Висок функционер на Европската Унија предупреди дека мировниот план на Доналд Трамп за Украина не смее да го ослободи Владимир Путин од одговорност за воените злосторства поставувајќи јасна црвена линија за Брисел за каков било иден договор.

Во едно интервју европскиот комесар за правда и демократија, Мајкл Мекграт, нагласи дека разговорите за прекин на огнот не смее да резултираат со тоа што Русија ќе избегне гонење за своите постапки, објави „Политико“.

Коментарите на Мекграт одразуваат длабока загриженост во цела Европа поради нацрт-договорот на САД, кој наводно вклучувал „целосна амнестија за дела извршени за време на војната“ и планови за брза реинтеграција на Русија во глобалната економија. Таквиот пристап кон рехабилитацијата на Кремљ е спротивен на меѓународната осуда на многубројни злосторства, како што се киднапирањето на 20.000 украински деца и бруталните напади врз цивили во Буча, Мариупол и други градови.

„Не мислам дека историјата ќе суди благонаклоно за секој обид да се заборават руските злосторства во Украина“, рече Мекграт. „Тие мора да бидат одговорни за овие злосторства, а тоа ќе биде пристапот на Европската Унија во сите овие дискусии“.

„Ако го направиме тоа, да дозволиме неказнивост за тие злосторства, ќе сееме семе на следната рунда агресија и на следната инвазија“, додаде тој. „И верувам дека тоа би била историска грешка од огромни размери“.

Украинските власти почнаа повеќе од 178.000 истраги за наводни руски злосторства од почетокот на инвазијата. Минатиот месец панел на Обединетите нации откри дека руските власти извршиле злосторства против човештвото со напади со беспилотни летала врз цивили, како и воени злосторства со присилно преместување и депортација.

„Не можеме да се откажеме од правата на жртвите на руската агресија и руските злосторства“, рече Мекграт. „Милиони животи се одземени или уништени, луѓето се насилно отстранети, а имаме изобилство докази“.

Додека ЕУ работи со партнерите за формирање специјален суд за кривично дело агресија, а Меѓународниот кривичен суд издаде налог за апсење на Путин во март 2023 година за нелегална депортација на деца, Трамп и неговиот тим покажаа мал интерес за негово гонење.

Претседателот на САД постојано го опишува својот руски колега во позитивно светло зборувајќи за добри разговори и надежи за нови економски и енергетски партнерства. Двајцата лидери исто така наводно разговарале за организирање хокеарски натпревари меѓу САД и Русија по завршувањето на војната.

Овој тон продолжува и во нацрт-мировниот план од 28 точки што неодамна го презентира тимот на Трамп. Во документот се наведува дека „Русија ќе биде реинтегрирана во глобалната економија“ и се повикува на нејзино враќање во групата Г8, од која беше исклучена во 2014 година по анексијата на Крим.

Планот исто така предвидува склучување долгорочен договор за економска соработка меѓу САД и Русија во клучни сектори, како што се енергетиката, инфраструктурата, вештачката интелигенција и рударството на ретки метали.

Планот на САД исто така предлага постепено укинување на санкциите врз Русија, но европските лидери инсистираат дека одлуката за санкциите на ЕУ е исклучиво нивна одговорност. Сепак, не сите членки на ЕУ го делат истиот став.

Унгарија постојано блокира нови пакет-санкции, особено оние поврзани со нафтата и гасот од кои зависи. Во исто време, истакнати политичари во Германија ја споменаа можноста за укинување на санкциите врз гасоводот „Северен тек“.

фото/епа