Свет
ЕУ ќе ја снабдува Украина со приходите од замрзнатиот руски имот, блокадата на Унгарија е заобиколена

Министрите за надворешни работи на ЕУ во Луксембург се договорија за правна рамка за користење на приходите од замрзнатиот руски имот за помош на Украина, заобиколувајќи ја унгарската блокада, изјави шефот за надворешна политика на ЕУ, Жозеп Борел.
Борел рече дека ЕУ нашла начин да ја заобиколи унгарската блокада и дека веќе следната недела ќе испрати 1,4 милијарди евра приходи од замрзнатиот руски имот за да и помогне на Украина со оружје и муниција.
„Законски гледано, бидејќи една земја-членка не учествуваше во одлуката за користење на приходите од замрзнати руски средства, нема право да учествува во одлучувањето за кои цели ќе се користат тие средства. Сега ќе ја забрзаме работата без блокади. “, рече Борел.
Според некои извори, приходот од замрзнатите руски средства би бил проследен до некои земји-членки на ЕУ, кои потоа би го купиле она што и е потребно на Украина и ќе го испорачаат.
Во однос на исплатата на средствата од Европскиот мировен фонд (ЕПФ), Унгарија сè уште блокира 6,6 милијарди евра помош за Украина, бидејќи за тоа е потребен консензус од сите земји-членки.
Меѓутоа, од ова всушност не беше директно оштетена Украина, туку земјите-членки кои ја снабдуваа Украина со оружје и муниција од нивните залихи, а за тоа треба да бидат платени од ЕПФ, вонбуџетски фонд кој има за цел да ја зајакне способноста на ЕУ за спречување на конфликти, градење и зачувување на мирот и зајакнување на меѓународната безбедност и стабилност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Русија во текот на ноќта лансираше 85 беспилотни летала кон Украина

Русија во текот на ноќта лансираше 85 беспилотни летала и една балистичка ракета кон територијата на Украина, објавија утринава украинските воздухопловни сили.
Нападите во текот на ноќта беа насочени кон области на линијата на фронтот во регионите Суми, Доњецк, Чернигов и Дњепропетровск, објавија воздухопловните сили на каналот Телеграм.
Оттаму, исто така, наведуваат дека нивните единици за противвоздушна одбрана уништиле 61 беспилотно летало.
Главниот штаб на украинските вооружени сили објави во својот дневен утрински извештај дека во текот на изминатите 24 часа на линијата на фронтот имало 139 судири со непријателот.
Од друга страна, руските системи за противвоздушна одбрана во текот на ноќта пресретнале и уништиле 29 украински дронови над различни руски региони, вклучувајќи 10 беспилотни летала над Ростовскиот регион, објавија утринава руските медиуми, повикувајќи се на руското Министерство за одбрана.
Американскиот претседател Доналд Трамп и неговиот руски колега Владимир Путин, по нивната вчерашна средба во Алјаска, не споменаа ништо за потенцијален прекин на огнот во војната во Украина.
Свет
Зеленски во понеделник ќе отпатува за Вашингтон на разговори со Трамп

Украинскиот претседател Володимир Зеленски во понеделник ќе отпатува за Вашингтон на разговори со американскиот претседател Доналд Трамп, објави Зеленски на Телеграм по денешниот телефонски разговор со Трамп, јави ДПА.
Зеленски рече дека претходно телчефонски разговарал со Трамп повеќе од час и половина, откако американскиот претседател синоќа се сретна со рускиот лидер Владимир Путин во Алјаска.
„Во понеделник ќе разговараме за сите детали во врска со завршувањето на убиствата и војната“, рече Зеленски, додавајќи дека е „благодарен за поканата“
Регион
Еди Рама вети бесплатни нови куќи за оние кои во пожарите ги загубија своите домови

По катастрофалните пожари кои деновиве зафатија делови од Албанија, уништувајќи домови и имоти, премиерот Еди Рама излезе со силно и директно ветување до сите настрадани граѓани. Во објава на социјалните мрежи, тој најави дека државата целосно ќе ги обесштети сите што претрпеле штета, вклучително и бесплатна обнова на секој уништен дом.
„Кој и да го изгубил својот дом, ќе го обновиме бесплатно, кој и да изгубил добиток, ќе го рефинансираме еден по еден“, напиша Рама на социјалните мрежи.
Оваа мерка, како што појасни министерот за одбрана Пиро Венгу, ќе се спроведува преку општините. Ќе се формираат посебни комисии за проценка на штетите на куќи, инфраструктура, бизниси и земјоделски култури, по што ќе следува обештетување од општинските фондови за цивилна заштита, поддржани од државниот буџет.