Свет
„Дојдете земете ме, ве молам, сите се мртви“ – потресна аудиоснимка на девојче исчезнато во Газа
„Тенкот е до мене… доаѓа кон мене… многу е блиску. Дојдете… те молам, спаси ме! Сите се мртви“.
Овие потресни зборови ги кажува шестгодишното девојче Хинд Раџаб, кое исчезна во Газа на 29 јануари по нападот на нејзиниот семеен автомобил, во кој беа убиени нејзините роднини. Во застрашувачка аудиоснимка девојчето очајно повикува на помош откако останало заробено во автомобил со безживотните тела на шест члена на семејството.
Мајката на шестгодишното девојче, кое сѐ уште се води за исчезнато во центарот на Газа, со денови стои пред болницата со надеж дека ќерка ѝ ќе пристигне „во секој момент“, пишува Би-би-си.
Се верува дека Хинд е единствената преживеана од седумте патници во автомобилот, кој бил дел од конвојот врз кој бил отворен оган. Нејзината судбина сè уште не е позната, како и судбината на двајцата палестински работници на Црвената полумесечина, кои тргнале да ја спасат, а со кои е изгубен секаков контакт.
🚨FULL STORY.
For nearly a whole day, 6-year-old Hind Rajab has been trapped in a car with six dead members of her family.
6-year-old Hind and her 15-year old cousin Layan were the only survivors after the IOF opened fire on the car they were in yesterday.
This chilling… pic.twitter.com/wiLENYAtdc
— Censored Voice. (@CensoredNws) January 30, 2024
Вујко ѝ по мајка, Басар Хамада, неговата сопруга Анам и нивните четири деца беа убиени откако нивното црно „киа пиканто“ беше под израелски оган на 29 јануари. За време на телефонскиот повик до палестинската Црвена полумесечина (PRCS), чија снимка беше објавена, таа објасни дека нејзиното семејство било убиено.
„Ви велам дека се мртви“, рекла Хинд, како што пренесува „Дејли мејл“, а подоцна додала: „Тенкот е до мене… доаѓа кон мене… многу, многу блиску е“.
„Хинд постојано нѐ молеше да дојдеме да ја земеме, да испратиме некој да ја земе. Таа рече дека се стемнува“, изјави Рана ал-Фагех, работничка на Црвената полумесечина, која последен пат била во контакт со девојчето.
Рана сѐ уште е многу потресена од овој настан и рече дека екипата на итната спасувачка служба „се почувствувала парализирана“.
„Ѝ кажав дека ако падне ноќ и уште не можеме да испратиме тим, таа треба да се обиде да ги затвори очите и да се преправа дека играме криенка. Ѝ реков да ги затвори очите и да почне да брои“, вели Рана и додава дека за време на повикот слушнала истрели во заднина.
Иако Црвената полумесечина одлучи дека е доволно безбедно да испрати брза помош четири часа по повикот, тие набргу изгубија контакт со Хинд и немаа контакт со спасувачите.
Првата што зборуваше со Црвената полумесечина беше 15-годишната роднина на Хинд, Лајан Хамаде, која беше заробена во истото возило во близина на бензинска пумпа во градот Газа додека израелските тенкови и војници се приближуваа.
„Тие пукаат во нас. Тенкот е до мене“, се слуша како вели Лајан на друга аудиоснимка објавена од Црвената полумесечина, проследена со вресоци и звук од пукотници.
Во тој напад загинаа Лајан и уште пет члена на семејството, соопшти Црвената полумесечина. Единствената преживеана, Хинд, останала на линијата разговарајќи со Рана и со психологот три часа, кои се обиделе да ја смират додека се подготвувале да испратат брза помош.
„Рече дека сите околу неа се мртви или спиеле, била крајно исплашена, ме молеше да не ја прекинувам врската. Рече дека се плаши од темнината“, вели потресена Рана, но линијата неповратно се изгубила по неколку часа.
