Свет
Десетте најбогати луѓе во светот се многу побогати по победата на Трамп

Богатството на 10-те најбогати луѓе во светот се зголеми за рекордна сума по победата на Доналд Трамп на претседателските избори.
На листата на 10-те најбогати луѓе во светот доминираат американските технолошки милијардери. Индексот на милијардери на Блумберг проценува дека 10-те најбогати луѓе во светот на 6 ноември заработиле речиси 64 милијарди долари, што е најголем дневен пораст од лансирањето на индексот во 2012 година.
Илон Маск, најбогатиот човек на светот, забележа најголем раст. Тој додаде 26,5 милијарди долари на своето богатство, кое сега изнесува 290 милијарди долари. Истакнат поддржувач на кампањата на Трамп профитираше од порастот на цената на акциите на Тесла, производителот на електрични автомобили каде што тој е извршен директор и поседува 13% од нејзините акции.
Зголемувањето на богатството на најбогатите е резултат на растот на цените на акциите на американските берзи бидејќи инвеститорите очекуваат Трамп да ги намали даноците и да ги отстрани регулативите, пишува Гардијан.
Џеф Безос, основачот на Амазон и вториот најбогат човек во светот, додаде 7 милијарди долари на своето богатство од речиси 230 милијарди долари. Лери Елисон, претседател на софтверската компанија „Оракл“ и традиционален поддржувач на републиканците, го зголеми своето богатство за 9 милијарди долари и сега тежи 193 милијарди долари.
Меѓу другите членови на листата на 10-те најбогати чие богатство се зголемило се и ко-основачот на Мајкрософт, Бил Гејтс, поранешниот извршен директор на Мајкрософт, Стив Балмер и ко-основачите на Гугл, Лери Пејџ и Сергеј Брин.
Интересно е што Трамп во текот на кампањата ги искажуваше своите фрустрации кон Гугл. Така во септември тој се закани дека ќе му нареди на Министерството за правда да поднесе кривична пријава против компанијата доколку не победи на изборите. Тој тврдеше дека Гугл покажува негативни написи за него, но не и за неговата противничка Камала Харис – што Гугл го негираше.
Единствениот член на богатата елита што изгуби пари во средата беше францускиот тајкун Бернар Арно, чие богатство се намали за речиси 3 милијарди долари. Богатството на Цукерберг не се зголеми. Бизнисменот го навлече гневот на Трамп, а во август новоизбраниот претседател му се закани со доживотен затвор за наводно заговор против него на изборите во 2020 година.
Нил Вилсон, главен аналитичар во Финалто, рече дека американските акции пораснале поради „чистата МАГА трговија“, мислејќи на слоганот на Трамп „направи ја Америка повторно голема“ и инвеститорите кои купуваат акции врз основа на јасна победа на Трамп.
„Ова се должи на изгледите за пониски даноци, дерегулација во широк опсег сектори како што се банкарството, енергијата и технологијата, плус голем, рефлексивен сет на олеснување поради фактот што исходот од изборите беше чист и неоспорен. Резултатот од црвениот бран беше она што секој американски капиталист би го сакал и во никој случај не беше сигурен на изборите“, изјави тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Белата куќа: Зеленски оди во погрешна насока, Трамп е фрустриран

Портпаролката на Белата куќа Каролин Левит ги демантираше тврдењата дека американскиот претседател Доналд Трамп му дал ултиматум на украинскиот претседател Володимир Зеленски до крајот на денот да го прифати постоечкиот предлог за мировен договор, во спротивно САД ќе се повлечат од преговорите.
„Не, не до крајот на денешниот ден“, рече Левит.
Сепак, Левит потврди дека Трамп е сè пофрустриран од ситуацијата и дека сака да го види крајот на овој конфликт.
Таа додаде дека Зеленски оди во погрешна насока кога се во прашање мировните преговори и дека се обидува да ги води преговорите преку медиумите, што е неприфатливо за претседателот.
„Неговото трпение е при крај“, рече Левит, мислејќи на Трамп.
Претходно денеска, Трамп го обвини Зеленски дека ја продолжува војната со своите запаливи изјави, откако украинскиот претседател рече дека неговата земја правно нема да ја признае окупацијата на Крим.
Свет
На Карлос Сантана му се слоши пред настапот во Тексас, итно префрлен во болница

