Свет
Детали за крунисување на Чарлс Трети, новиот монарх на Обединетото Кралство: Ќе носи 36 милиони евра на главата
![крунисување](https://makfax.com.mk/wp-content/uploads/2023/05/11453441.jpg)
Англиските монарски се крунисануваат во престолнината Лондон околу еден милениум. За ова време и со промената на кралевите и кралиците создадени се многу ритуали и протоколи кои денес ќе бидат дел и од крунисувањето на Чарлс Трети и неговата сопруга Камила. Некои од нив се стари речиси колку и самата церемонија на крунисување, додека други се модерни.
Како се одбира датумот за крунисување?
Кралското семејство и британската влада се договораат за соодветниот датум за крунисувањето. Ниту Бакингемската палата ниту Даунинг стрит број 10, каде што е резиденцијата на британскиот премиер, официјално не дадоа објаснување зошто овојпат е одлучено свечениот чин да се направи на денеска, на 6 мај.
Британските медиуми пишуваат дека сепак има некои лични врски помеѓу кралот и датумот на крунисувањето. Имено, 6 мај е роденден и на неговиот внук Арчи Харисон Маунтбатен-Виндзор, најстариот син на принцот Хари и Меган Маркл, кој е роден во 2019 година. Тоа е и годишнина од смртта на неговиот прапрадедо, кралот Едвард Седми, кој починал во 1910 година.
![](https://makfax.com.mk/wp-content/uploads/2023/05/11454519-800x595.jpg)
Вестминстерска опатија (ЕПА)
Во Вестминстерската опатија се крунисани 38 монарси
Со оглед на фактот дека досега во Вестминстеската опатија се крунисани 38 монарси, веројатно е природно Чарлс Трети да ја продолжи традицијата што започнала во 1066 година, кога Вилијам Освојувачот ја освоил Англија. Освен тоа Вестминстерската опатија е исто така место на многу други важни црковни служби на кои присуствува англиското кралско семејство.
Чарлс Трети очигледно не сакал религиозен датум за своето крунисување исто како и мајка му која се одлучила за летно крунисување. Елизабета Втора беше крунисана на 2 јуни 1953 година во Вестминстерската опатија.
Која од круните?
Кралското семејство поседува неколку круни. Кралот Чарлс Трети за крунисувањето ја избра „Круната на Едвард“. Таа е најстарата од британските кралски круни, направена во 1661 година, а првпат ја носел кралот Чарлс Втори. Оваа круна ја заменила средновековната круна, која била стопена во 1649 година. Од 1649 до 1661 година Англија накратко станала република, предводена од диктаторот и воен лидер Оливер Кромвел. Бунтовниците продале многу од кралскиот накит и го стопиле златото.
По обновувањето на монархијата (т.н. „Реставрација“), морало да се направи нова круна која во многу нешта наликувала на претходната. Според фондацијата Труст на кралската збирка (Royal Collection Trust), круната тежи околу два килограми, украсена е со рубини, аметисти и сафири и е направена од чисто злато. Нејзината вредност се проценува на околу 36 милиони евра.
„Круната на Едвард“ пред Чарлс ја носеше неговата мајка, Елизабета Втора.
Камила сепак ќе стане кралица
Со благослов на покојната кралица Елизабета Втора, Камила ќе биде формално именувана како кралица Камила, а не само како кралска сопруга. Таа денеска исто така ќе биде крунисана во Вестминстерската опатија со круната на Кралицата Мери, кралската сопруга на кралот Џорџ Петти, направена за церемонијата на крунисувањето во 1911 година.
Од круната пред церемонијата ќе биде изваден важен скапоцен камен – дијамантот Кох-и-Нур, кој неодамна предизвика контроверзии бидејќи дошол во сопственост на британското кралско семејство под сомнителни околности. Четири земји си го бараат назад дијамантот од Велика Британија: Индија, Пакистан, Авганистан и Иран.
Наместо Кох-и-Нур, на круната на Камила ќе има некои од омилените камења на кралицата Елизабета Втора – почит кон починатиот монарх, се вели во официјалното соопштение.
![чарлс](https://makfax.com.mk/wp-content/uploads/2023/05/11453426-800x516.jpg)
Кралот Чарлс вчера ги пречекуваше високите гости (ЕПА)
По крунисувањето – забава
Утре, ден по крунисувањето, во замокот Виндзор ќе се одржи концерт. Се очекуваат големи ѕвезди како Лајонел Ричи, Кејти Пери и оперскиот пејач Андреа Бочели, кој ќе пее дует со велшкиот колега Сер Брин Терфел.
