Рускиот претседател Владимир Путин останува отворен за решавање на украинското прашање преку мировни преговори, изјави денеска Дмитриј Песков, портпарол на рускиот претседател Владимир Путин.

„Претседателот Путин останува отворен за решение за Украина преку мирни преговори. Ние имаме свои цели поврзани со нашата национална безбедност, нашите национални интереси. И ние сме подготвени да ги постигнеме овие цели преку мирни преговори“, изјави Песков за новинарите, пренесе РИА Новости.

Според него, руската специјална операција во Украина продолжува, бидејќи мора да се постигнат сите цели. Песков рече и дека унапредувањето на воената инфраструктура на НАТО кон Русија предизвикува загриженост во Москва и дека оваа позиција на Русија им е добро позната на сите, пренесува Танјуг.

Лидерот на германската Христијанско-демократска унија (ЦДУ), Фридрих Мерц, за кого се предвидува победа на претстојните избори, јасно најави дека ќе биде многу поактивен во европските прашања од неговиот претходник Олаф Шолц, што бриселски „Политико“ го оцени како најголем предизвик за Урсула фон дер Лајен како претседател на Европската комисија.

Подигнувањето на Мерц доаѓа во време кога американскиот претседател Доналд Трамп сигнализира дека Европа мора да преземе поголем дел од одговорноста за воената и економската помош за Украина, пишува бриселскиот портал, пренесува Танјуг.

Иако поголемата улога на Германија во ЕУ може да биде од корист за Фон дер Лајен, конфликтите меѓу Мерц и неа стануваат се поочигледни, пишува Политико.

Додека Фон дер Лајен се залага за зелени реформи, родова еднаквост и отворени внатрешни граници на ЕУ, Мерц поддржува дерегулација, ограничување на миграцијата и зајакнување на националните држави во однос на Брисел.

Нивните односи дополнително се оптоварени со долгогодишниот конфликт во ЦДУ, каде што Фон дер Лајен беше близок соработник и доверлив човек на поранешната германска канцеларка Ангела Меркел, додека Мерц беше нејзин противник со години.

Според Политико, се очекува дека нивниот однос ќе ги обликува идните политички трендови во ЕУ, особено во прашањата за фискалната политика, односите со Кина и миграцијата.

Девојката од Полска која тврдеше дека е Британката Медлин Мек Кен, утрово треба да се појави на суд, откако беше обвинета за следење, пишува Дејли Мејл.

Џулија Вандел (23) е обвинета по четири точки за следење откако завчера беше уапсена на аеродромот во Бристол.

Се верува дека таа ги демнела Кејт и Гери Мек Кен, родителите на исчезнатата Медлин, иако полицијата во Лестершир официјално не го потврдила тоа. Вандел е во притвор и денеска треба да се појави пред судии во Лестер.

Медлин Мек Кен од англискиот град Ротли исчезна на 3 мај 2007 година во португалското одморалиште Праја да Луз, каде што беше на одмор со своите родители. Тие ги оставиле тригодишната Медлин и нејзините помали браќа близнаци да спијат во станот, додека отишле на вечера со пријателите во близина.

Полицијата во Лестершир објави дека две од обвиненијата против неа се однесуваат на следење помеѓу 2 мај 2024 година и 15 февруари 2025 година. Третото обвинение опфаќа инциденти помеѓу 3 јануари 2024 година и 21 април 2024 година, додека четвртото се однесува на дела извршени помеѓу 27 ноември 2024 и 2 декември 2024 година.

Полицијата потврди и дека 60-годишната жена од Велс, која беше уапсена со Вандел на аеродромот во Бристол, е пуштена на слобода со полициска кауција. Двете жени беа уапсени под сомнение дека ги следеле Кејт и Гери Мек Кен, кои живеат во Лестершир.

Вандел беше уапсена откако пристигна во Бристол со лет на Рајанер од нејзиниот роден град Вроцлав во југозападна Полска. Двете жени биле однесени во притворската единица во Лестер на сослушување по нивното апсење. Се верува дека жените автоматски биле подложени на ДНК тест по апсењето, што е стандардна процедура во ОК за евидентирани злосторства.

Бидејќи следењето во ОК е евидентирано, нивните генетски податоци ќе бидат зачувани во националната полициска база на податоци за ДНК. Ова ќе и овозможи на полицијата конечно да ја потврди вистинитоста на тврдењата на Вандел дека таа би можела да биде Медлин, споредувајќи го нејзиниот примерок со примероци од исчезнатата Медлин или од нејзиното потесно семејство.

Исчезнувањето на Медлин Мек Кен е една од најголемите истраги за исчезнати лица во историјата, а нејзината судбина сè уште останува непозната. Британското Министерство за внатрешни работи минатата година потврди дека одобрило дополнителни 192.000 фунти (околу 224.000 евра) за истрагата на Скотланд Јард за исчезнувањето на Медлин.