Свет
Германија го одобри најдолгиот подводен железнички и сообраќаен тунел на светот преку Балтичкото Море

Највисокиот германски суд ја одобри изградбата на најдолгиот комбиниран железнички и сообраќаен тунел во светот преку Балтичко Море, што се очекува драстично да го намали времето на патување од Северна Германија до клучните острови на Данска и да обезбеди директна врска меѓу Хамбург и Копенхаген, објави данскиот весник „Берлингске“.
Данскиот министер за транспорт, Бени Енгелбрехт, ја поздрави одлуката како голем ден не само за данско-германските односи, туку и за Европа и за создавање зелени коридори за транспорт, нагласувајќи дека е отстранета последната блокада.
Подводниот тунел „Фемарн белт фиксд линк“, долг 18 километри, треба да биде отворен во 2029 година и ќе биде еден од најголемите инфраструктурни проекти во Европа, преминувајќи го Појасот Фемарн на Балтичко Море помеѓу пристаништата Путгарден во Германија и Родби на данскиот остров Лоланд. Проектот претходно беше опишан како корисен за целата ЕУ бидејќи ќе овозможи побрза размена на стоки и луѓе меѓу Скандинавија и континентална Европа.
Цената на тунелот со четири сообраќајни и две железнички ленти, кој се очекува да го намали патувањето на 10 минути од едночасовното возење со траект, е проценета на повеќе од 52 милијарди дански круни (над 8 милијарди долари).
God dag for dansk-tyske relationer og EUs grønne mål om at flytte gods fra vej til bane. God dag for Femern Bælt-forbindelsen. Med klar tilkendegivelse fra den tyske domstol er den sidste hindring for arbejde på den tyske side ryddet af vejen#dktrm #dkpolhttps://t.co/uUSOMFSaZF
— Benny Engelbrecht (@BennyEngelbrech) November 3, 2020
Тоа ќе го плати Данска заедно со финансирањето од ЕУ, која покажа голем интерес за проектот. Сепак, изградбата се соочи со строго противење, па дури и со правни битки, од конзерваторите и фериботите кои се соочуваат со драстично намалена трговија.
Затоа, извршниот директор на проектот, Клаус Баункјаер, го опиша неодамнешното регулаторно одобрување како „историска пресвртница“. Данска го одобри проектот уште во 2015 година.
Додека Данска веќе ги започна градежните работи од своја страна, германската страна заостануваше, блокирана од правниот лавиринт. Еколозите изразија загриженост во врска со влијанието врз животната средина и животинскиот свет. Додека Федералниот административен суд во Лајпциг ги отфрли нивните аргументи, Европскиот суд на правдата со седиште во Луксембург сè уште разгледува други жалби поврзани со проектот.
За разлика од другите подводни тунели, како што е тунелот под Ла Манш, тунелот Германија-Данска нема да лежи под морското дно, туку ќе користи шупливи бетонски делови што ќе бидат потопени и сместени во канал ископан на дното на Балтичко Море. На својата најдлабока точка, автопатот во тунелот „Фемарн“ ќе биде 39 метри под нивото на морето.
Идејата за постојана балтичка врска преку Појасот Фемарн првпат се појави пред речиси 30 години. Првичниот проект беше мост, како осум километарскиот мост „Ересунд“ меѓу Копенхаген и Малме, кој ги поврза провинциите Зеланд во Данска и Скане во Шведска во еден огромен регион Ересунд.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израел со одговор на Британија: Промената на ставот го наградува Хамас и им штети на мировните напори

Министерството за надворешни работи на Израел реагираше на најавата на Велика Британија дека ќе ја признае Палестина доколку Израел не преземе конкретни чекори кон прекин на конфликтот во Газа и обновување на мировниот процес што води кон решение за две држави.
„Промената на ставот на британската влада во овој момент, по францускиот потег и внатрешниот политички притисок, претставува награда за Хамас и им штети на напорите за постигнување прекин на огнот во Газа и рамка за ослободување на заложниците“, се вели во соопштението на израелското Министерство за надворешни работи на X.
Британскиот премиер Кир Стармер го објави потенцијалниот потег неколку дена откако францускиот претседател Емануел Макрон изјави дека Париз ќе ја признае палестинската држава на Генералното собрание на Обединетите нации во септември.
Во официјалното соопштение од Даунинг стрит се наведува дека признавањето на Палестина е „неотуѓиво право на палестинскиот народ“ и дека ставот на британската влада отсекогаш бил дека признавањето ќе биде дел од поширокиот мировен процес, според медиумите.
Сепак, се наведува дека поради „сè понеподносливата ситуација во Газа и намалената надеж за мировен процес“, сегашниот контекст бара порешителна акција.
Стармер истакна дека признавањето ќе следи ако израелската влада не се согласи на итен и траен прекин на огнот, јасна посветеност на мировен процес што води кон решение за две држави и недвосмислена посветеност дека нема да има анексија на територија на Западниот Брег.
Тој, исто така, повтори дека „нема еквивалентност меѓу Израел и Хамас“ и дека барањата на Велика Британија кон Хамас остануваат: ослободување на сите заложници, прифаќање на прекин на огнот, откажување од каква било политичка улога во идното управување со Газа и целосно разоружување.
Фото: принтскрин
Свет
Велика Британија: Ќе ја признаеме Палестина во септември ако Израел не се согласи со нашите услови

Велика Британија ќе признае палестинска држава во септември ако Израел не се согласи на прекин на огнот во Газа, не дозволи помош од ОН и не преземе други чекори кон долгорочен мир, објави британскиот премиер Кир Стармер, според светските медиуми.
Стармер свика редок летен состанок на кабинетот за да се разговара за ситуацијата во Газа.
Тој им рече дека Велика Британија ќе ја признае државата Палестина пред Генералното собрание на Обединетите нации, „освен ако израелската влада не преземе значајни чекори за да ја заврши ужасната ситуација во Газа, не постигне прекин на огнот, не вети дека нема да има анексија на Западниот Брег и не се обврзе на долгорочен мировен процес што ќе обезбеди решение за две држави“.
Тој исто така рече дека Хамас мора да ги ослободи сите заложници што ги држи, да се согласи на прекин на огнот, „да прифати дека нема да игра никаква улога во владата на Газа и да се обврзе на разоружување“. Во телевизиска изјава, Стармер рече дека неговата влада ќе го процени „степенот до кој страните ги исполниле овие чекори“ во септември пред да донесе конечна одлука за признавање.
Велика Британија долго време ја поддржува идејата за постоење на независна палестинска држава покрај Израел, но верува дека признавањето треба да дојде како дел од договореното решение за конфликтот.
Притисокот за формално признавање на палестинската државност се зголеми откако францускиот претседател Емануел Макрон објави дека неговата земја ќе стане првата голема западна сила што ќе признае палестинска држава.
Повеќе од 250 од вкупно 650 пратеници во Долниот дом потпишаа писмо со кое ја повикуваат британската влада да признае палестинска држава. Стармер истакна дека и покрај условите што ги поставил, Велика Британија верува дека „државноста е неотуѓиво право на палестинскиот народ“, пренесуваат агенциите.
Фото: принтскрин
Регион
Млад човек се удави во Улцињ: трагедија во Црна Гора

Млад човек се удави во Улцињ денеска, во попладневните часови, јавуваат медиумите во регионот.
Според написите, давењето се случило на „Големата плажа“.
Засега нема информации за идентитетот на загинатиот.
Според последните извештаи било подигнато црвено знаме бидејќи имало големи бранови во морето.