би можеле да ја стават пандемијата под контрола на глобално ниво за неколку месеци со споделување вакцини преку ‘Ковакс’, финансирање на АКТ-акцелераторот и стимулирање на производителите да сторат сѐ што е потребно за да се зголеми производството“, посочи шефот на СЗО.
Во својот говор тој посочи дека главната цел на СЗО во борбата против Ковид-19 е да се вакцинираат 70 отсто од населението во секоја земја во светот до септември 2022 година, но за да се постигне ова, ќе бидат потребни 11 милијарди дози вакцини.
Ризикот од нови видови коронавирус, кои ќе станат поопасни и позаразни, претходно беше нагласен и од Комитетот за итни случаи на СЗО, кој посочи дека ќе биде потешко тие да се контролираат и дека патогенот продолжува да мутира.
Неодамна беше известено за постоење делта-плус варијанта.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Најголемата компанија за вода во САД погодена од сајбер напад
Најголемата компанија за вода во САД, American Water, денеска откри дека неодамна била погодена од сајбер напад и дека поради тоа го затворила својот портал за услуги на клиентите.
Компанијата со седиште во Камден, Њу Џерси, на својата веб-страница соопшти дека минатиот четврток станала свесна за „неовластена активност во нејзините компјутерски мрежи и системи“, за која утврдила дека е „резултат на инцидент со сајбер безбедноста“, објави CNN (CNBC).
Компанијата, исто така, рече дека нема да наплатува никакви задоцнети такси или други такси додека системот не работи.
Свет
Пет земји ќе добијат повеќе од една милијарда евра помош од ЕУ за санација на последиците од поплавите
Европскиот парламент (ЕП) денеска одобри помош во износ од над една милијарда евра за санација на последиците од катастрофалните поплави што ги погодија Италија, Словенија, Австрија, Грција и Франција во 2023 година.
Средствата се доделени од Фондот за солидарност на ЕУ, а пакетот помош е одобрен со 632 гласа „за“, седум гласа против и три воздржани, се наведува на веб-страницата на ЕП.
Европратениците велат дека помошта од ЕУ треба да се прошири со оглед на зголемениот број природни катастрофи во Европа.
Свет
Орбан: Ако победи Трамп, ќе отворам неколку шишиња шампањ
Унгарскиот премиер Виктор Орбан изјави дека ќе отвори „неколку шишиња шампањ“ доколку Доналд Трамп се врати во Белата куќа.
Орбан треба да биде домаќин на колегите лидери на ЕУ на самитот во Будимпешта неколку дена по претседателските избори во САД на 5 ноември.
„Ќе отвориме неколку шишиња шампањ ако Трамп се врати“, рече Орбан, опишувајќи го самитот на ЕУ во ноември како момент за „блокот да се собере за да се обиде да најде заеднички глас“.
Орбан рече дека Трамп, доколку биде избран за претседател, нема да чека до неговата инаугурација, туку веднаш ќе дејствува „за да се воспостави мир“ меѓу Украина и Русија „за како европски лидери да немаме што да изгубиме“.
„Прво треба да реагираме интелектуално, филозофски, а потоа и стратешки“, рече тој.
Трамп постојано тврдеше дека може да донесе мир во Украина „многу брзо“, без да понуди никакви детали за тоа како би можело да се постигне трајно решение.
Ставовите на Орбан за руската инвазија многу ги отсликуваат ставовите на Трамп, кој беше обвинет од потпретседателката на САД и кандидат за претседател на Демократската партија Камала Харис дека ги повторува идеите на Владимир Путин, пишува Гардијан.