Британската поп група Тејк дет доаѓа со три свои члена – без Роби Вилијамс и Џејсон Оринџ – а доаѓа и пејачката и текстописец Фреја Ридингс и велшкиот соул композитор и продуцент Алексис Френч.
Покрај големите суперѕвезди, на сцената ќе има и таканаречен „Хор за крунисувањето“, кој е составен од локални хорови од целата земја што ќе настапат заедно. Овој „Хор за крунисувањето“ ќе пее и заедно со Виртуелниот хор, составен од пејачи од целиот Комонвелт.
Жолтата страна на церемонијата: Ќе дојде ли Хари?
По конфликтот со Бакингемската палата, најмладиот син на кралот Чарлс, принцот Хари, треба да смета на прилично студен пречек. Во секој случај, „загубениот син“ кој официјално го напушти кралското семејство потврди дека доаѓа.
Објавено е дека за време на церемонијата на крунисување тој нема да седи во првиот ред заедно со остатокот од кралското семејство, туку ќе мора да седи поназад.
Се верува дека Хари ќе се врати во Калифорнија кај своето семејство што е можно поскоро по церемонијата на крунисување за да го прослави четвртиот роденден на синот Арчи со Меган и децата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Европа
Барселона планира да забрани изнајмување станови на туристи
![](https://makfax.com.mk/wp-content/uploads/2021/05/barselona-turisti.jpeg)
Барселона денеска објави дека до 2028 година ќе го забрани издавањето станови на туристи, со што сака да го спречи растот на трошоците за домување и да им овозможи на граѓаните да живеат во свој град.
Левичарскиот градоначалник на градот, Жауме Колбони, рече дека до ноември 2028 година, Барселона ќе ги одземе лиценците на 10.101 станови кои моментално се лиценцирани за краткорочно изнајмување.
„Се справуваме со она што го сметаме за најголем проблем на Барселона“, рече Колбони на настанот на градската влада.
Краткорочниот бум на изнајмување во Барселона, најпосетуваниот град во Шпанија, остави некои граѓани да не можат да си дозволат кирија откако кириите се зголемија за 68 отсто, а цените на недвижниот имот за 38 отсто во изминатите 10 години, рече тој. Пристапот до домување стана двигател на нееднаквоста, особено за младите луѓе, додаде тој.
Во последните десет години, локалните власти воведоа ограничувања за краткорочно изнајмување на Канарските Острови, Лисабон и Берлин.
Социјалистичката министерка за домување на Шпанија, Изабел Родригез, рече дека ја поддржува одлуката.
„Станува збор за правење сè што е потребно за да се гарантира пристап до прифатливи станови“, објави таа на Икс.
Airbnb, платформата за изнајмување станови, не одговори на барањето за коментар.
„Колбони прави грешка што ќе доведе до сиромаштија и невработеност“, соопшти асоцијацијата за изнајмување на туристички станови во Барселона АПАРТУР, додавајќи дека забраната ќе доведе до зголемување на нелегалните изнајмувања на станови.
Одлуката ќе биде од корист за хотелите. Екстремно левичарската партија која владееше со Барселона од 2015 до 2023 година забрани отворање на нови хотели во најпопуларните области во градот, но Колбони навести дека може да ги ублажи ограничувањата.
Од хотелската асоцијација на Барселона не сакаа да ја коментираат веста.
Тие 10.000 станови ќе ги користат граѓаните или ќе завршат на пазарот под кирија или продажба“, рече градоначалникот.
Локалните власти најавија строги инспекции кога забраната ќе стапи на сила.
Во последниве години во Барселона не беше дозволена регистрација на нови туристички апартмани. Од 2016 година локалната власт нареди затворање на 9.700 диви туристички станови и речиси 3.500 станови повторно ги користат граѓаните за домување.
Европа
Русија: Треба да разговараме со САД, глобалната безбедност е загрозена, проблемите растат
![](https://makfax.com.mk/wp-content/uploads/2024/06/putin4-1.jpg)
Русија гледа итна потреба од безбедносни разговори со Соединетите Американски Држави, но тие мора да бидат сеопфатни и да го вклучуваат прашањето за Украина, соопшти денеска Кремљ. „Невозможно е да се извлечат поединечни делови од општиот комплекс на акумулирани проблеми, а ние нема да го сториме тоа“, рече портпаролот на Кремљ, Дмитриј Песков, на прашањето дали Москва е подготвена да разговара со Вашингтон за нуклеарните ризици.
