Свет
Генералниот секретар на НАТО, Столтенберг, во ненајавена посета на Украина

Генералниот секретар на НАТО, Јенс Столтенберг, денеска ненајавено отпатува во куса посета на Украина, пренесува „Дојче веле“.
„Генералниот секретар на НАТО беше во Украина. Ќе објавиме повеќе информации што е можно побргу“, изјави претставникот на НАТО.
„Посетата на Столтенберг на Украина е последната фаза од подготовките за состанокот во Рамштајн во Германија, каде што ќе се разговара за мерките за воена поддршка за Украина пред очекуваната контраофанзива на украинската армија“, рече тој.
Претходно утринава, украинскиот информативен портал „Страна“ ја најави посетата на Столтенберг на Киев, без да даде некакви детали, но објави фотографија од генералниот секретар на НАТО со украинските воени претставници.
Според фотографот на „Ројтерс“, пак, Столтенберг им оддал почит на украинските војници, кои загинаа во војната и ја прегледал оштетената руска воена опрема изложена на централниот плоштад во Киев.
Ова е прва посета на Столтенберг на Киев од почетокот на руската инвазија на земјата во знак на поддршка за Украина. Тој утре ќе присуствува на состанокот на контакт-групата за одбрана на Украина во воздухопловната база Рамштајн, Германија, каде што отпатува по кусата посета на Киев.
Освен важната симболика на посетата, точната причина за посетата на Столтенберг останува нејасна.
Ненајавените посети на претставници на НАТО во земјите во кои во тек се активни воени дејства се вообичаена практика.
За време на дведецениската војна во Авганистан, НАТО никогаш однапред не најави посети на своите генерални секретари на земјата, а објавуваше информации за нивните посети откога тие ќе завршат или се пред завршување.
НАТО нема официјално присуство во Украина. Како сојуз од 31 земја, алијансата обезбедува само несмртоносна поддршка – генератори, медицинска опрема, шатори, воени униформи и други материјали – за владата во Киев.
НАТО вети дека ќе ја поддржи Украина во нејзината одбрана од руската агресија. Столтенберг го покани украинскиот претседател Володимир Зеленски да учествува на самитот на НАТО во јули.
Киев направи обид да се приклучи на алијансата – можност што се смета за една од главните причини за руската инвазија – откако Москва анектира четири региони на Украина под делумна руска окупација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Русија ја осудува острата ескалација на тензиите меѓу Израел и Иран

„Русија е загрижена и ја осудува острата ескалација на тензиите“, изјави портпаролот на Кремљ, Дмитриј Песков, пренесува руски „Интерфакс“.
Тој изјави дека рускиот претседател Владимир Путин добива онлајн-извештаи за настаните што се случуваат меѓу Израел и Иран.
„Претседателот Путин добива извештаи во реално време од руското Министерство за одбрана, Службата за надворешно разузнавање и од Министерството за надворешни работи за настаните во регионот“, рече Песков.
Според него, руското Министерство за надворешни работи, по наредба на претседателот на Русија, набргу ќе издаде детаљно соопштение за ситуацијата меѓу Израел и Иран, „кое потоа ќе биде дистрибуирано до Обединетите нации“.
Свет
Израел ги скри патничките авиони на тајна локација надвор од земјата

Израелските авиокомпании „Ел Ал“, „Аркија“ и „Исраир“ ги преместија своите авиони надвор од земјата на непозната локација како подготовка за можен ирански напад врз аеродромот „Бен Гурион“, јавува дописникот на „Скај њуз“ од Блискиот Исток.
Авионите беа транспортирани без патници како дел од однапред подготвени безбедносни протоколи во случај на понатамошна ескалација и напади врз клучна инфраструктура.
Ноќеска, Израел изврши голем воздушен напад врз повеќе цели во Иран. Според израелски воени извори, погодени се објекти поврзани со нуклеарната програма на Иран и воени локации, вклучувајќи го и клучниот комплекс за збогатување ураниум во Натанц.
Свет
Германија ја зајакнува заштитата на еврејските и израелските институции по нападот врз Иран

Германскиот канцелар Фридрих Мерц изјави дека Израел има право да го брани своето постоење, а по израелските напади врз Иран, наредил зголемена заштита на еврејските и израелските објекти во Германија.
Утрово телефонски разговараше со израелскиот премиер Бенјамин Нетанјаху и свика состанок на кабинетот за безбедност во Берлин, објави германската влада.
Мерц нагласи дека целта останува да се спречи Иран да развива нуклеарно оружје и го обвини Техеран дека продолжува да ги крши своите обврски од Договорот за неширење на нуклеарно оружје и дека претставува сериозна закана за регионот, особено за Израел.
Тој ги повика двете страни да се воздржат од потези што би можеле дополнително да го ескалираат конфликтот и да го дестабилизираат Блискиот Исток.
Синоќа Израел изврши воздушен напад врз повеќе цели во Иран како дел од операцијата „Стоечки лав“. Според израелски воени извори, погодени се објекти поврзани со нуклеарната програма на Иран и воени локации, вклучувајќи го и клучниот комплекс за збогатување на ураниум во Натанц. МААЕ потврди дека Натанц е меѓу нападнатите локации и е во контакт со иранските власти за следење на нивото на зрачење.
Израелскиот премиер Бенјамин Нетанјаху изјави дека целта на операцијата е да се „неутрализира егзистенцијална закана“, истакнувајќи дека Иран со години развива нуклеарни капацитети и отворено се заканува дека ќе го уништи Израел. Иран го затвори својот воздушен простор, а израелската војска го подигна нивото на тревога за можен одговор, вклучително и лансирање беспилотни летала и ракети од Иран и територии контролирани од проирански групи.