Свет
„Голдман Сакс“: Цените на гасот во Европа може тројно да се зголемат зимава

Цените на европскиот гас би можеле речиси тројно да се зголемат зимава и да останат повисоки следното лето, предупредуваат од „Голдман Сакс“, што ќе ги шокира домаќинствата и ќе му овозможи на Владимир Путин да ја финансира својата војна во Украина, пренесува лондонски „Телеграф“.
Банкарскиот гигант „Голдман Сакс“ прогнозира дека големопродажните цени на гасот би можеле да се искачат до над 100 евра за мегават-час во втората половина од годината, што е речиси трипати повеќе од сегашната цена од речиси 36 евра.
Цените на гасот во Европа се намалија откога континентот излезе од зимата со резерви гас бидејќи складиштата беа повеќе од половина полни и блиску до рекордните нивоа за овој период од годината.
Сепак, од „Голдман Сакс“ очекуваат потрошувачката и побарувачката за течен природен гас (ЛНГ) во Европа и во другите делови во светот да се зголемат во втората половина од 2023 година поради што цените во просек ќе бидат над 90 евра за мегават-час.
Во порака до инвеститорите аналитичарите предупредија дека „дури и ако индустриската побарувачка остане забавена летово, тоа не е гаранција дека складирањето ќе биде олеснето во текот на зимата“ истакнувајќи дека капацитетот за складирање гас пред грејната сезона е ограничен.
Аналитичарите тврдат дека ниските цени на гасот на континентот во моментот ја намалија мотивацијата кај домаќинствата да ја намалат употребата на гас, што може да поттикне пораст на побарувачката.
Лондонски „Телеграф“ наведува и дека повисоките цени на гасот би ѝ дале поттик на Русија, која, според податоците на Европската Унија, обезбедила речиси една четвртина од увезениот гас во ЕУ од јануари 2022 година до ноември 2022 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Египетскиот претседател: Светот е сведок на историски момент

Светот е сведок на историски момент, напиша египетскиот претседател Абдел Фатах ал-Сиси, чија земја одигра клучна улога во посредувањето на разговорите.
Тој го опиша Шарм ел-Шеик, градот каде што се одржаа разговорите, како град на мирот и лулка на дијалогот.
„Овој договор не само што затвора едно поглавје од војната, тој, исто така, отвора врата на надеж за народите од регионот за иднина обележана со правда и стабилност“, рече Сиси.
Министерството за надворешни работи на Египет претходно го опиша прекинот на огнот како „позитивен развој“ и „пресвртница“ во војната.
Во соопштението се додава дека министерот за надворешни работи Бадр Абделати ќе отпатува во Париз за да присуствува на министерски состанок организиран од Франција, кој ќе се фокусира на ситуацијата во Газа.
Фото: ЕПА
Свет
Зеленски: Руските залихи на бензин се намалија за една петтина поради нашите напади

Украинските напади на долг дострел врз руските енергетски објекти можеби го намалија снабдувањето со бензин на Русија за околу една петтина, изјави украинскиот претседател Володимир Зеленски, додека двете страни ги засилија нападите врз енергетската инфраструктура.
„Ројтерс“ процени во август дека украинските напади го намалија руското рафинирање на нафта за речиси една петтина во одредени денови.
„Тоа сè уште треба да се потврди, но веруваме дека тие изгубија до 20 проценти од снабдувањето со бензин – директно како резултат на нашите напади“, им рече Зеленски на новинарите.
Кремљ рече дека домашниот пазар на гориво на Русија е целосно снабден.
Зеленски рече дека украинските сили користеле домашни ракети „Нептун“ и „Фламинго“ во неодамнешните напади, дел од напорите на Украина да ја прошири својата домашна вооружена индустрија.
Украинскиот претседател, исто така, рече дека руските сили извршиле 1.550 напади врз енергетски цели во Чернигов, Суми и Полтава во септември, но погодиле само 160 цели.
Фото: ЕПА
Свет
Ердоган: Искрено му се заблагодарувам на Трамп

Турскиот претседател, Реџеп Таип Ердоган, го поздрави договорот за прекин на огнот меѓу Израел и палестинското движење Хамас, пренесува „Анадолу“.
„Исклучително сум задоволен што преговорите меѓу Хамас и Израел, одржани во египетскиот град Шарм ел Шеик со придонес на Турција, завршија со прекин на огнот во Газа“, напиша Ердоган на турската социјална платформа NSosyal.
„Искрено му се заблагодарувам на претседателот на Соединетите Американски Држави, Доналд Трамп, кој покажа потребна политичка волја да ја охрабри израелската влада да го прифати прекинот на огнот, и на нашите братски земји Катар и Египет за нивната значајна поддршка во постигнувањето на договорот“, додаде турскиот претседател.
Ердоган нагласи дека Анкара внимателно ќе го следи спроведувањето на договорениот прекин на огнот и ќе продолжи да придонесува во процесот.
Турција, истакна тој, ќе продолжи да ја поддржува изградбата на независна и суверена палестинска држава со целосен територијален интегритет, во границите од 1967 година, со Источен Ерусалим како нејзин главен град.
„Во оваа пригода, им испраќам најискрени поздрави на моите палестински браќа и сестри, кои две години издржаа неописливо страдање борејќи се за живот и достоинство во нехумани услови, губејќи ги своите деца, родители, роднини и пријатели, и кои, и покрај сите трагедии што ги преживеаа, не се откажаа од својот чесен став“, рече Ердоган.
Договорот за прекин на огнот е дел од план од 20 точки, објавен на 29 септември, кој повикува на ослободување на сите израелски затвореници во замена за палестински затвореници, разоружување на Хамас и обнова на Газа.
Фото: ЕПА