Свет
Германија бара европска интервенција на турско-сириската граница

Германската министерка за одбрана, Анегриет Крамп-Каренбауер, смета дека европските земји треба да испратат борбени сили во меѓународната безбедносна зона на границата меѓу Сирија и Турција, но не може да гарантира дека ќе учествуваат и германските трупи, пренесува „Брејтбарт“.
Предлогот следува откако турските трупи и сојузничките сириски борци го нападнаа северниот дел на Сирија кога американскиот претседател, Доналд Трамп, ги повлече американските трупи што соработуваа со сириските Курди против Исламската држава.
Крамп-Каренбауер во вторникот изјави за ДПА дека создавањето меѓународно контролирана безбедносна зона со вклучување на Турција и Русија ќе има цел да ја деескалира ситуацијата во северна Сирија.
Таа рече дека е надвор од нејзините надлежности да вети германски трупи и германскиот парламент е тој што ќе треба да одлучи дали би можеле да учествуваат во таква зона. Таа исто така за „Дојче веле“ изјави дека канцеларката Ангела Меркел е информирана за предлогот.
Бундестагот мора да ги одобри странските распоредувања на германската војска. Германската влада смета дека упадот на Турција во Сирија претставува кршење на меѓународното право, но досега ограничи само одреден воен извоз во Турција заедно со други држави, вклучувајќи ги Шпанија, Шведска, Велика Британија и Канада.
„Не веруваме дека нападот врз курдските единици или курдската милиција е легитимен според меѓународните закони. Ако во меѓународното право не постои основа за таква инвазија, тогаш не може да биде во согласност со меѓународното право“, изјави во неделата министерот за надворешни работи, Хајко Мас, за АФП.
Предлогот на Крамп-Карнбауер може да ги зголеми тензиите во владејачката коалиција на Меркел бидејќи социјалдемократите отфрлаат каква било директна германска воена вмешаност во Сирија. Крамп-Каренбауер ја бранеше својата идеја велејќи дека не може повеќе да ги слуша германските политичари, кои велат дека се загрижени за насилството во Сирија без да дејствуваат.
Едно нешто што е сигурно е дека САД нема да пристапат кон ниту една воена безбедносна зона. Минатата среда Трамп рече дека конфликтот помеѓу Турција и Сирија е само меѓу две блискоисточни земји.
„Тие имаат проблем на границата, тоа не е наша граница“, рече претседателот. „Ако Сирија сака да се бори за својата земја, тоа зависи од Турција и Сирија. Сирија може да има некаква помош од Русија и тоа е добро. Таму имаат многу песок, значи има многу песок со кој може да си играат“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Завршени обдукциите на четворицата државјани на Малта кои загинаа во сообраќајна несреќа во Хрватска

Давењето е најверојатната причина за смртта на двата брачни пара од Малта кои загинаа минатиот четврток во тешка сообраќајна несреќа во Буница кај Сењ, Хрватска, кога нивниот автомобил излеѕа од Јадранската магистрала во морето.
Ова го открија прелиминарните резултати од обдукцијата спроведена во Риечкиот институт за судска медицина и криминалистика, пишува риечкиот портал Бурин.
Иако лабораториските тестови сè уште се во тек, давењето се смета за најверојатна причина за смртта. Починатиот Џереми Гамбин (68), неговата сопруга Лорејн (67), Кевин Боничи (67) и неговата сопруга Александра (66) претрпеле само полесни повреди кои не можат да се поврзат со смртта.
Се верува дека сите носеле безбедносни појаси кога нивниот „ленд ровер дискавери“ излетал клисурата, а потоа и во морето.
Веднаш по несреќата, се сомневаше дека на возачот му се слошило, поради што ја изгубил контролата врз возилото на малата кривина. Сепак, обдукцијата не ја потврдила оваа шпекулација, објавија хрватските медиуми.
Утврдено е дека сите жртви имале здрави срца, без претходни срцеви удари или други здравствени проблеми што би можеле да ја предизвикаат несреќата.
Останува нејасно зошто возачот, за кој се верува дека е Кевин Боничи, ја изгубил контролата врз возилото. Тој бил пронајден во скутот на патникот Џереми Гамбино, додека нивните сопруги биле на задното седиште.
Трагедијата покрена голем број прашања, првенствено зошто патниците не можеле да излезат од автомобилот, кој потонал на длабочина од 11 до 12 метри.
Никој од нив не претрпел повреди што би предизвикале губење на свеста, но вратите од смачканото возило не можеле да се отворат.
Автомобилот, кој мажот од Малта го изнајмил на аеродромот во Загреб, бил извлечен од морето минатиот петок. Нуркачи и камион за влечење учествувале во операцијата.
Полицискиот службеник Јасмин Мујаковиќ, кој прв пристигнал на местото на настанот, скокнал во морето и нуркал неколку пати, но безуспешно се обидел да ја отвори вратата. Телото на една жена исплутало од возилото, додека другите три жртви биле пронајдени во автомобилот.
фото: принтскрин
Свет
Преговарачот на Хамас потврди: Со Израел разменети списоци на затвореници и заложници

