Додека Ерусалим ужива во цврстите врски со Вашингтон, висок европски претставник во вторникот го предупредил Израел да не ја омаловажува ЕУ, додавајќи дека политиката на американскиот претседател, Доналд Трамп, може да исчезне исто толку брзо колку и на неговиот претходник Барак Обама.

„Трамп нема да биде претседател засекогаш. Исто како што никој не замислуваше дека политиката на Обама ќе биде избришана толку брзо, тоа може да се случи и со другата страна. Вие не треба да ја омаловажувате Европа. Погледнете ги броевите: Сè уште сме ваши најголеми трговски партнери. Вие не разбирате дека сме под силен јавен притисок против Израел”, „ТВ Хадашот“ во вторникот го цитираше неименуваниот официјален претставник за време на неодамнешната посета на Израел.

Израел и ЕУ се „на нож“ во последно време поради начинот на кој израелските сили се справија со масовните протести и немири на границата со Појасот Газа, како и поради одлуката на Трамп за еднострано повлекување од нуклеарниот договор со Иран, за што премиерот Нетанјаху изрази поддршка, а разлика од Европа, која повикува договорот да остане на сила. Израел, исто така, го поздрави преместувањето на Амбасадата во САД во Ерусалим минатата недела, потег што Европа го осуди.

Израелското Министерство за надворешни работи во понеделникот и вторникот ги прекори амбасадорите на Словенија, Шпанија и на Белгија откако нивните земји во петокот гласаа во корист на истрагата на Советот за човекови права на ОН во врска со смртните случаи на границата во Појасот Газа предизвикани од ИДФ. Предлогот беше поддржан од 29 земји, 14 се воздржаа, а само две земји – САД и Австралија – гласаа против истрагата. Нетанјаху, исто така, жестоко ја осуди ЕУ поради нејзините политики кон Израел.

Претходно во вторникот израелскиот министер за јавна безбедност, Гилад Ердан, жестоко ја критикуваше ЕУ велејќи дека блокот не треба да се меша во израелските внатрешни прашања откако ЕУ побара истрага за наводната полициска бруталност на демонстрациите во Хаифа.

„Израел, единствената демократија на Блискиот Исток, нема потреба од никакви морални предупредувачки повици од пристрасен и опсесивен ентитет како што е Европската Унија”, рече Ердан, нарекувајќи ја ЕУ лицемерна и обвинувајќи ја дека им помага на оние што сакаат да го бојкотираат Израел.

Ердан реагираше на повикот на Европската Унија за истрага за наводниот напад врз Џафар Фарах, директор на невладината организација „Мосава“, центар за застапување за арапските граѓани во Израел, која е делумно финансирана од ЕУ.