Свет
Е-пораки до Епстин и доверливи извештаи – причините за апсењето на принцот Ендрју
Ендрју Маунтбатен-Виндзор, поранешен принц, утрово е уапсен во својот дом на имотот Сандрингем поради сомнение за злоупотреба на положба и овластувања. Апсењето следуваше откако неодамна објавени документи поврзани со Џефри Епстин откриле дека поранешниот војвода од Јорк, како британски трговски пратеник, наводно споделувал доверливи информации со осудениот финансиер и други лица.
Пред објавувањето на милионите документи од истрагите за Џефри Епстин минатиот месец, се очекуваше Маунтбатен-Виндзор да се соочи со апсење поради обвиненија за сексуално злоставување. Починатата Вирџинија Џуфре го обвини за силување, што тој постојано го негираше, а во 2022 година ѝ исплати околу 12 милиони фунти во рамки на спогодба во граѓанска постапка.
Меѓутоа, новите документи ја насочиле полициската истрага во сосема нов правец. Во моментов, вкупно осум британски полициски служби истражуваат различни обвиненија поврзани со братот на кралот. Маунтбатен-Виндзор повеќепати ги негирал сите обвиненија, и оние за сексуално злоставување и оние за злоупотреба на положба.
Сомнителни е-пораки до Епстин
Како што „Телеграф“ објави претходно овој месец, електронските пораки што Маунтбатен-Виндзор му ги испраќал на Епстин додека бил трговски пратеник покажуваат дека со осудениот педофил споделувал доверливи информации. Во октомври 2010 година му препратил службени извештаи од своите посети на Сингапур, Виетнам, Хонг Конг, кои ги составил неговиот тогашен специјален помошник Амит Пател.
Маунтбатен-Виндзор ги испратил извештаите на Епстин само пет минути откако ги примил. Иако во интервју за „Њузнајт“ во 2019 година тврдеше дека на почетокот на декември 2010 година го прекинал пријателството со Епстин, електронските пораки објавени од американското Министерство за правда покажуваат поинаку.
На Бадник истата година му испратил доверлив извештај за можностите за инвестиции во авганистанската покраина Хелманд, каде што обновата ја финансирала владата на Обединетото Кралство.
Во документот со наслов „Хелманд: Комерцијални можности со висока вредност за странски инвестиции“, напишан на 19 декември 2010 година, се наведува дека главните градови на покраината, Лашкар Гах и Герешк, „имаат безбедни индустриски зони што ги проектира и развива ДФИД (Министерството за меѓународен развој)“.
Во извештајот детално се наведуваат деловни можности, вклучително и „значајни наоѓалишта на минерали со висока вредност“ и „потенцијал за евтина експлоатација“ на суровини како злато, иридиум, ураниум, ториум, мермер, нафта и гас.
Според владините правила, трговските пратеници имаат обврска за чување доверливост, која важи и по напуштањето на функцијата. Маунтбатен-Виндзор бил британски трговски пратеник од 2001 до 2011 година.
Се чини дека тој и Епстин планирале да покренат заеднички бизнис во Кина години по осудата на Епстин, и тоа додека Маунтбатен-Виндзор сè уште бил на должност. Деловните разговори, водени преку посредникот Дејвид Стерн, очигледно продолжиле повеќе од пет години по излегувањето на Епстин од затвор.
Стерн, помошник на поранешниот принц, првпат му предложил деловен потфат на Епстин на 24 јули 2010 година, додека овој бил во домашен притвор.
Доверливи податоци и за пријател банкар
Епстин не бил единствената личност на која Маунтбатен-Виндзор наводно ѝ испраќал доверливи информации. Во февруари 2010 година, тогашниот војвода од Јорк побарал од заменичката на својот приватен секретар, Аманда Тирск, да обезбеди интерен владин документ за исландската финансиска криза. Во тоа време Британија и Исланд биле во дипломатски спор поради британските депозити изгубени во банкарската криза во 2008 година.