„Отворени сме за дијалог, но за широк, сеопфатен дијалог кој ги опфаќа сите димензии, вклучително и сегашната димензија поврзана со конфликтот околу Украина, поврзана со директното учество на САД во овој конфликт“, рече Песков за новинарите. САД ги отфрлаат руските тврдења дека со вооружувањето на Украина станаа директен учесник во војната чија цел е да и се нанесе „стратешки пораз“ на Москва. Вашингтон вели дека какви било преговори за војната се во јурисдикција на Украина.
Руската позиција, како што ја претстави Песков, не е ништо ново, потсетува Ројтерс. Сепак, тој им рече на новинарите дека списокот на теми за кои Русија и САД треба да разговараат се зголемува. „Сè на сè, овој дијалог е многу неопходен. Неопходен е затоа што проблемите се натрупуваат, а има и многу тешкотии поврзани со глобалната безбедносна архитектура“, рече Песков.
Од перспектива на Вашингтон, рускиот претседател Владимир Путин, кој веќе трета година води војна во Украина, е одговорен за умножувањето на безбедносните проблеми.
Оваа недела Путин ја посети Северна Кореја, единствената земја која тестираше нуклеарно оружје во 21 век, и потпиша договор за заемна одбрана со нејзиниот лидер Ким Џонг Ун и рече дека можеби ќе му испрати руско оружје на Пјонгјанг како одговор на западното вооружување на Украина. .
Путин, исто така, во вторникот повтори дека размислува да ја ревидира руската доктрина за употреба на нуклеарно оружје. Најновиот договор за контрола на вооружувањето, кој го ограничува бројот на стратешки нуклеарни боеви глави што Русија и САД можат да ги распоредат, истекува во 2026 година.
Регион
(Видео) 11 загинати во пожари во Турција, и Грција се бори со огнот
![](https://makfax.com.mk/wp-content/uploads/2024/06/pozar-grcija.jpg)
Најмалку единаесет лица загинаа, а десетици се повредени во пожар со ниска вегетација што ветрот го прошири во неколку села на југоистокот на Турција, одземајќи животи на стотици животни, а со пожарите денеска се бори и Грција. Турскиот министер за здравство Фахретин Коча објави „единаесет смртни случаи и 78 повредени лица“, од кои пет морале да бидат примени на интензивна нега.
Коча претходно рече дека има „44 повредени, од кои десет лица во тешка состојба“, во оваа рурална област лоцирана меѓу градовите Дијарбекир и Мардин, во близина на сириската граница. На социјалните мрежи масовно се споделуваат фотографии од десетици кози, овци и магариња кои лежат во изгорената трева во претежно земјоделскиот и сточарскиот регион.
Според министерот за внатрешни работи Али Јерликаја, пожарот избувнал доцна во четвртокот поради палење на стрништа во област лоцирана на околу триесетина километри јужно од градот Дијарбакир, каде што термометарот преку ден се искачува над 40 степени. Пламените јазици се проширија со ветрот и брзо зафатија пет села.
Пожарот е ставен под контрола во текот на ноќта, но службите и денеска се на терен поради страв од повторно разгорување на пожарот, вели министерот.
И Грција во петокот се бори со неколку шумски пожари во јужниот дел на нејзиното копно, поттикнати од бурните ветрови. Десетици пожарникари со помош на осум авиони беа распоредени во регионите Ахаја и Илија и во близина на градот Краниди на полуостровот Пелопонез. На жителите на неколку села во овие области им било кажано да ги напуштат своите домови.
Шумските пожари се вообичаени во оваа медитеранска земја, но стануваат поразорни бидејќи летата стануваат потопли и суви, што научниците го поврзуваат со климатските промени.
„Брзината на ветерот често надминува 95 километри на час, што го спречува леталото да се приближи“, рече портпаролот на грчката противпожарна бригада Василис Ватракоганис на брифинг со новинарите.
„Сите сили за цивилна заштита денеска се во подготвеност“, додаде тој, бидејќи за неколку часа во земјата избувнаа околу 45 шумски пожари. Уште еден шумски пожар што накратко им се закануваше на домовите во крајбрежен град во близина на Атина беше ставен под контрола рано денеска, соопштија пожарникарите.