Свет
(Видео) Голем пресврт: канадските хокеари ослободени од обвиненијата за групно силување

Петте канадски хокеари обвинети за групно силување на жена во хотелска соба во 2018 година се ослободени од сите обвиненија од судија во Онтарио. Случајот привлече големо внимание во Канада, а пресудата беше изречена во преполна судница во четвртокот, објави Би-би-си.
Судијката Марија Кароча неколку часа ја образложуваше својата пресуда разгледувајќи ги сведочењата и доказите собрани за време на осумнеделното судење пред да ги прогласи играчите за невини.
Поранешните членови на јуниорската репрезентација на Канада – Мајкл Меклауд, Дилон Дубе, Кал Фут, Алекс Форментон и Картер Харт – беа обвинети за напад врз жената, идентификувана во судските документи како Е. М., по гала-вечерата на Хокеарската асоцијација на Канада во Лондон, Онтарио. Сите беа играчи во престижната Национална хокеарска лига (НХЛ) во времето на скандалот.
Централното прашање на судењето беше дали Е. М., којa ималa 20 години во времето на инцидентот, далa согласност за сите сексуални дејства таа ноќ. Судот утврди дека жената се сретнала со играчите во барот, а подоцна доброволно отишла во хотелска соба за да има секс со Мајкл Меклауд. Според сведочењето, други играчи потоа влегле во собата и исто така имале сексуални дејства со неа.
Одбраната тврдеше дека самата Е. М. барала од мажите да имаат секс со неа и дека тие оправдано верувале дека таа се согласила за сè. Од друга страна, Е. М. сведочеше дека била под дејство на алкохол и дека се плашела. Иако се согласила за сексот со Меклауд, таа тврдеше дека не се согласила за она што следувало. Од сите обвинети, само Картер Харт сведочеше во своја одбрана.
Објаснувајќи ја својата пресуда, судијката Кароча изјави дека не го смета сведочењето на жртвата за „веродостојно или сигурно“ и дека Обвинителството не успеало да докаже вина по ниедна точка од обвинението. Таа посочи на многубројни недоследности во нејзиното сведочење, како што се деталите за тоа кој ги платил пијалаците таа вечер, заклучувајќи дека нејзините изјави одразуваат несигурно сеќавање, кое не се совпаѓа со другите докази.
Судијката исто така ги истакна разликите помеѓу она што Е. М. им го кажала на полициските истражители и она што им го кажала на претставниците на Хокеарската асоцијација на Канада, со која постигнала спогодба вредна 3,5 милиони канадски долари во 2022 година. На судењето беа прикажани и две снимки од инцидентот, на кои може да се слушне како Е. М. дава согласност. Иако според канадскиот закон ваквите снимки сами по себе не докажуваат согласност, судијката оцени дека Е. М. „зборува нормално, се насмевнува и не изгледа вознемирено“, што го поткопа тврдењето на Обвинителството дека таа не ја напуштила просторијата од страв.
Играчите не дадоа никакви изјави за медиумите по пресудата, но нивните адвокати се обратија до јавноста во нивно име. „Со години јавната перцепција е обликувана од еднострана приказна“, рече Дејвид Хамфри, адвокат на Мајкл Меклауд, додавајќи дека штетата нанесена на кариерата и на угледот на неговиот клиент е значајна.
Адвокатката на оштетената страна, Карен Белхумер, рече дека Е. М. е многу разочарана од одлуката и од процената на нејзиниот кредибилитет. „Кога некој ќе собере храброст да ја раскаже својата приказна, најлошиот можен исход е да се чувствува како да не му се верува“, рече таа.
НХЛ соопшти дека играчите остануваат неподобни да играат во лигата сè додека не се спроведе внатрешен преглед на наодите на судот. Сепак, Обвинителството внимателно ќе ја разгледа одлуката пред да одлучи за евентуална жалба. Демонстрантите што ја поддржуваат Е. М. се собраа пред судницата за време на судењето и на денот на пресудата изразувајќи разочарување од исходот за кој велат дека би можел да влијае на идните случаи на сексуален напад во Канада.
Фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Кина го губи „Тик-ток“ во САД, „Бајт денс“ останува со мал удел

Американскиот претседател Доналд Трамп потпиша уредба со која се потврдува договорот за одвојување на „Тик-ток“ од кинеската компанија „Бајт денс“ и пренос на мнозинскиот удел во рацете на американски инвеститори.
Според планот, конзорциум предводен од софтверскиот гигант „Оракл“ ќе управува со американските операции на „Тик-ток“, ќе ги чува податоците во домашни сервери и ќе добие лиценца за алгоритмот што препорачува содржини. Очекувањата се американските инвеститори да држат околу 80 отсто од уделите, додека „Бајт денс“ ќе остане со минорен дел.
„Тик-ток“ во САД има околу 180 милиони корисници, а со овој договор платформата ќе продолжи да биде достапна под американска контрола и построг надзор. Од администрацијата на Трамп велат дека целта е заштита на националната безбедност и податоците на корисниците.
Свет
Трамп: Нема да дозволам Израел да го анектира Западниот Брег

Американскиот претседател Доналд Трамп изјави дека нема да дозволи Израел да го анектира Западен Брег, одбивајќи ги барањата на дел од крајно десните израелски политичари за проширување на израелскиот суверенитет врз оваа територија.
„Не, нема да дозволам. Тоа нема да се случи. Доста е, време е ова да запре“, рече Трамп во Белата куќа, објаснувајќи дека темата ја покренал по телефонскиот разговор со премиерот Бенјамин Нетанјаху за состојбата во Појасот Газа.
Притисокот за анексија доаѓа од дел од десното крило на коалицијата на Нетанјаху, кое бара формално воведување на израелскиот суверенитет врз Западен Брег. Овие барања предизвикуваат силна загриженост кај арапските лидери, од кои дел се сретнаа со Трамп на маргините на Генералното собрание на Обединетите нации во Њујорк.
Западен Брег е освоен од Израел во војната во 1967 година. Палестинците со децении го бараат како дел од својата идна држава, заедно со Источен Ерусалим и Појасот Газа. На оваа територија денес живеат околу 2,7 милиони Палестинци и околу 700.000 израелски доселеници. Повеќето земји во светот не ги признаваат израелските населби таму и ги сметаат за нелегални според меѓународното право.
Изјавата на Трамп доаѓа во чувствителен момент на засилени судири во Газа и зголемен дипломатски притисок за изнаоѓање долгорочно решение за израелско-палестинскиот конфликт.
Свет
Трамп најави нови царини на лекови, камиони и мебел

Американскиот претседател Доналд Трамп објави дека од 1 октомври ќе стапат на сила нови царини: 100 отсто на увоз на брендирани лекови, 25 на тешки камиони, 50 на кујнски ормари и 30 проценти на тапациран мебел.
Трамп изјави дека целта е заштита на домашното производство и националната безбедност, додека Американската стопанска комора и повеќе сојузници предупредија дека мерките ќе ги погодат блиските трговски партнери и голем дел од индустријата.