Аманда Тирск на 8 февруари 2010 година му пишала на Мајкл Елам, главен директор за меѓународни финансии во Министерството за финансии: „Војводата од Јорк се сретна со премиерот на Исланд во Давос и би сакал да ги добие најновите информации за односите меѓу Обединетото Кралство и Исланд во врска со депозитите.“
Една недела подоцна таа примила документ од друг службеник и му го препратила на Маунтбатен-Виндзор. Два часа подоцна тој го препратил на Џонатан Роуланд, близок пријател и поранешен директор на банката „Банк Хавиланд“, која една година претходно купила имот од пропаднат исландски заемодавач.
Во пораката напишал: „Ти го испраќам ова за коментар и предлози, или решение? Се чини дека Аманда добива сигнали дека треба да дозволиме демократскиот процес да се одвива пред вашите потези. Ме интересира твоето мислење? А.“
Полицијата го потврди апсењето
Маунтбатен-Виндзор се соочува и со одделни обвиненија поврзани со можна вмешаност во синџирот на трговија со жени и девојчиња на Епстин. Неколку британски полициски служби проценуваат дали ќе ги истражат тие наводи.
Полицијата на Темз Вали објави соопштение: „Во рамки на истрагата денес (19 февруари) уапсивме маж во шеесеттите години од областа Норфолк поради сомнение за злоупотреба на положба и овластувања и спроведуваме претреси на адреси во Беркшир и Норфолк.“
Полицијата на Темз Вали е надлежна за подрачјето на Виндзор, каде што Маунтбатен-Виндзор живеел во Ројал Лоџ до почетокот на овој месец.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Семејството на Вирџинија Џуфре го поздрави апсењето на Ендрју
Братот и снаата на Вирџинија Џуфре изјавија дека „славеле“ по веста за апсењето на Ендрју Маунтбатен-Виндзор.
Џуфре, која почина минатата година, беше една од најпознатите тужителки во аферата со Џефри Епстин и го обвинуваше Маунтбатен-Виндзор за сексуален напад. Тој сега е уапсен под сомнение за злоупотреба на положба и овластувања, пренесува „Би-Би-Си“.
Аманда Робертс, сопруга на братот на Џуфре, Скај Робертс, изјави за „Би-Би-Си“ дека семејството се надева оти апсењето може да претставува пресвртница.
„Се надеваме дека оваа истрага сега ќе поттикне и отворање понатамошна истрага за обвинувањата за сексуален напад. И тоа е веќе победа“, порача таа.
Вирџинија Џуфре тврдеше дека Маунтбатен-Виндзор сексуално ја нападнал трипати додека била тинејџерка. Тој постојано ги отфрлаше тие наводи. Случајот во 2022 година беше завршен со вонсудска нагодба, која не вклучуваше признание на одговорност ниту извинување.
Свет
Како полицијата го испланира и спроведе апсењето на поранешниот принц Ендрју
Апсењето на Ендрју Маунтбатен-Виндзор го изненади светот, но зад сцената високи службеници на полицијата на Темз Вали со денови методично ја планирале операцијата. По проценка на пријавата за злоупотреба на положба и разгледување на доказите, истражител побарал налог за претрес, пишува „Телеграф“.
Истражителите требало да го убедат судијата дека е неопходно да се изврши претрес во поранешниот дом на Ендрју во Виндзор и во неговиот сегашен дом на имотот Сандрингем. По добивањето на судско одобрение, биле испланирани претресот и апсењето, при што сите детали биле чувани во тајност. Според наводите, ниту Бакингемската палата ниту кралот биле однапред известени.
Во операцијата учествувале околу 20 службеници од полицијата на Темз Вали, со поддршка од полицијата во Норфолк. Тие патувале околу 200 километри од Кидлингтон во Оксфордшир до селото Вулвертон на имотот Сандрингем. Конвој неозначени полициски возила пристигнал нешто по 8 часот наутро.
Според поранешен полициски службеник, детективите вклучени во „доверливата операција“ веројатно не ги знаеле сите детали однапред. Тимот бил повикан рано наутро, а можно е да ги предале мобилните телефони пред да ги добијат конечните инструкции.
