Американскиот претседател Доналд Трамп потврди дека унгарскиот премиер Виктор Орбан побарал изземање од новите американски санкции насочени кон рускиот нафтен сектор, но дека тоа барање било одбиено, пренесе Индекс повикувајќи се на изјавата на Трамп во авионот „Ер форс уан“.

„Премиерот побара изземање. Не го одобривме, но тој е мој пријател“, изјави Трамп.

Санкциите, насочени кон руските компании „Роснефт“ и „Лукоил“, предвидуваат и секундарни мерки за нивните странски купувачи, меѓу кои се Индија, Кина и дел од земјите од Централна Европа.

Орбан, кој следната недела ќе го посети Вашингтон на својот прв билатерален состанок со Трамп по неговото враќање на власт, претходно изјави дека ќе побара изземање бидејќи, како што рече, замената на руската нафта би предизвикала економска криза во Унгарија.

И покрај војната, Орбан продолжи да одржува блиски односи со Москва, оценувајќи дека и САД и Русија сакаат крај на конфликтот, но дека Украина и Европската унија го попречуваат мирот.

Украинскиот претседател Володимир Зеленски изјави дека Русија распоредила околу 170.000 војници во источната украинска област Доњецк, каде што се обидува да го заземе градот Покровск, пренесе „АП њуз“.

„Ситуацијата во Покровск е тешка“, рече Зеленски, додавајќи дека иако некои руски единици навлегле во градот, украинските сили ги уништуваат.

„Во Покровск има Руси. Тие се уништуваат, постепено се уништуваат, бидејќи мораме да го зачуваме нашиот персонал,“ изјави тој.

Рускиот претседател Владимир Путин неодамна тврдеше дека руската војска напредува, иако со големи човечки и материјални загуби.

Зеленски нагласи дека Украина возвраќа со напади врз цели во Русија за да ја наруши нејзината воена логистика. Шефот на украинската служба за безбедност Васил Малјук изјави дека од почетокот на годината Украина извела повеќе од 160 удари врз руски постројки за нафта, што, според него, предизвикало пад на домашното производство за 20 отсто.

Во меѓувреме, руските беспилотни летала погодиле станбени згради во Суми, при што биле повредени 11 лица, меѓу кои четири деца, и инфраструктура во областа Одеса.

Според Обединетите нации, бројот на цивилни жртви во Украина годинава е зголемен за 30 проценти во однос на 2024 година. Хуманитарниот координатор на ОН во Украина, Матијас Шмале, предупреди дека уништувањето на енергетските постројки на почетокот на студената сезона е „облик на терор“ и дека конфликтот „воопшто не изгледа дека ќе заврши наскоро“.

Потпретседателот на САД, Џеј Ди Венс се најде во центарот на вниманието по настанот на конзервативната организација Turning Point USA на Универзитетот во Мисисипи. Видеото на кое тој ја прегрнува Ерика Кирк, вдовицата на основачот на организацијата Чарли Кирк, стана вирално и предизвика лавина коментари за природата на нивната врска.

Во видео кое брзо стана вирално на социјалните мрежи, се гледа Ерика Кирк, сега извршен директор на организацијата, како го пречекува Ванс на сцената. За време на прегратката, таа ја поминува раката низ неговата коса додека тој ги држи рацете на нејзиниот струк. Токму оваа кратка, но интимна сцена предизвика бурни реакции, многу интернет корисници го оценија нивното однесување како несоодветно.

„Дали Џ.Д. ја изневерува Уша?“
Шпекулациите за можна афера веднаш се појавија на мрежата X (порано Твитер). „Изгледа дека Џ.Д. ја изневерува Уша?“ напиша еден корисник, алудирајќи на сопругата на Венс.

Многумина тврдеа дека прегратката не изгледала пријателски. „Сексуалната тензија е очигледна. Како жена, можам да кажам дека положбата на рацете значи само едно нешто“, напиша еден корисник. Друг додаде: „Имам многу машки пријатели, но никогаш не сум ја ставила раката низ нивната коса ниту пак сум ги терала да ме држат за половината. Никогаш“. Трет коментираше: „Едноставно не е нормално, дури е и непријатно за гледање“.

Покрај прегратките, вниманието на јавноста го привлече и облеката на Ерика Кирк. Некои корисници сметаа дека тесната црна кожна облека е несоодветна за вдовица која неодамна го загубила својот сопруг. „Ништо не покажува „тага“ како црните кожни панталони“, иронично забележа еден коментатор.

Други ги критикуваа конзервативците кои го поддржуваат Венс: „Како MAGA го поддржува ова? Не им е гајле за Уша затоа што е Индијка, но што е со Чарли? Неговата „вдовица“ се појавува во кожата на друг маж и се прегрнува неколку недели по неговата смрт. Толку за христијанските вредности“.

На истиот настан, одржан на 29 октомври, Џ.Д. Венс одговараше на прашања од студенти. Зборувајќи за религијата, тој ја нагласи важноста на христијанската вера како основа на американското општество.

Еден студент го праша за религијата на неговата сопруга Уша, која пораснала како хинду. Венс рече дека Уша била агностик кога се запознале и дека се надева дека таа на крајот ќе го прифати христијанството, но дека ја почитува нејзината слобода на избор. „Слободната волја е клучен христијански принцип“, рече тој. Уша Венс не присуствуваше на настанот.

Фото: принтскрин