Свет
ЕСП ги спречи депортациите на мигрантите дури и ако тие се безбедносна закана

Европскиот суд на правдата (ЕСП) донесе серија пресуди за случаите на депортација кои вклучуваат мигранти што или биле осудени за кривични дела или биле сметани за закана за безбедноста, одбивајќи да дозволи нивна депортација во случај да се соочуваат со тортура во нивните земји, пренесува „Ил џорнале“.
Трите случаи за кои судот донесе одлука вклучуваат мигранти од Конго, Брегот на Слоновата Коска и од Чеченија на кои им било одбиено правото на азил во Белгија или во Чешка бидејќи биле осудени за тешки кривични дела или биле сметани за закана за националната безбедност.
Судот рече дека одбивањето на азилот не значи дека барателите на азил ќе бидат автоматски депортирани, велејќи дека сè уште се под заштита на Женевската конвенција и дека ако постојат разумни докази оти ќе бидат мачени или убиени во нивните матични земји, мигрантите не може да бидат депортирани од Европа.
Судијата ја блокираше нелегалната депортација врз основа на загриженоста за човековите права иако бил свесен дека Иранецот лажел дека преминал во христијанство.
Пресудата може да биде удар за популистичкиот италијански министер за внатрешни работи, Матео Салвини, кој вети дека ќе почне депортација на мигрантите криминалци во нивните матични земји и издвои пари за да помогне во преговорите за трансферот на нелегалните мигранти во земјите со кои Италија нема договори за репатријација.
Салвини реагираше на пресудата велејќи:
„Заради ова е важно да ја смените оваа Европа со гласање за Лига на 26 мај“, и додаде, „сепак, нема да се премислам и не го менувам законот. Барателите на азил што силуваат, крадат и продаваат дрога ќе бидат вратени дома. Во Уредбата за безбедност постојат уште построги правила против шверцерите и трговците со луѓе”.
Миграцијата и безбедносниот декрет беа изготвени и усвоени од италијанскиот парламент минатата година и покрај критиките од сенаторите од Движењето Пет ѕвезди, коалицискиот партнер на Салвини.
Со Уредбата, исто така, се укинува хуманитарната дозвола за престој поради што владата очекува околу 2.000 мигранти месечно да ја напуштат земјата за да се вратат во своите татковини.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израел со одговор на Британија: Промената на ставот го наградува Хамас и им штети на мировните напори

Министерството за надворешни работи на Израел реагираше на најавата на Велика Британија дека ќе ја признае Палестина доколку Израел не преземе конкретни чекори кон прекин на конфликтот во Газа и обновување на мировниот процес што води кон решение за две држави.
„Промената на ставот на британската влада во овој момент, по францускиот потег и внатрешниот политички притисок, претставува награда за Хамас и им штети на напорите за постигнување прекин на огнот во Газа и рамка за ослободување на заложниците“, се вели во соопштението на израелското Министерство за надворешни работи на X.
Британскиот премиер Кир Стармер го објави потенцијалниот потег неколку дена откако францускиот претседател Емануел Макрон изјави дека Париз ќе ја признае палестинската држава на Генералното собрание на Обединетите нации во септември.
Во официјалното соопштение од Даунинг стрит се наведува дека признавањето на Палестина е „неотуѓиво право на палестинскиот народ“ и дека ставот на британската влада отсекогаш бил дека признавањето ќе биде дел од поширокиот мировен процес, според медиумите.
Сепак, се наведува дека поради „сè понеподносливата ситуација во Газа и намалената надеж за мировен процес“, сегашниот контекст бара порешителна акција.
Стармер истакна дека признавањето ќе следи ако израелската влада не се согласи на итен и траен прекин на огнот, јасна посветеност на мировен процес што води кон решение за две држави и недвосмислена посветеност дека нема да има анексија на територија на Западниот Брег.
Тој, исто така, повтори дека „нема еквивалентност меѓу Израел и Хамас“ и дека барањата на Велика Британија кон Хамас остануваат: ослободување на сите заложници, прифаќање на прекин на огнот, откажување од каква било политичка улога во идното управување со Газа и целосно разоружување.
Фото: принтскрин
Свет
Велика Британија: Ќе ја признаеме Палестина во септември ако Израел не се согласи со нашите услови

Велика Британија ќе признае палестинска држава во септември ако Израел не се согласи на прекин на огнот во Газа, не дозволи помош од ОН и не преземе други чекори кон долгорочен мир, објави британскиот премиер Кир Стармер, според светските медиуми.
Стармер свика редок летен состанок на кабинетот за да се разговара за ситуацијата во Газа.
Тој им рече дека Велика Британија ќе ја признае државата Палестина пред Генералното собрание на Обединетите нации, „освен ако израелската влада не преземе значајни чекори за да ја заврши ужасната ситуација во Газа, не постигне прекин на огнот, не вети дека нема да има анексија на Западниот Брег и не се обврзе на долгорочен мировен процес што ќе обезбеди решение за две држави“.
Тој исто така рече дека Хамас мора да ги ослободи сите заложници што ги држи, да се согласи на прекин на огнот, „да прифати дека нема да игра никаква улога во владата на Газа и да се обврзе на разоружување“. Во телевизиска изјава, Стармер рече дека неговата влада ќе го процени „степенот до кој страните ги исполниле овие чекори“ во септември пред да донесе конечна одлука за признавање.
Велика Британија долго време ја поддржува идејата за постоење на независна палестинска држава покрај Израел, но верува дека признавањето треба да дојде како дел од договореното решение за конфликтот.
Притисокот за формално признавање на палестинската државност се зголеми откако францускиот претседател Емануел Макрон објави дека неговата земја ќе стане првата голема западна сила што ќе признае палестинска држава.
Повеќе од 250 од вкупно 650 пратеници во Долниот дом потпишаа писмо со кое ја повикуваат британската влада да признае палестинска држава. Стармер истакна дека и покрај условите што ги поставил, Велика Британија верува дека „државноста е неотуѓиво право на палестинскиот народ“, пренесуваат агенциите.
Фото: принтскрин
Регион
Млад човек се удави во Улцињ: трагедија во Црна Гора

Млад човек се удави во Улцињ денеска, во попладневните часови, јавуваат медиумите во регионот.
Според написите, давењето се случило на „Големата плажа“.
Засега нема информации за идентитетот на загинатиот.
Според последните извештаи било подигнато црвено знаме бидејќи имало големи бранови во морето.