Диспечерите во еден момент успеале да го пренесат телефонскиот повик на Хинд на мајка ѝ, која се криела на друго место во Газа. Мајка ѝ изјавила за „Ал џезира“ дека една од последните работи што ѝ ги кажала Хинд е: „Ми недостигаш, мамо. Не оставај ме. Гладна сум. Повредена сум“.
Таа со денови чека пред болницата во Газа надевајќи се дека брзата помош ќе ѝ го донесе детето, но секој ден тие надежи се намалуваат.
Израелската војска соопшти дека не знаела за инцидентот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
„Веднаш пронајдете засолниште“: доаѓа Мелиса, најсилниот ураган во историјата
Ураганот Мелиса бргу се засили во текот на викендот и сега достигна статус од категорија 5 со ветрови од 160 километри на час. Националниот центар за урагани (NHC) предупредува дека Мелиса ќе ја погоди Јамајка во вторник како најсилниот ураган што некогаш го погодил островот.
Озлогласениот рекорд претходно го држеше ураганот Гилберт во 1988 година, кој имаше ветрови до 210 километри на час. Мелиса се формира како група грмотевици покрај западниот брег на Африка, потоа го премина Атлантикот и се разви во тропска бура северно од Венецуела на 21 октомври.
Се очекуваат од 380 до 760 милиметри дожд, а некои области на јужен Хаити и Јамајка би можеле да добијат повеќе од 1.000 милиметри. Ураганот се движи многу бавно, со брзина од само неколку километри на час, што го зголемува ризикот од долгорочно уништување.
„Побарајте засолниште сега“, соопшти NHC во недела наутро. „Штетните ветрови и обилните врнежи од дожд во текот на неделата и понеделникот ќе предизвикаат катастрофални поплави и многубројни лизгања на земјиштето пред да пристигнат најсилните налети на ветер в понеделник навечер и во вторник наутро“.
Мелиса веќе носи обилни дождови и тропски бури на Хаити, каде што се очекуваат поплави и лизгања на земјиштето, со потенцијално смртоносни последици, објавува Си-ен-ен.
Според најновите извештаи, најмалку три лица загинаа на Хаити, а четвртото во Доминиканската Република, каде што уште едно лице е исчезнато. Мелиса моментно се движи над невообичаено топлите океански води, потопли од просекот за ова време од годината, што дополнително го поттикнува и зајакнува ураганот. Топлите океански води поттикнуваат силни грмотевици и нагорни струења поради што Мелиса развила јасно, добро дефинирано око, знак дека станува збор за целосно формиран и многу моќен систем.
Симптомолозите предвидуваат дека Мелиса ќе ја задржи својата деструктивна моќ и ќе се движи многу бавно кон Карибите во следните неколку дена зголемувајќи го ризикот од долгорочни поплави и уништување. Потоа Мелиса би можела да ја погоди југоисточна Куба, каде што се очекуваат слични количини врнежи од вторник навечер до среда. Фактот дека овој ураган е невообичаено бавен е дополнителен проблем.
„Ниедна област нема да биде поштедена од разорната моќ на овој ураган“, рече Томпсон од Метеоролошката служба на Јамајка во саботата. „Бурата ќе остане над истата област носејќи обилни врнежи од дожд додека едвај се движи, што е сериозен предизвик, под услов прогнозите да се остварат“, предупреди тој.
Фото: принтскрин
Свет
Младите жени во Минхен се плашат да користат јавен превоз
Минихнскиот младински совет спроведе анкета меѓу жителите на баварската престолнина под 27 години со цел да утврди колку се чувствуваат безбедно младите во јавниот превоз. Резултатите покажаа загрижувачки трендови, особено кога станува збор за млади жени, објавува „Зидојче цајтунг“.
Додека повеќе од 95 проценти од младите изјавиле дека се чувствуваат безбедно во автобуси, метро и возови во текот на денот, ситуацијата драстично се менува ноќе – само 54 проценти од испитаниците се чувствуваат безбедно кога ќе се стемни.
