Регион
Европскиот парламент пред конечна одлука за визната либерализација за Косово

Европскиот парламент денеска треба да го заврши процесот на одлучување за визната либерализација за граѓаните на Косово, пренесува Радио Слободна Европа.
На последното во синџирот гласања што почна на почетокот на годинава се очекува европските претставници на денешната пленарна седница да гласаат за одобрување за укинување на визниот режим за Косово.
Со гласање во ЕП и потпишувањето на правниот акт се завршуваат сите релевантни процедури за укинување на визниот режим. Одлуката за визна либерализација стапува во сила со нејзиното објавување во „Службениот весник на Европската Унија (ЕУ)“, кое следува 20-ина дена подоцна.
По гласањето во Европскиот парламент, в среда, 19 април, ќе се одржи церемонија за потпишување на правниот акт, на која ќе присуствуваат претставници на ЕП и на Советот на министрите на ЕУ – двете европски институции што одлучуваат за визна либерализација и одобруваат укинување на визниот режим за една земја.
Граѓаните на Косово сепак ќе треба да го почекаат почетокот на следната година за да уживаат во безвизниот режим со европските земји во шенген-зоната.
Според одлуката усогласена во декември минатата година, визниот режим за Косово ќе биде укинат паралелно со функционирањето на информацискиот систем ЕТИАС, но најдоцна до 1 јануари 2024 година.
Кога одлуката беше договорена, се сметаше дека системот ЕТИАС ќе профункционира на 1 ноември 2023 година, но сега е извесно дека операбилноста на системот ќе биде одложена до крајот на следната година.
Европската комисија препорача укинување на визниот режим со Косово уште во 2018 година, но политичката одлука беше заложник на внатрешните проблеми во некои земји членки на Унијата.
По неколкугодишен застој, прашањето за визите повторно заживеа кога во пресрет на руската агресија врз Украина ЕУ презеде неколку позитивни чекори кон регионот во обид да ги намали руското влијание и последиците од војната.
Така, Брисел одлучи да ги отвори пристапните преговори со Македонија и Албанија и да ѝ додели кандидатски статус на Босна и Херцеговина, па во овој контекст заживувањето на процедурата за визна либерализација за Косово беше следниот логичен чекор.
Со укинувањето на визниот режим Косово им се приклучува на соседите во регионот, чии граѓани повеќе од една деценија уживаат во слободата на движење.
Македонија, Србија и Црна Гора немаат визен режим од декември 2009 година, а Албанија и Босна и Херцеговина се префрлија на т.н. бела шенген-листа во декември 2010 година.
Процесот на либерализација со Косово траеше најдолго во споредба со другите земји од Западен Балкан.
Во средината на процесот, во 2016 година, Европската комисија додаде уште еден услов поврзан со ратификацијата на границата со соседна Црна Гора, а во 2018 година ЕК заклучи дека Косово ги исполнува сите услови и побара од земјите членки на ЕУ да ја одобрат визната либерализација.
Земјите членки на ова одговорија дури на крајот на 2022 година кога почнаа процедурите за носење на конечната одлука.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Пукањето во Белград на само 300 метри од куќата на Мирослав Илиќ, пејачот се огласи: „Боже господе, што се случува“

Во пукањето во Вишњичка бања се повредени пет лица, меѓу нив и една жена за чијшто живот се борат лекарите.
Според неофицијални информации, на пукањето му претходела тепачка, а сè се случило на нешто повеќе од 300 метри од куќата на познатиот пејач на народна музика, Мирослав Илиќ, пишува „Блиц“.
Илиќ по повод настанот се огласи за домашните медиуми.
„Живеам во мирна улица, во мирен крај. Чувај Боже што се случува. Не сум гледал вести и не сакам да знам“, изјави Мирослав за Телеграф.
Иако првичните информации укажуваа дека една жена починала, докторите во Ургентниот центар успеале да ја оживеат.
Неофицијално, повеќе вооружени лица излегле од бело комбе и почнале да пукаат. Овие информации засега не се официјално потврдени, а во тек е полициска потера по напаѓачите.
Очевидци опишале дека од белото комбе излегле неколку лица и почнале да пукаат насекаде.
Регион
(Видео) Полицијата се’ уште трага по напаѓачите по пукањето во кафулето во Белград

Пет лица беа ранети во пукање во кафуле во белградската населба Вишњичка бања, а едно лице е во животна опасност. Напаѓачите, кои пристигнале со бело комбе, влегле во локалот и отвориле оган по гостите.
Повредените – две жени и три мажи – се пренесени во Ургентниот центар. Полицијата покрена акција и сè уште трага по сторителите, јавува „Н1“.
Очевидци раскажаа дека на автобуската станица во близина имало голем број деца кои се разбегале уплашени, а пристигнувањето на итната помош се чекало долго. Жителите потсетуваат дека веќе подолг период имаат проблеми со навивачки групи во оваа населба.
Регион
Детали за пукањето во Белград: Напаѓачите дошле со комбе до кафулето и почнале да пукаат кон гостите

Репортерка на „Н1 Белград“ од Вишњичка бања, каде денеска околу 14:30 часот се случи пукање во кое пет лица беа ранети, јави дека едно комбе дошло по Сланачки пат до локалниот бар и почнало да пука по присутните.
Претходно повеќе медиуми објавија дека починала жена, но според информациите од српската полиција, петмина се повредени. „Еуроњуз“ јави дека жената била донесена во болница без знаци на живот, но спасена е со реанимација. Во моментот се наоѓа во тешка состојба.
На местото на настанот има полиција и форензичари, а полицајците ги замолиле медиумските екипи да се оддалечат бидејќи е во тек увид.
Според жителите, кафулето е познато по тоа што таму се собираат и навивачи, а во него има и простор наменет за деца.
Не е познато дали во моментот на пукањето имало деца во кафулето, но жители и очевидци изјавиле дека на автобуската станица имало голем број деца кои се уплашиле и се разбегале, и додале дека долго се чекало на пристигнувањето на итната помош.
Жителите посочиле дека последните месеци имале големи проблеми со навивачки групи, за што редовно пријавувале во полиција. Полицијата и обвинителството реагирале кога медиумите укажувале на тоа.
„За нив ова е шокантно, но не толку изненадувачко, затоа што навивачките групи одамна прават проблеми,“ јави репортерката на „Н1“.
Засега нема официјални информации за мотивот за пукањето, а српски „Телеграф“ пишува дека станува збор за пресметка меѓу навивачи.