Службеникот кој го уапсил му го прочитал стандардното предупредување: „Не сте должни ништо да кажете. Меѓутоа, може да ви наштети во одбраната ако при испитувањето не споменете нешто на што подоцна ќе се повикате на суд.“
Потоа бил однесен во Оксфордшир на службено испрашување. Во притвор бил регистриран од дежурен наредник, кој потврдил дека причините за апсењето се законити.
Како и секој друг притвореник, бил претресен и му биле одземени телефонот, накитот, часовникот, ременот и вратоврската. Веројатно била направена и проценка на ризик за евентуални здравствени проблеми.
Му биле појаснети неговите права, вклучително правото на бесплатна правна помош и право да извести некого за апсењето. Вообичаено, притворениците се фотографираат и им се земаат отпечатоци од прсти пред да бидат сместени во ќелија.
Според поранешни полицајци, ќелиите се минималистички, со тоалет одвоен со преграда и душек поставен над подот. Му било дозволено да разговара со својот адвокат пред испрашувањето.
Испрашувањата може да се одвиваат во повеќе фази. Се смета дека не му биле ставени лисици, бидејќи нема историја на насилно однесување ниту ризик од бегство.
Фото: илустрација (Depositphotos)
Свет
ЕУ сака место на преговарачката маса и повлекување на руските трупи од регионот
Европската унија бара Русија, во рамки на сеопфатен мировен договор, да ги повлече своите трупи не само од Украина, туку и од Белорусија, Грузија, Ерменија и молдавскиот регион Придњестровје. Ова се наведува во интерен документ на ЕУ што го изготвила високата претставничка за надворешна политика Каја Калас, за кој расправале амбасадорите на Унијата, пишува „Кијив пост“.
Радио Слободна Европа имала увид во документот, за кој министрите за надворешни работи би можеле повторно да разговараат на 23 февруари. Тој ги презентира ставовите на Брисел за условите на кои Москва мора да се согласи во преговорите под посредништво на САД за да се стави крај на војната во Украина.
Во документот се повикува на „забрана на руско воено присуство“ во овие земји, како и на отстранување на нуклеарното оружје од Белорусија. Брисел исто така одбива какво било „де јуре“ признавање на окупираните украински територии и бара нивна демилитаризација.
ЕУ инсистира дека траен мир не е можен без нејзино учество на преговарачката маса, и покрај тоа што формално не е вклучена во разговорите што ги водат САД. Во документот се бара и исплата на воена отштета, одбивање општа амнестија за воени злосторства и почитување на меѓународното право.
Ова се случува во време кога украинскиот претседател Володимир Зеленски се залага Украина да биде подготвена за членство во ЕУ до 2027 година, иако за тоа е потребна едногласна согласност од сите 27 земји членки.
Донесени пресуди за случајот „Премин“, обвинителството најави жалба
Денеска, во Основниот кривичен суд Скопје, беше објавена неправосилна пресуда во предметот со кодно име „Премин“, застапуван од Специјализираното одделение...
Поранешен градоначалник на Росоман исплатил личен долг од 500.000 денари од општинскиот буџет
Полицијата поднесе кривична пријава против С.Н.(29) од Росоман поради постоење основи за сомнение дека сторил кривично дело „злоупотреба на службената...
Сиљановска – Давкова: Имаме најмало и најстаро владино авионче во регионот, секогаш имам дилема дали да летам со него
Претседателката, Гордана Сиљановска – Давкова, призна дека секогаш има дилема кога треба да се вози со владиниот авион затоа што...
Семејството на Мицкоски никогаш не го користело владиниот авион, ама затоа Заев бил со семејството на одмор во Амстердам, велат од ВМРО-ДПМНЕ
Семејството на премиерот Христијан Мицкоски никогаш не го користело владиниот авион. Но, очигледно е дека работи фројдовскиот елемент кај СДС,...
