Свет
Директор на компанија за вештачка интелигенција: Работните места ќе бидат избришани, никој не е свесен што доаѓа

Дарио Амодеи, извршен директор на Антропик, компанијата зад еден од најпопуларните модели на вештачка интелигенција Claude AI, издаде драматично предупредување: вештачката интелигенција би можела да елиминира до половина од сите канцелариски работни места на почетните нивоа во следните една до пет години, да ја поттикне невработеноста во САД на 10-20 проценти и да предизвика темелна трансформација на пазарот на трудот.
Во интервју за „Аксиос“, Амодеи ја повика американската влада и технолошката индустрија да престанат да го минимизираат обемот на кризата што се наѕира.
„Ние, како производители на оваа технологија, имаме должност да бидеме искрени за она што доаѓа. Мислам дека луѓето воопшто не се свесни за тоа“, рече Амодеи.
Според Амодеи, технолошкиот сектор, финансиите, правото, консалтингот и други канцелариски работни места се особено изложени, најмногу оние на почетно ниво. Додека другите технолошки лидери главно молчат, Амодеи вели дека повеќето работници немаат поим што се случува.
Иронично, тој ги развива алатките кои би можеле да го предизвикаат тој шок. Клод, агентот за вештачка интелигенција на Антропик, е меѓу најнапредните системи на пазарот. Неговата најнова верзија, веќе може да го контролира компјутерскиот интерфејс и да извршува сложени задачи, што го прави директен конкурент на луѓето во низа административни улоги.
Гугл досега инвестирал над 3 милијарди долари во Антропик, а планирани се уште 750 милиони долари за 2025 година, што му дава удел од 14 отсто, откриваат документите на американското Министерство за правда. Амазон инвестираше 8 милијарди долари.
Во исто време, Антропик ги објави Claude Opus 4 и Sonnet 4, за кои тврди дека поставуваат „нови стандарди во програмирањето, пресметките и системите за агенти“. Но, тестовите покажаа и темна страна: во симулирани ситуации, моделот демонстрираше однесување слично на уцена доколку му се закануваше деактивирање.
Амодеи ја гледа вештачката интелигенција како технологија со огромен потенцијал, но и огромни ризици:
„Замислете свет во кој ракот се лечи, економијата расте 10 проценти годишно, а една петтина од населението е без работа“.
Додека американскиот претседател Доналд Трамп главно молчи за вештачката интелигенција и пазарот на труд, Стив Банон, клучна фигура во неговата прва администрација, вели дека масовното исчезнување на канцелариските работни места за помладите работници ќе стане главно политичко прашање на изборите во 2028 година.
„Никој не размислува како административните, менаџерските и технолошките работни места за помлади од 30 години, тие клучни работни места во раната кариера, буквално ќе бидат избришани“, изјави Банон за „Аксиос“.
Амодеи тврди дека неговото предупредување го одразува она што многу водечки научници за вештачка интелигенција го признаваат приватно, додека веруваат во долгорочните придобивки, тие се длабоко загрижени за краткорочните последици ако работите продолжат со исто темпо, особено во вториот мандат на Трамп.
„Ние велиме: „Треба да бидете загрижени каде оди ова“, а одговорот е „Не ви веруваме, претерувате“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Ердоган ја претстави турската „Челична купола“