Особено загрижувачки е фактот дека дури 75 проценти од младите жени целосно го избегнуваат јавниот превоз ноќе, а 38 проценти од мажите го искажаа истиот став. Истражувањето исто така откри дека 28 проценти од младите жени пријавиле дека биле жртви на сексуално вознемирување во јавниот превоз.
Истражувачите ги оценија овие податоци како шокантни и ги повикаа градските власти и транспортните компании итно да ги подобрат безбедносните мерки, да го зголемат присуството на обезбедувачи и да го подобрат осветлението на станиците и во возилата.
Фото: принтскрин
Свет
Владата на Литванија: Ја затвораме границата со Белорусија
На состанокот в среда литванската влада ќе разгледа предлог за затворање на литванско-белоруската граница на неодредено време, со исклучоци за дипломатите и граѓаните на ЕУ што патуваат од Белорусија, објави литванската премиерка Инга Ругињене додавајќи дека земјата не ја исклучува можноста за свикување консултации за активирање на Членот 4 од НАТО.
„Владата ќе одржи состанок о среда, а ние веќе подготвивме одлука за затворање на границата со Белорусија на неодредено време, со одредени исклучоци. Ова значи дека дипломатите и дипломатските пакети ќе може да патуваат, како и нашите граѓани и граѓаните на ЕУ од Белорусија, но целиот друг сообраќај ќе биде затворен“, рече Ругињене на прес-конференцијата што ја емитува порталот „Делфи“.
Таа изјави дека Литванија ќе ги координира санкциите со Европската Унија и, доколку е потребно, ќе побара активирање на тимот за хибриден одговор на НАТО.
„Министерството за надворешни работи на Литванија доби јасни задачи, пред сè, да координира со Европската Унија пакет дополнителни санкции против Белорусија. И тоа ќе биде направено за кратко време“, изјави Ругињене и додаде дека активно се консултираат и комуницираат со своите сојузници и соседи Полска и Латвија. Иако дипломатска пошта ќе може да се испраќа преку границата, на дипломатите ќе им биде дозволено да ја преминат границата, а на граѓаните на Литванија и на земјите од Европската Унија ќе им биде дозволено да влезат од белоруска страна, сите други движења ќе бидат затворени, истакна Ругињене.
„Вака испраќаме сигнал до Белорусија и велиме дека тука нема да се толерира никаков хибриден напад и дека ќе ги преземеме сите најстроги мерки за да ги спречиме ваквите напади“, истакна таа и додаде дека армијата ќе ги собори балоните.
Владата, рече таа, ќе се обиде да го измени и Кривичниот законик: ќе се предложи да се заострат казните за шверц, а покрај казните, сега се дискутира дека би можеле да се вклучат и затворски казни, рече таа, пренесува „Танјуг“.
Повеќе од 170 лета беа прекинати кога литванскиот воздушен простор беше затворен четирипати во изминатата недела поради шверцувани балони од Белорусија, изјави Видас Кшанас, директор на Одделот за безбедност, сигурност и отпорност на литванските аеродроми (LTOU).
Тој вели дека тоа влијаело на движењето на повеќе од 27.000 луѓе. „Имавме особено голем број прекини оваа недела – ако соберам колку летови беа прекинати, тоа се повеќе од 170. Тоа е огромен број патници, 27 илјади патници доживеаја непријатности оваа недела“, изјави Кшанас за радио ЛРТ.
Членот 4 им овозможува на земјите да повикаат на преговори со НАТО „секогаш кога, според мислењето на која било од нив, територијалниот интегритет, политичката независност или безбедноста на која било од страните се загрозени“.
Постапката е активирана само деветпати во историјата на НАТО, но релативно неодамна ја иницираа Полска и Естонија по два инцидента со руски повреди на воздушниот простор во септември, објавува „Ројтерс“.
Фото: принтскрин