Кривични против претседатели и вработени во Здружението на инвалиди на трудот – Штип, си присвоиле над 300.000 денари
Полицијата поднесе кривични пријави против поранешни претседатели и вработени во Здружението на инвалиди на трудот – Штип за сторени продолжени...
Сопствениците на кучиња да го почитуваат законот и да ги микрочипираат милениците, апелира АХВ
Агенцијата за храна и ветеринарство (АХВ) апелира до сопствениците на домашни миленици – кучиња за исполнување на законската обврска за...
Николоски: Воведовме 23 нови линии во авиосообраќајот, имаме рекордна бројка на патници, а годинава очекувам да порасне над 4 милиони патници
Од изборот на Владата до денес имаме нови 23 директни летови, охридскиот и скопскиот аеродром поминаа 3,5 милиони патници, оваа...
(Видео) Зеленски: Десетици илјади Украинци загинаа за Донбас, не се работи за земјата, туку за луѓето
Претседателот Володимир Зеленски вчера повтори дека Украина нема да отстапи територија на Русија, ниту да се повлече од областите што...
(Видео) Дете висеше од ски-лифт на Јахорина па падна, скијачите се обидоа да го фатат
Вчера, дете падна од жичницата на планината Јахорина во Босна и Херцеговина откако некое време висеше држејќи се за седиштето....
Утре прв состанок на Одборот за мир на Трамп
Американскиот претседател Доналд Трамп утре ќе претседава со првиот состанок на Одборот за мир, во сенка на нерешени прашања за...
Една третина од американската морнарица е во близина на Иран: објавено кога би можел да започне нападот
Американската војска е подготвена да го нападне Иран уште овој викенд, иако претседателот Доналд Трамп сè уште не донел конечна...
Сообраќајот на патниот правец Скопје – Велес е нормализиран во двете ленти
Сообраќајот на патниот правец А1 Скопје – Велес е нормализиран во две коловозни ленти, извести АМСМ. Интензитетот на сообраќај на...
(Видео) Една од најсмртоносните лавини во историјата на САД: oсум скијачи загинаа, еден е исчезнат
Осум скијачи загинаа, а еден е исчезнат во лавина во планините Сиера Невада во Калифорнија, соопштија властите во среда, во...
Законот за високо образование нема да биде повлечен, јавнaта расправа продолжува
Министерката за образование и наука Весна Јаневска на пленарна седница изјави дека нема да го повлече нацрт-законот за високо образование....
Гоце Наумовски стана нов уставен судија
Собранието со 63 гласа „за“, седум „против“ и без воздржани го избра професорот Гоце Наумовски за нов уставен судија, по...
Владата нема да купува нов авион: ќе се повлечеме од набавката и ќе се молиме да останеме живи, вели Мицкоски
Владата се откажа од набавка на нов авион на што се одлучи оти стариот е дотрајан и претставува голем трошок...
(Видео) За Мицкоски контролата на цените не е популизам, туку заштита на граѓаните, најави праведност и кон оние што се обидуваат да профитираат од кризите и кон оние што избегнуваат обврски
Денешната конференција за формализирање на неформалната економија не е само експертска расправа. Таа е разговор за праведност во општеството. За...
(Фото) Изгореа викендица и куќа, се запали оџак: три интервенции на струмичките пожарникари
Струмичките пожарникари денеска уште во раните утрински часови имаа три интервенции. Во 06.55 часот, во излетничката населба Суви Лаки, запалена...
„Парите за боледувања доцнат – дали Клековски манипулира дека се редовни или фондот е празен“, прашува Левица
„Изминатиот период сѐ повеќе граѓани нѐ информираат дека одреден период Фондот за здравствено осигурување не врши навремена исплата на средства...
(Фото) На повеќе локации низ Скопје паднаа дрвја, Ѓорѓиевски: Екипите се на терен, реагираме навремено
Поради засилениот ветер и неповолните временски услови, на повеќе локации низ градот беа регистрирани паднати и оштетени дрвја. Градоначалникот Орце...
