Свет
Демонстранти уништиле статуи на Христофор Колумбо за време на празничниот викенд

Демонстрантите обезглавиле статуа на Христофор Колумбо во Конектикат, фрлиле друга статуа во пристаништето на Балтимор и ја запалиле скулптурата „Семејство пионери“ во Портланд, Орегон, за време на празничниот викенд за 4 Јули додека судирите за спорните споменици продолжуваат да беснеат во целата земја, пренесува „Њујорк пост“.
„Иако ги поздравуваме мирните протести и конструктивниот дијалог за тоа дали и како да се стават одредени споменици во контекст или да се преселат во музеите преку правен процес, беззаконието, вандализмот и уништувањето на јавниот имот е целосно неприфатливо“, напиша гувернерот на Мериленд, Лери Хоган, на „Фејсбук“.
„Лидерите на Балтимор треба да ја вратат контролата на сопствените улици и веднаш да почнат да ги прават побезбедни. Ова е антитеза на демократијата и треба да биде осудена од сите, без оглед на нивната политика“, напиша Хоган.
Мермерната статуа на Колумбо, која стоеше на пиедестал во близина на квартот Мала Италија во Балтимор, беше цел на демонстрантите во саботата вечерта на 4 јули. Толпата ја закачи со јажиња и ја собори на земја пред да ја повлече кон пристаништето и да ја фрли во водата.
Статуата е подигната во 1984 година и беше откриена од тогашниот градоначалник Вилијам Доналд Шафер и тогашниот претседател Роналд Реган.
Тоа не беше единствениот споменик на италијанскиот истражувач од 15 век уништен за време на викендот. Во Конектикат полицијата во саботата наутро открила дека главата на гранитната статуа на Колумбо, висока 12 метри, и поставена во близина на градското собрание, била откината во текот на ноќта и сè уште е исчезната.
„Ова беше подарок за градот Вотербери од американската италијанска заедница и жално е што е уништен на овој начин“, рече Дејвид Х. Саливан, локален кандидат за Конгресот.
Статуи на историски личности – вклучително и Колумбо, Џорџ Вашингтон, личности од Конфедерацијата и други сопственици на робови – станаа цел на демонстрациите на „Блек лајвс медр“ откако националните расни немири ги обновија дебатите за нивното мешано наследство.
Полицијата во Портланд, Орегон, исто така прогласи немири во саботата кога демонстрантите ја запалија „Ветената земја“, скулптура во паркот пред судот. Поставена во чест на „Патеката во Орегон“, бронзената скулптура прикажува пионерски татко, мајка и син. Демонстрантите исто така се обиделе да го запалат и судот.
Претседателот на САД, Доналд Трамп, го осуди сквернавењето на спомениците. На неговиот митинг во Маунт Рашмор во петокот тој вети дека ќе потпише извршна наредба за создавање национална градина на американски херои што ќе содржи статуи на големите Американци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Газа: 169 луѓе починаа од глад, над 320.000 деца се соочуваат со акутна неухранетост

Министерството за здравство во Газа денес објави дека уште седум Палестинци, меѓу кои и едно дете, починале од глад и неухранетост.
Новите смртни случаи, регистрирани во последните 24 часа, го зголемија вкупниот број на смртни случаи поврзани со глад од октомври 2023 година на 169, вклучувајќи 93 деца, се вели во соопштението.
Министерството предупреди дека хуманитарната криза во Газа се влошува и повторно апелираше до меѓународната заедница и хуманитарните организации веднаш да интервенираат за да се стави крај на страдањето и да се достави итна помош, пренесува Анадолија.
Заменик-извршниот директор на УНИЦЕФ, Тед Чајбан, денесka изјави дека Газа се соочува со сериозен ризик од глад и дека она што може да се види на терен е „шокантно“.
„Повеќе од 320.000 мали деца се изложени на ризик од акутна неухранетост. Во стабилизацискиот центар во градот Газа , сретнав акутно неухранети бебиња чии тела беа само кожа и коски. Нивните мајки седеа во близина, очајни и исцрпени. Една мајка ми кажа дека нејзиното тело повеќе не произведува млеко затоа што самата е премногу гладна. УНИЦЕФ прави сè што може за да ја реши ситуацијата – поддржува доење, обезбедува формула за бебиња и лекува деца со тешка акутна неухранетост. Но, потребите се огромни по 22 месеци војна и два месеци блокада, која сега е олеснета, но сè уште има влијание, а помошта сè уште не пристигнува доволно брзо или во потребниот обем“ рече Чајбан.
Тој нагласи и дека повеќе од 18.000 деца се убиени во Газа од почетокот на војната, што е во просек по 28 деца дневно.
Свет
Нов земјотрес на Камчатка, регистриран афтершок со јачина од 6,1 степен според Рихтеровата скала

