Свет
Детална реконструкција на масакрот во Москва: Мајките со своите тела ги штителе своите деца од терористите
![](https://makfax.com.mk/wp-content/uploads/2024/03/FotoJet-18.jpg)
Четири вооружени мажи мирно тргнале кон детекторите за метал во концертната сала Крокус, пукајќи со кратки рафали од автоматско оружје и на мал дострел кон преплашените цивили кои врескале и паднле под куршумите. Сведокот по име Наталија штотуку го соблекла палтото за време на масакрот во петокот вечерта, стоејќи пред влезот на концертната сала со 6.200 седишта надвор од Москва, каде што требаше да настапи рок група од советско време.
„Истрелите дојдоа од зад нас“, изјавила Наталија за Ројтерс, не сакајќи јавно да го открие своето презиме. Таа раскажала дека само што требало да влезе во салата кога слушнала необичен звук. „Беше гласно, како пукање на петарда, како огномет, како рафал од автоматско оружје. Слушнав веднаш зад мене, многу блиску“, рече Наталија и додаде дека веднаш почнала да трча, спасувајќи си го животот.
„Сите врескаа, сите трчаа“, додала. Таа рече дека успеала да побегне низ студената московска ноќ трчајќи без палто до блиската метро станица. „Беше страшно, како кошмар“, вели Наталија.
Ројтерс се обиде да го склопи мозаикот за тоа што се случи во московската концертна сала во петокот вечерта од интервјуа со сведоци, од видео снимки од местото на настанот и од руски официјални извештаи и извештаи на медиумите.
Во масакрот загинаа 133 лица, а десетици беа повредени во најсмртоносниот напад во Русија од опсадата на училиштето во Беслан во 2004 година. Исламска држава ја презеде одговорноста за нападот. Руските и светските медиуми претходно објавија дека 143 загинале.
Федералната служба за безбедност (ФСБ) објави дека во областа Брјанск се уапсени 11 лица, меѓу кои и четворица наводни напаѓачи. Тие биле приведени додека бегале кон границата, надевајќи се дека ќе побегнат во Украина. Киев веднаш негираше вмешаност во нападот.
Напаѓачите во маскирни костими и панцири
Мажите, кои беа облечени во маскирни костими и панцири со многу резервни шаржери, пристигнаа на градското собиралиште на Крокус со комбе околу 19:40 часот по локално време, скокнаа од задната врата и се упатија кон влезот со оружје, изјавија очевидци.
Тие пукаа директно низ стаклените врати на влезот на главниот хол, гаѓајќи го секој што им се најде на патот. Сведоците велат дека десетици тела лежеле во локви крв на подот од главниот влез. Некои успеаја да ги скршат зајакнатите прозорци и заклучените излези со раце додека пукотниците одекнуваа низ салата, на само 20 километри од Кремљ.
Откако пукале во луѓе на влезот во салата, напаѓачите успеале да упаднат во салата токму во моментот кога стотици посетители седнале на своите места за распродадениот концерт. „Некои мислеа дека тоа е некој вид на специјален ефект“, изјави сведокот Анастасија Родјонова за Ројтерс. „И тогаш сфатив дека луѓето паѓаат затоа што почна пукање од автоматско оружје“.
„Во тој момент се појавува инстинктот за самоодржување, очите ви се шират, каде да бегате? Тогаш некој ни викна: станете, не останувајте да лежите бидејќи сите ќе не застрелаат“. Родјонова рече дека некои мажи успеале да ја скршат вратата од улицата и да избегаат.
Преку системот за јавно обраќање се слушнала информација дека концертот се откажува од „технички причини“ и дека од луѓето се бара да ја напуштат салата.
Бегање пред рафалните истрели
Потврдената снимка покажува луѓе кои трчаат кон излезот додека континуираните пукотници се мешаат со вресоци. Напаѓачите поминуваат низ концертната сала, а потоа рафално пукаат во посетителите.
„Почнаа да пукаат во нас. Паднав на подот“, изјавила за новинарите повредената жена, која е задржана во болница во Москва. Таа вели дека успеала да ползи до излезот, а девојката до неа била убиена.
Некои побегнале од напаѓачите, други се сокриле зад седиштата. Една жена и рекла на својата пријателка да легне зад седиштето додека пукотницата станувала се посилна.
