Свет
„Гугл“ призна дека неговиот систем направил грешка за време на земјотресот во Турција во 2023 година

„Гугл“ призна дека неговиот систем за рано предупредување од земјотрес не успеал соодветно да ги предупреди луѓето за време на смртоносниот земјотрес во Турција во 2023 година.
Десет милиони луѓе во радиус од 150 километри од епицентарот требало да го добијат предупредувањето од највисоко ниво на „Гугл“, кое им давало до 35 секунди да најдат безбедност. Наместо тоа, само 469 такви предупредувања биле испратени за првиот земјотрес со јачина од 7,8 степени.
„Гугл“ потврди за BBC дека половина милион луѓе добиле предупредување од пониско ниво, дизајнирано за благи потреси. Технолошкиот гигант претходно тврдеше дека системот „работел добро“. Системот работи на Android уреди, кои сочинуваат повеќе од 70% од мобилните телефони во Турција.
Повеќе од 55.000 луѓе загинаа кога два големи земјотреси ја погодија југоисточна Турција на 6 февруари 2023 година, а повеќе од 100.000 беа повредени. Многумина спиеле кога се случиле потресите.
Системот за рано предупредување на „Гугл“ беше активен на денот на земјотресот, но ја потцени јачината на потресите.
„Продолжуваме да го подобруваме системот врз основа на она што го дознаваме за секој земјотрес“, рече портпарол на „Гугл“.
Системот на „Гугл“, наречен Android Earthquake Alerts (AEA), може да детектира потреси од широк спектар на Android телефони. Бидејќи земјотресите се движат релативно бавно низ Земјата, во тој момент може да се испрати предупредување.
Најсериозното предупредување се нарекува „Преземи акција“, кое активира гласен аларм на телефонот на корисникот, ја заменува поставката „не вознемирувај“ и го преклопува нивниот екран со предупредувачка порака.
Ова е предупредувањето што треба да се испрати до луѓето кога ќе се открие доволно силен потрес што може да ги загрози животите на луѓето. AEA исто така има и помалку сериозно предупредување „Биди свесен“, дизајнирано да ги извести корисниците за потенцијални помали потреси, предупредување кое не ја заменува поставката „не вознемирувај“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Зеленски: Украина има потреба од сè поврзано со безбедносните гаранции

Украинскиот претседател Володимир Зеленски изјави дека неговата земја има потреба од „сè“ кога новинар го праша какви безбедносни гаранции ѝ се потребни за да се постигне договор.
Тој рече дека Украина најпрво има потреба од силна армија, што вклучува оружје, луѓе, обука и разузнавачки информации, пренесува „Си-ен-ен“.
Додаде и дека сето тоа ќе зависи од „големите земји“, како што се САД и другите сојузници.
Зеленски денес престојува во Вашингтон кадешто се сретна со претседателот Доналд Трамп во Овалната соба. Одговарајќи на новинарски прашања, украинскиот претседател изрази подготвеност за трилатерална средба со Владимир Путин и Трамп. Тој повтори и дека нема да има избори во земјата додека трае војната.
Свет
Зеленски му предаде писмо до Трамп: „Не е за тебе, туку за твојата сопруга“

Претседателот на Украина, Володимир Зеленски, денес му го предаде на американскиот претседател Доналд Трамп писмото од првата дама на Украина.
Зеленски моментално е во Вашингтон, каде што се сретна со Трамп во Белата куќа, а со него се и клучни лидери на европски земји.
Тој му кажа на Трамп дека писмото е наменето за првата дама на Америка, Меланија Трамп.
„Мојата сопруга, првата дама на Украина, ми даде писмо. Не е за тебе, туку за твојата сопруга“, рече тој, пренесе „Си-ен-ен“.
Минатата недела, Трамп достави писмо од Меланија Трамп до рускиот претседател Владимир Путин на самитот во Алјаска.
„Во денешниот свет, некои деца се принудени да носат тивка насмевка, недопрена од темнината околу нив“, стоеше во писмото, потпишано од првата дама на САД до Путин.
Зеленски на денешната средба со Трамп, јавно и’ се заблагодари на Меланија.
Свет
По критиките на претходната средба со Трамп, Зеленски овојпат доби комплименти за облеката

Денешната средба помеѓу лидерите на САД и Украина, Доналд Трамп и Володимир Зеленски, се одвиваше во многу попријатен тон од претходната, а двајцата лидери во повеќе наврати и се шегуваа.
Новинарот Брајан Глен, кој го критикуваше Зеленски во февруари затоа што не носел одело, сега му рече: „Изгледаш фантастично во тоа одело. Се извинувам за нападот во февруари“.
На тоа, Доналд Трамп додаде: „И јас му го кажав тоа“, истакнувајќи дека Глен го „нападнал“ Зеленски минатиот пат.
Зеленски се насмеа и одговори: „Се сеќавам на тоа“, а потоа се пошегува дека Глен носел исто одело како и тогаш: „Јас се пресоблеков, ти не“.
Темата во што денес ќе се појави облечен Зеленски деновиве беше во фокус во Вашинтон.