На легендарниот музичар Карлос Сантана му се слошило пред настап во Тексас и итно бил префрлен во болница поради дехидрација, јавува „Си-Ен-Ен“.
Мајкл Врионис, претседател на „Јуниверзал саунд Менаџмент“ и претставник на Сантана, ја информираше својата публика во изјава за магазинот „Пипл“ дека со длабоко разочарување мора да соопшти оти шоуто во Сан Антонио е одложено.
Тој изјавил дека Сантана бил во театарот „Маџестик“ и се подготвувал за настапот кога доживеал инцидент за кој подоцна било утврдено дека е дехидрација.
„Како мерка на претпазливост и за здравјето на Сантана, одлуката да се одложи настапот беше најразумниот потег“, истакна тој.
Врионис додаде дека на музичарот му оди добро и со нетрпение очекува наскоро да се врати во Сан Антонио и да ја продолжи турнејата во САД.
Свет
Папата не се избира како што е прикажано во филмот Конклава – кардинал раскажа што се случува зад затворените врати во Ватикан

Изборот на новиот папа не се случува како во филмот Конклава, изјави кардиналот од Келн, Рајнер Марија Воелки. Кардиналот ќе учествува во изборот на новиот поглавар на Римокатоличката црква.
Велки изјави за ДПА дека го гледал трилерот со Ралф Фајнс.
„Добро се забавував, но реалноста е сепак сосема поинаква“, вели.
Келнскиот кардинал е еден од 135-те кардинали кои го избираат наследникот на починатиот папа. Учествуваше и на конклавата во 2013 година, кога беше избран папата Франциско.
Како што рече, она што најпрецизно е прикажано во филмот е изолацијата на учесниците на конклавата во Систинската капела.
„Треба да се разликува самата конклава од таканаречената претходна конклава. Тогаш се собираме, разговараме, ги изнесуваме нашите ставови. Има кафе паузи, состаноци за вечера, се запознаваме. Се разбира, тогаш се искажуваат различни мислења. Тоа е она што му претходи на главниот настан. И кога самата конклава започнува, тоа е веќе еден вид прекин – што веќе јасно се гледа од фактот дека сите кардинали се преселуваат во Домот Санта Марта“.
„Таму мора да се предадат сите електронски уреди, сите мобилни телефони. Секој добива своја соба. Многу добро се сеќавам кога последен пат стигнав во мојата соба. Прозорците беа запечатени, ролетните затворени. Не можев да ја видам дневната светлина“.
Кардиналите јадат заедно, се молат на миса и секој ден одат од Санта Марта до Сикстинската капела.
„Станува збор за 500, 600 метри. Обезбедено е возило за старите лица и оние со потешкотии во движењето. Се’ се одвива во одлична атмосфера на молитва“, објаснува Велки.
„Нема големи емотивни испади, како што е прикажано во филмот. Во претходната конклава може да има нешто пожешко, нешто поконтроверзно, можам да го замислам тоа, и тоа е добро. Така ги спојуваме различните погледи на Црквата од целиот свет и заедно одиме кон одлука. Во самата конклава има поинакво расположение”.
Папата Франциско, додаде, и тука го покажал патот, бидејќи особено посветил внимание на синодалната заедница.
Така, тој воведе нов стил на однесување, каде најпрвин достоинствениците се слушаат меѓусебно и го слушаат Божјиот глас.
„И моите лични искуства потврдуваат дека Бог води од различноста кон единство. Наша задача е да се отвориме, за да препознаеме каде сака да нè води. Препознавањето на тоа е голем предизвик“, изјави.