Земјотрес со интензитет од 6,1 степен според Рихтеровата скала е регистриран денес на Камчатка, на растојание од 196 километри од регионалниот главен град Петропавловск-Камчатски, соопшти огранокот на Геофизичката служба на Руската академија на науките (РАН) на Камчатка.
Како што е наведено, земјотресот е регистриран на длабочина од 59,8 километри, пренесува РИА Новости.
Директорката на подружницата на оваа служба во Камчатка, Данила Чебров, претходно за агенцијата РИА Новости изјави дека се очекуваат силни, но не и разорни потреси по силниот земјотрес што го погоди регионот на 30 јули.
Според регионалните служби за вонредни состојби, во последните 24 часа се регистрирани околу 146 последователни потреси со јачина помеѓу 3,2 и 6,2 степени, од кои многу се почувствувани, со јачина од 2 до 5 степени според Меркалиевата скала.
Во среда, на 30 јули, Камчатка беше погодена од најсилниот земјотрес од 1952 година, со јачина од 8,8 степени.
По земјотресот, во делови од Русија и низ Тихиот Океан беше прогласена закана од цунами, а населението беше повикано да се држи подалеку од брегот во ризичните области.
Вечерта, предупредувањето беше укинато.
Европа
Финска, Норвешка и Шведска под жештина невидена од 1961 година

Земјите од Северна Европа, познати по својата студена клима, се соочуваат со интензивни топлотни бранови, со температури над 30 степени Целзиусови во подолг временски период.
Во норвешкиот дел од Арктичкиот круг, метеоролошките станици регистрирале температури над 30 степени Целзиусови дури 13 дена во јули, додека Финска имала три последователни недели со температури од 30 степени, пишува денес британскиот „Гардијан“.
Според научниците, тоа е најдолгиот период според историските податоци од 1961 година, а трае 50 проценти подолго од претходниот рекорд.
„Топлотниот бран е сè уште во полн ек, со максимални температури денес околу 32-33 степени. Дури и арктичките региони забележаа три недели со температури над 25 степени и може да ги соборат своите августовски температурни рекорди утре“, изјави Мика Рантанен, климатолог во Финскиот метеоролошки институт, во објава на социјалните мрежи.
Норвешкиот метеоролошки институт соопшти дека температури над 30 степени се регистрирани 12 дена во јули во најмалку една станица во трите најсеверни покраини на Норвешка.
Во Шведска, метеоролозите, исто така, регистрираа продолжени топлотни бранови во неколку северни градови, при што метеоролошката станица во Хапаранда регистрираше температури од 25 степени или повеќе 14 дена по ред.
Овие топлотни бранови, кои ја погодија северна Европа кон средината на јули, беа предизвикани од топлите води покрај северниот брег на Норвешка, кои ги покачија температурите во нордиските земји за осум до 10 степени над сезонските норми.
Поради интензивен топлотен бран, лизгалиште на мраз во северна Финска ги отвори вратите за луѓе кои бараат засолниште од жештината, откако локалните болници беа преполни, а сточарите предупредија дека нивните ирваси се на работ на смртта од жештината.