Свет
Голем број деца исчезнаа во поплавите во Тексас, потврдени 27 жртви

Околу 27 луѓе, меѓу кои и девет деца, загинаа во поплавите во централниот дел на Тексас, соопштија властите денеска, додека спасувачите продолжуваат со потрагата по преживеани, вклучително и десетици исчезнати од летниот камп за девојчиња.
Канцеларијата на шерифот во округот Кер во Тексас соопшти дека повеќе од 800 луѓе се евакуирани од регионот додека нивото на водата се повлекува од подрачјето околу реката Гвадалупе, околу 137 километри северозападно од Сан Антонио.
„Нема да застанеме додека не ја најдеме и последната личност“, изјави шерифот на округот, Лери Леита, на прес-конференција.
Исчезнати девојчиња од летниот камп
Од 23 до 25 лица од летниот камп Mystic Summer се водат како исчезнати, од кои повеќето се девојчиња. Нивото на реката нагло се зголемило за девет метри во близина на кампот.
Американската национална метеоролошка служба соопшти дека вонредната состојба поради поплавите главно е завршена за округот Кер – епицентарот на поплавите, откако бурата донесе околу 30 сантиметри дожд рано во петокот. Но, за поширокиот регион останува во сила предупредувањето за поплави до 19 часот попладне.
Округот Кер се наоѓа во Texas Hill Country – рурална област позната по нерамниот терен, историските градови и други туристички атракции.
Обемна спасувачка операција
Заменик гувернерот на Тексас, Дэн Патрик, изјави дека 500 спасувачи трагаат по непознат број лица кои сè уште се водат како исчезнати, вклучувајќи и многу кои биле во подрачјето покрај реката прославувајќи го Денот на независноста.
Американскиот претседател Доналд Трамп изјави дека федералната влада работи со Тексас и локалните шерифи за одговор на поплавите.
„Меланија и јас се молиме за сите семејства погодени од оваа ужасна трагедија. Нашите храбри спасувачи сè уште се на терен и го прават она што најдобро го знаат“, напиша тој на социјалните мрежи.
Поплави без предупредување
Далтон Рајс, градоначалник на Кервил, центарот на округот, изјави за новинарите во петокот дека екстремните поплави го погодиле подрачјето пред зори, речиси без предупредување, поради што властите не успеале навреме да издадат наредби за евакуација. Реката Гвадалупе за помалку од два часа пораснала над нивото кое се смета за голема поплава.
Фото: ЕПА
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Грција бара помош за справување со големите пожари

За активните пожари на неколку различни локации низ целата земја, Грција побара помош од Европскиот механизам за цивилна заштита, со цел да се испратат шест авиони.
Од попладнево, грчките пожарникари водат битка во источниот дел на областа Атика, поширокиот регион на Атина, во северна Грција, на островите Евија и Китира, како и во јужниот дел на Пелопонез, од бројот 112 за итни случаи беа испратени низа пораки за превентивна евакуација до жителите на зафатените области.
Портпаролот на противпожарната служба информираше дека во сите пожари интервенираат голем број пожарникари заедно со копнени и воздушни средства, но и дека во деловите каде што се пожарите е пријавена штета, чија процена ќе се направи кога ќе заврши гаснењето.
– Сите пожари што избувнуваат овие денови, а особено денеска, брзо се шират, стануваат опасни, а се очекува овие услови да преовладуваат и во наредните денови. Поради оваа причина, нашата земја побара помош од Европскиот механизам за цивилна заштита, со цел да ни обезбеди шест авиони, рече Василис Ватракојанис.
Свет
Поради гладување 90.000 жени и деца итно имаат потреба од медицинска интервенција во Газа

Секој трет жител на Појасот Газа со денови не добива храна, предупреди Светската програма за храна (WFP) на Обединетите нации. Во последното соопштение се наведува дека 90.000 жени и деца итно имаат потреба од медицинска интервенција поради тешка неухранетост.
Според Министерството за здравство во Газа, само вчера починале уште девет лица од глад, со што бројот на жртви од неухранетост од почетокот на конфликтот достигна 122.
Израел, кој го контролира влезот на сите залихи во Газа, повторува дека не постои блокада и ја обвинува Хамас за лошата распределба на ресурсите.
Меѓународната заедница, вклучувајќи ги Германија, Франција и Велика Британија, побара итно олеснување на влезот на помошта, а генералниот секретар на ОН Антонио Гутереш остро ја осуди „рамнодушноста и недостигот на човечност“ во глобалниот одговор на кризата.
Регион
Големи пожари беснеат на најмалку пет различни локација во Грција

Во источниот дел на областа Атика, поширокиот регоион на Атина, во северна Грција, на островите Евија и Китира, како и во јужниот дел на Пелопонез, попладнево се активни големи пожари, а од бројот 112 за итни случаи беа испратени низа пораки до жителите на зафатените области.
Во пожарот во централна Евија, изгореа две противпожарни возило, а четворица пожарникари со полесни повреди на рацете и очите и со респираторни проблеми биле префрлени во болница.
Во сите пожари, беа превентивно евакуирани жителите на населените места во непосредна близина на огнената стихија, откако од бројот 112 за итни случаи беа испратени соодветни пораки.
За Атика, Евија и за дел од Пелопонез за денеска имаше предупредување за екстремно голема опасност од пожари, категорија пет, што воедно е и највисоката категорија во прогнозите за опасност од пожари на Министерството за цивилна заштита и климатски кризи на Грција.