Турскиот претседател Реџеп Таип Ердоган вчера официјално го отвори интегрираниот систем за воздушна одбрана на Турција, познат како „Челична купола“, кој го опиша како пресвртница за земјата и нејзината одбранбена индустрија.
„Ова е знак на сила за Турција. Воведуваме нова ера за нашата сакана Турција во воздушната одбрана“, рече Ердоган на настан во објектите на одбранбената компанија Аселсан во Анкара. Владата на Ердоган го објави почетокот на развојот на Челичната купола, кој интегрира платформи за воздушна одбрана и сензори од морето и копното во мрежа за заштита на турското небо, во август минатата година.
Ердоган истакна дека најновата фаза од проектот се состои од 47 возила во вредност од речиси 400 милиони евра кои ќе „влеат доверба кај пријателите и страв кај непријателите“. Турската влада не прецизираше кога системот ќе биде целосно оперативен.
„Ниту една земја која нема способност да развива сопствени радарски и воздушни одбранбени системи не може да гледа кон иднината со доверба во однос на актуелните безбедносни предизвици, особено во нашиот регион“, рече Ердоган.
Турција претходно се обидуваше да ја зајакне својата воздушна одбрана со купување на ракетниот систем С-400 од Русија во 2019 година. Сепак, овој потег доведе до тоа Американците да ја суспендираат продажбата на невидливи авиони Ф-35 на Турција, поткопувајќи ги одбранбените цели на Анкара, пишуваат медиумите.
Конфликтите во Сирија и Украина, како и неодамнешните израелски напади врз Иран, ја интензивираа потребата на Турција да развива подобра воздушна одбрана.
Ердоган, исто така, ги претстави новите производствени капацитети на Аселсан, кои треба да се отворат во 2026 година. „Во следните 50 години, Турција ќе биде земја која не само што ги задоволува сопствените потреби, туку и ќе биде лидер во светот во својата технологија“, рече тој.
Фото: принтскрин
Свет
Зеленски: Очекуваме почеток на преговорите за пристапување во ЕУ

Украинскиот претседател Володимир Зеленски денес објави дека имал телефонски разговор со претседателката на Европската комисија, Урсула фон дер Лајен, и дека ѝ се заблагодарил за нејзината солидарност со Украинците по нападот на Русија врз Украина.
Зеленски потсети дека главна цел на нападот бил Киев, како и дека се во тек операции за пребарување и спасување.
Тој изјави дека разговарал со претседателот на ЕК за дипломатска работа за „запирање на убиствата и руската агресија воопшто“, како и за гарантирање на вистинска безбедност за Украинците.
„Разговаравме и за нашиот пат кон европска интеграција, за истовременото отворање на преговарачкиот кластер за Украина и Молдавија. Очекуваме позитивна одлука во блиска иднина“, нагласи Зеленски, пренесува порталот РБК Украина.
Зеленски нагласи дека сè додека Русија не преземе вистински чекори кон мирот, притисокот врз неа мора да се зголеми.
Како што изјави, фон дер Лајен го информирала за подготовката на нов пакет санкции и координацијата со другите партнери.
Фото: принтскрин
Свет
Стармер: Путин го саботира мирот, зградата на Британскиот совет во Киев беше бомбардирана

Британскиот премиер Кир Стармер го обвини рускиот претседател Владимир Путин дека „го саботира мирот“ откако руските сили испукаа две ракети кон зградата на Британскиот совет во Киев утрово.
Премиерот потврди дека канцелариите на Британскиот совет биле погодени и додаде дека сочувствува со „сите погодени од бесмислените руски напади врз Киев“.
„Путин убива деца и цивили и ги саботира надежите за мир. Ова крвопролевање мора да заврши“, напиша Стармер на платформата X.
Британскиот совет, кој нуди програми на англиски јазик за Украинците во главниот град, соопшти дека неговите канцеларии се „сериозно оштетени“ и дека еден ноќен чувар е повреден. Во јуни, Москва им забрани на граѓаните да работат со институцијата, тврдејќи дека тоа е параван за британски шпиони.
Зградата во која се наоѓа делегацијата на Европската Унија во Киев, исто така, беше тешко оштетена во нападите, според официјални лица на ЕУ, кои го нарекоа нападот „намерен“.
Русија испали вкупно 629 дронови и 31 ракета, при што загинаа најмалку 15 лица, вклучувајќи четири деца, јавуваат светските медиуми.
Русија тврди дека во синоќешните напади гаѓала воени објекти користејќи хиперсонични ракети.
Фото: принтскрин