Руските истражители соопштија дека напаѓачите одлучиле да ја запалат зградата. Некои очевидци изјавија дека вооружени лица истуриле течност на седиштата и на завесите на неколку места, а потоа ги запалиле.
Очевидци рекоа и дека го прескокнале огнот обидувајќи се да побегнат од пожарот кој брзо се проширил на површина од 12.900 метри квадратни.
Еден од сведоците, Андреј, изјави за Ројтерс дека напаѓачите пукале и дека тој и неговите пријатели „успеале да избегаат користејќи ги противпожарните скали“.
На крајот, покривот се урна, а стотици пожарникари со часови се бореа да го локализираат пожарот кој ја уништи целата сала. Останаа само јагленосаните железни потпорни греди и челични рамки од стотици седишта.
Каналот База Телеграм, познат по добрите врски со руските специјални служби, објави дека 14 тела се пронајдени на скалите за евакуација, а 28 во еден од тоалетите. Пронајдени се тела на цели семејства, а особено шокантна е сцената на мртвите мајки кои се обиделе да ги заштитат со своите прегратки нивните деца.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Регион
Легендарниот рокер Бора Чорба погребан со хитот “Погледај дом свој анџеле“
![](https://makfax.com.mk/wp-content/uploads/2024/08/bora-corba.jpg)
Легендарниот рокер, фронтмен на групата „Рибља чорба“, Бора Ѓорѓевиќ (72) денес е погребан. Семејството, колегите, но и бројни пријатели и обожаватели се собраа на Градските гробишта во Чачак за да го кажат последното збогум и да се простат од него.
Хорот на гимназијата од Чачак по црковниот обред го испеа најголемиот хит на Бора „Погледај дом свој анџеле“, а овој момент расплака многумина и тоа беше најтажната сцена од гробиштата.
Рокерот Бора Ѓорѓевиќ (72) почина во средата на 4 септември во Љубљана по тешко боледување.Легендарниот рокер ќе почива во родниот Чачак, што му беше и последна желба.
Роден е на 1 ноември 1952 година.
Свет
Вселенското летало Старлајнер на Боинг слета без екипаж
![](https://makfax.com.mk/wp-content/uploads/2024/09/NASA.jpg)
Вселенското летало Старлајнер на Боинг слета без екипаж во пустината во Ново Мексико, со што заврши тримесечната пробна мисија отежната од технички проблеми.
Вселенското летало доцна синоќа самостојно го почна своето шестчасовно патување до Земјата, а астронаутите Буч Вилмор и Сани Вилијамс, првиот екипаж што леташе со Старлајнер, останаа на Меѓународната вселенска станица (МВС).
Беше одлучено Вилмор и Вилијамс да останат на МВЦ до февруари 2025 година, бидејќи Старлајнер се врати на Земјата користејќи маневри премногу опасни за екипажот.
Леталото повторно влезе во атмосферата на Земјата околу 5 часот утрово по средноевропско време, со орбитална брзина од приближно 27.400 километри на час.
Вилмор и Вилијамс ќе продолжат да спроведуваат научни експерименти додека се во вселената, а се очекува да се вратат на Земјата во февруари 2025 година со вселенско летало на компанијата СпејкИкс.
Свет
Регистриран прв случај на детска парализа во Пакистан по 16 години
![](https://makfax.com.mk/wp-content/uploads/2020/06/pakistan.png)
Пакистан планира итна акција за вакцинација следната недела, откако беше пријавен првиот случај на детска парализа во главниот град во последните 16 години, во услови на пораст на болеста во другите делови на земјата, соопштија денеска властите.
Повеќе од 33 милиони деца на возраст под 5 години ќе бидат вакцинирани од врата до врата почнувајќи од понеделник, рече шефот за полио Ајеша Раза, затоа што вкупниот број на нови случаи годинава се искачи на 17.
Ширењето на вирусот во регионот кој претходно беше прогласен за област без детска парализа претставува нов предизвик за програмата за искоренување финансирана заеднички од ОН и Фондацијата Гејтс, пренесува ДПА.
Случаите со детска парализа во Пакистан го достигнаа врвот од 147 болни во 2019 година, но се намалија на само шест минатата година.