Висок функционер на Хамас, Тахер Ал-Нуну, денес изјави дека преговарачите од неговата организација и Израел размениле списоци на затвореници и заложници кои би биле ослободени доколку се постигне договор за време на тековните преговори за прекин на огнот во Газа што се одржуваат во Египет.
Ал-Нуну, исто така, рече дека Хамас изразил оптимизам за постигнување договор, наведувајќи дека групата покажала потребна позитивност, објавува Ројтерс.
Порано денес, египетскиот министер за надворешни работи, Бадр Абдел Аати, зборуваше и потврди дека разговорите меѓу делегациите на Хамас и Израел се одржуваат во Шарм ел Шеик. Тој рече дека арапските земји ќе ги поддржат мировните договори со Израел доколку конфликтот заврши, објави агенцијата Ал Арабија претходно денес.
Шефот на египетската дипломатија потсети дека американскиот план предвидува крај на војната, отфрлање на анексијата и раселувањето, заедно со потребата од заеднички меѓународни напори за безбедно враќање на израелските сили од Појасот Газа.
Фото: принтскрин
Свет
Грета Тунберг: Израелците ставија 60 луѓе во кафези и рекоа дека ќе нè убијат со гас

Шведската активистка Грета Тунберг изјави дека нејзе и на другите притворени активисти од флотилата за Газа им бил одбиен пристап до чиста вода додека биле во израелски притвор и дека како резултат на тоа се разболеле.
Тунберг беше меѓу деветте шведски активистки приведени минатата недела откако Глобалната флотила Сумуд, која се обидуваше да достави хуманитарна помош во Појасот Газа, беше пресретната од израелската војска.
Приведените активисти се вратија во Шведска. Зборувајќи на прес-конференцијата одржана на плоштадот Сергелс Торг во Стокхолм со други активисти, Тунберг нагласи: „Им кажавме на луѓето што дојдоа од шведскиот конзулат дека немавме пристап до чиста вода за пиење за време на нашиот притвор, бидејќи водата беше контаминирана и се разболевме“.
Наведувајќи дека побарале помош од конзуларните службеници бидејќи водата од чешма била валкана, таа додаде: „Тие (Израелците) фрлаа шишиња полни со вода за пиење пред нас и ни се смееја што баравме чиста вода. Им рековме: ‘Нема да си одиме додека не добиеме пристап до чиста вода за пиење.’“
Тунберг истакна дека ги пријавиле своите поплаки кај шведските конзуларни службеници. „Кога конзуларните службеници си заминуваа по средбата со нас, им реков: ‘Кога ќе си одите, ќе нè претепаат, бидејќи никој нема да гледа.’ Шведските службеници сепак си заминаа“, рече таа.
Таа тврди дека биле подложени на физичка тортура. „Луѓето се онесвестија, а кога побаравме лекар и лекови, тие ставија 60 луѓе во мали кафези и ни рекоа дека ќе нè убија со гас“, рече таа.
Таа ја критикуваше шведската влада, како и другите влади, за нивната неактивност. „Да бидам искрена, навистина не знам што да кажам, бидејќи без разлика што ќе кажеме, се чини дека ништо нема да ги натера нашите влади да преземат мерки против Израел“, се пожали таа.
фото: принтскрин