Свет
„Дали сте сериозни?“ – Пекинг ги критикува изјавите на учесниците на самитот Г7 за Кина

Портпаролката на кинеското Министерство за надворешни работи Хуа Чунјинг ги критикуваше изјавите на учесниците на самитот на Г7 одржан во Хирошима дека кинеската политика во моментот претставува закана за мирот и безбедноста на глобално ниво.
„Некои членки на Г7 ја нарекоа Кина најголема закана за глобалната безбедност и просперитет. Дали сте сериозни?“, напиша таа на социјалните мрежи.
„Ако Кина е закана, тогаш кои се некои од членките на Г7 кои почнуваат војни со суверени држави, соборуваат легитимни странски влади, се повлекуваат од мултилатералните договори и ги принудуваат другите земји да ги прекинат синџирите на снабдување“, праша кинескиот официјален претставник.
Хуа истакна дека во сегашната фаза, Кина е мотор број 1 на светската економија, придонесува за светскиот раст повеќе од сите членки на Г7 заедно, одржува трговски и економски односи со повеќе од 140 земји во светот, и дека е вториот најголем придонесувач во финансирањето на мировните операции на ОН.
Кинескиот заменик-министер за надворешни работи Сун Веидонг во понеделникот го повика јапонскиот амбасадор во Пекинг Хидео Таруми на состанок за да му предаде протест поради прашањата поврзани со Кина, дискутирани на самитот на Групата седум (Г7) во Хирошима за време на викендот.
Лидерите на Г7 на тридневниот самит изразија сериозна загриженост поради, како што рекоа, зголемените тензии во Источното и Јужното Кинеско Море, како и за состојбата со човековите права во Кина, вклучувајќи ги Тибет и Ксинџијанг.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Трамп: Путин не беше задоволен што дојде во САД, тоа беше неговата голема отстапка, му благодарам

Американскиот претседател Доналд Трамп денес на прес-конференцијата во Белата куќа изјави дека рускиот лидер Владимир Путин не е задоволен што доаѓа во САД, но дека потегот е голема отстапка. „Путин не беше задоволен што дојде во САД. Тоа беше голема отстапка и му се заблагодарувам за тоа“, рече Трамп.
Тој додаде дека ги продолжил разговорите со рускиот претседател по состанокот во Алјаска.
President Trump:
Putin wasn't happy about coming to the United States. That was a big concession, and I appreciate the fact that he did. pic.twitter.com/OGD1LG8aVV
— Anton Gerashchenko (@Gerashchenko_en) August 25, 2025
„Да, сум го направил тоа“, одговори тој кога новинарите го прашаа дали повторно го контактирал Путин.
„Секој разговор со него е добар разговор. А потоа, за жал, бомба паѓа врз Киев или некаде на друго место и многу се лутам“, рече Трамп.
Потпретседателот на САД, Џ.Д. Венс, вчера изјави дека Русија направила „значајни отстапки“ кон евентуален мировен договор.
„Тие препознаа дека нема да можат да инсталираат марионетски режим во Киев“, рече Венс во емисијата „Meet the Press“ на NBC. Тој додаде дека Москва, исто така, ја прифатила идејата за безбедносни гаранции за Украина од идна агресија.
И покрај ова, извори минатата недела за Ројтерс изјавиле дека Путин сè уште бара Украина да го предаде целиот Донбас, да се откаже од членството во НАТО, да остане неутрална и да не дозволи западни трупи да бидат распоредени на нејзина територија, во замена за прекин на офанзивата. Рускиот министер за надворешни работи Сергеј Лавров рече дека безбедносните гаранции треба да бидат надгледувани од група земји, вклучувајќи ги и постојаните членки на Советот за безбедност на ОН.
Минатиот петок, по разговорите со Путин во Алјаска и самитот во Белата куќа со Зеленски и европските лидери, Трамп се закани со нови санкции против Русија ако не се постигне напредок во рок од две недели.
„Тој се обидува јасно да стави до знаење дека Русија може да се врати во светската економија ако го запре убивањето, но ќе продолжи да биде изолирана ако не го стори тоа“, рече Венс.
Потпретседателот ја наведе како пример неодамнешната одлука на Трамп да воведе дополнителни тарифи од 25 проценти на индиските стоки за купување руска нафта, истакнувајќи дека тоа е модел на економска моќ што може да се користи и против Москва.
Фото: принтскрин
Свет
Макрон: Израелските напади врз болница во Газа не можат да се толерираат

Францускиот претседател Емануел Макрон денес изјави дека израелските напади врз болница во Газа, кои предизвикаа смрт на цивили и новинари, се неприфатливи.
Макрон напиша на платформа X дека цивилите и новинарите мора да бидат заштитени во сите околности.
„Медиумите мора да можат слободно и независно да ја извршуваат својата мисија да известуваат за конфликти“, рече Макрон, повикувајќи го Израел да го почитува меѓународното право.
Тој истакна дека целта е да се постигне траен прекин на огнот во Појасот Газа, ослободување на сите преостанати заложници што ги држи Хамас и разоружување на таа палестинска милитантна група, како и испорака на хуманитарна помош во Газа.
Палестинските здравствени претставници објавија дека најмалку 20 лица се убиени во израелскиот напад врз болницата Насер, вклучувајќи пет новинари, спасувачи и здравствени работници, пренесува Танјуг.
Фото: принтскрин
Свет
Сакс: Европа треба да ги нормализира односите со Русија

Европските земји треба да ги нормализираат односите со Русија, што е во согласност со нивните национални интереси, изјави Џефри Сакс, директор на Центарот за одржлив развој на Универзитетот Колумбија во Њујорк.
„Ѝ реков на Европа: обединете се дипломатски и водете нормална дипломатија со Русија. Разговарајте, преговарајте и не зависете од САД, кои имаат сосема различни интереси, во овој поглед“, рече Сакс во интервју за „Хиндустан Тајмс“.
Сакс истакна дека Европа, особено Германија, има успешно искуство во економските односи со Русија.
„По 1991 година, Русија ја снабдуваше Германија со јаглеводороди, што му овозможи на Берлин да ја изгради својата тешка индустрија. Сепак, германската енергија повеќе не е во предност“, рече Сакс.
Според него, постојат бројни причини за европската политика на конфликт со Москва, од кои главната е што САД активно манипулираа со политичката средина во Европа со децении и сакаа да ја ограничат соработката на европските земји со Русија.
„Вториот фактор е моменталната русофобија. Сите мислат дека Русија ќе ја нападне Европа, што е најапсурдна идеја“, вели Сакс.
Тој додаде дека ваквите загрижености само ја зголемуваат зависноста на европските земји од американската воена помош.
Претседателот на Финска, Александар Стуб, претходно изјави дека во Европа се водат преговори за потенцијално продолжување на комуникацијата со Русија.
Унгарскиот премиер Виктор Орбан ги покани лидерите на европските земји, првенствено Германија и Франција, да одржат самит со Русија.
Министерот за надворешни работи на Шпанија, Хозе Мануел Албарес, призна дека Европа ја разбира потребата од обновување на односите со Москва.
Фото: принтскрин