Свет
Европската комисија најави пропорционален одговор на американските царини

Следната недела Европската Комисија ќе воведе контрамерки како одговор на американските царини за увоз на алуминиум и челик, додека одговорот за воведувањето царини за автомобили и реципрочни тарифи од 20 проценти за голем број производи ќе следи по анализа и консултација со земјите-членки.
Од 12 март на сила е одлуката за 25 отсто царини за увоз на алуминиум и челик во САД од целиот свет, а од 3 април и 25 отсто за сите автомобили и автомобилски делови што не се произведуваат во САД.
На 2 април, американскиот претседател Доналд Трамп најави реципрочни царини, минимум 10 отсто за сите, а уште повисоки царини за околу 60 земји, кои ќе стапат во сила од среда, на 9 април. Тој воведе царини од 20 отсто за Европската унија и 34 отсто за Кина, но и 33 отсто за Македонија.
Останува нејасно дали најавените тарифи ќе останат трајни или се дел од тактиката за добивање отстапки. Трамп рече дека царините ќе му дадат „голема преговарачка моќ“.
До средината на минатата недела, Комисијата ги консултираше земјите-членки за контрамерки на американските царини за челик и алуминиум, а одлуката се очекува да биде донесена во среда и да стапи на сила на 15 април.
Одлуката се носи на предлог на Комисијата во рамките на комитолошката постапка, што во пракса значи дека Комисијата може да донесе одлука доколку на неа не се спротивстави квалификувано мнозинство (55 отсто од земјите-членки кои претставуваат најмалку 65 отсто од вкупното население на ЕУ). Во случај да нема квалификувано мнозинство за или против предлогот, Комисијата може самостојно да донесе одлука.
Комисијата најави пропорционален одговор до 26 милијарди евра, што одговара на економскиот опсег на американските царини.
Во однос на контрамерките на американските царини за автомобили и автоделови и за реципрочните царини од 20 проценти, Комисијата посочува дека нема да избрзува, дека сака се детално да анализира.
Комисијата не сака да каже какви мерки би можела да преземе и нагласува дека „се е на маса“.
„Сите опции се на маса и не сакаме да шпекулираме што ќе правиме“, изјави за новинарите висок функционер на Комисијата кој сакаше да остане анонимен. Притоа ќе се води сметка евентуалните контрамерки да бидат што поболни за САД, а во исто време да и донесат што помала штета на Европа, односно да се воведат царини за американските производи за кои постои алтернатива.
„Нема да воведеме царини за производи што не ги произведуваме, додека Американците воведоа царини, на пример, за кафе или банани, кои тие воопшто не ги произведуваат“, изјави неименуван претставник на Комисијата. Тој додаде дека Европејците имаат алтернативи, на пример за мотоцикли „Харли Дејвидсон“, фармерки „Левис“ или соја.
Според првите проценки на Комисијата, реципрочните царини од 20 отсто се однесуваат на околу 290 милијарди евра европски извоз во САД, што на Американците би им донело приход од 58 милијарди евра.
На автомобили и автоделови што ЕУ ги извезува во вредност од околу 66 милијарди евра, приходот од царина од 25 отсто би изнесувал 16,5 милијарди евра, додека на извозот на алуминиум и челик во износ од 26 милијарди евра, царинскиот приход би изнесувал 6,5 милијарди евра.
Севкупно, дополнителните американски царини се однесуваат на стоки во вредност од околу 380 милијарди евра, што е околу 70 отсто од вкупниот извоз од ЕУ во САД. Со ова Соединетите Американски Држави би оствариле царински приход од 81 милијарда евра годишно, наместо досегашните 7 милијарди. Но, сумата од околу 80 милијарди можеше да се достигне само под услов обемот на трговската размена да остане ист, што не е логично да се очекува бидејќи обемот на трговијата се намалува со царинските бариери.
Комисијата има ексклузивна јурисдикција над надворешната трговија и земјите-членки не можат директно да преговараат со администрацијата на Трамп. Истовремено, мора да се внимава рамномерно да се распредели товарот на контрамерките, бидејќи не сите членки се подеднакво зависни од трговијата со американскиот пазар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Финскиот премиер: Трамп треба да ѝ дозволи на Украина да користи ракети „Томахавк“

Финскиот премиер Петери Орпо изјави во интервју за „Политико“ дека претседателот на САД, Доналд Трамп, треба да ѝ дозволи на Украина да користи американски крстосувачки ракети „Томахавк“ за напади длабоко во руската територија.
„Путин верува само во сила. Ако сакаме да го запреме овој војна, мора да бидеме на иста или посилна позиција,“ изјави Орпо во Брисел, по пристигнувањето на самитот на ЕУ.
Повикот следи по новиот пакет санкции на Трамп против „Росњефт“ и „Лукоил“, што е досега најсилниот потег на Вашингтон против Москва.
Трамп, сепак, изјави дека не сака да дозволи користење на Томахавк.
Орпо нагласи дека Украина мора да добие капацитети за контранапад и одбрана, додавајќи дека се надева САД и Киев ќе најдат заедничко решение.
На самитот во Брисел, лидерите на ЕУ разговараат и за употребата на замрзнатиот руски имот за финансирање на Украина, во вредност до 140 милијарди евра. Орпо порача дека Европа треба да има глас во тоа како ќе се користат средствата, но и дека Киев мора да има можност да купува оружје и од Европа и од САД.
„Ако најдеме начин долгорочно да ја финансираме Украина, тоа ќе биде силна порака до Путин дека не може да победи во овој војна.“, додаде.
Свет
Љубовница го тужи поранешниот шеф на „Гугл“: „Не можев да испратам ниту мејл без надзор“

Мишел Ритер (31), поранешна партнерка на поранешниот извршен директор на Google, Ерик Шмит (70), го обвини за злоупотреба, прогонување и токсична машкост, барајќи забрана за приближување, според судските документи што ги поднела во декември 2024 година, барајќи забрана за приближување. Обвиненијата беа поднесени само една недела откако двојката склучи писмен договор со кој Шмит требаше да ѝ плати „значителна сума“, објави „Пејџ Сикс“.
Во тужбата, Ритер – дипломирана на Правниот факултет на Колумбија – тврди дека Шмит ја надгледувал дигитално, ѝ го ограничил пристапот до нејзиниот стартап Steel Perlot, во кој тој вложил 100 милиони долари, и дека не можела да оствари ниту еден приватен повик или е-пошта без надзор, пренесе „Индекс“.
Ритер и Шмит биле во врска од 2021 до 2024 година.
Шмитовите адвокати ги нарекоа обвинувањата „лажни и злоупотреба на судскиот систем“. Новото рочиште е закажано за 4 декември во Лос Анџелес.
Свет
Реперот Диди нападнат во затвор – затвореник му ставил нож под грло

Американскиот музички могул Шон Комбс – Диди (55) преживеал опасен инцидент во затворот во Бруклин, кога друг затвореник му ставил нож под грлото додека спиел.
Неговиот пријател Чарлучи Фини изјави дека нападот бил обид за застрашување, а адвокатот на Диди, Брајан Стил, потврди дека чуварот навреме го спречил напаѓачот, кој сакал да стекне престиж напаѓајќи позната личност.
Диди, кој издржува четиригодишна затворска казна по обвинение за учество во проституција, наводно побарал претседателско помилување од Доналд Трамп.