Свет
Жената која изгуби 830.000 евра во измамата со Бред Пит се соочува со нови проблеми: „Се прашувам зошто ме избраа мене“

Француската дизајнерка на ентериер, Ана (53), која плати 830.000 евра на измамник којшто користел вештачка интелигенција за да ја убеди дека разговара со Бред Пит, сега боледува од тешка депресија, а нема ниту дом и финансиски средства. Очајнички се обидува да се опорави и да си ги врати парите , откри за Дејли Мејл нејзината адвокатка.
Адвокатката Лорен Хана од Париз раскажа како нејзината клиентка била јавно етикетирана како глупава и наивна и била толку безмилосно вознемирувана на интернет што морала да ги избрише сите нејзини профили на социјалните мрежи.
Ана, која исто така помина низ развод, три пати се обидела да си го одземе животот, вели адвокатката.
Пред два месеци таа се пријавила на психијатриска клиника.
Зборувајќи оваа недела, Хана го опиша нејзиниот случај како ужасен и рече дека е зачудена од реакцијата на социјалните мрежи.
Во целата измамничка шема била вклучена и мајката на Бред Пит, Џејн Ета Пит, иако таа самата немала никаква врска со оваа измама. Лажната Џејн најпрво ја контактирала во порака на социјалната мрежа, коментирајќи дека на нејзиниот славен син му треба некој како неа, што било дел од манипулацијата за да ја добие нејзината доверба.
Измамникот комуницирал со Ана преку лажни профили на социјалните мрежи, испраќајќи ѝ лажни фотографии и пораки и во текот на 18 месеци ја убедувал да му испрати многу пари за наводно лекување. Тој тврдел дека боледува од рак на бубрегот и дека неговите финансиски средства се недостапни поради замрзнатите сметки како резултат на неговиот развод со Анџелина Џоли.
Му праќала пари на турска сметка.
Добивала песни, фотографии на кои Бред Пит бил создаден со помош на вештачка интелигенција, легнат, во болнички кревет, го гледала како ги користи апаратите, прима лекови, а сето тоа било придружено со неговите изливи на љубов.
За да докаже дека боледува од рак, тој и испратил на Ана мејл од „доктор“ во кој пишувало дека актерот умира.
Ќерката на Ана наводно и рекла на мајка си дека разговара со измамник, а не со холивудски заводник, но таа одбила да поверува.
„Ќе видите кога ќе дојде лично, па ќе се извините“, ѝ рекла на својата ќерка, пишува „Њујорк пост“.
Жената сфатила дека е измамена кога вистинскиот Бред Пит бил фотографиран со неговата сегашна партнерка Инес де Рамон во текот на летото.
Откако и станало јасно дека е жртва на измама, Ана ја споделила својата приказна во телевизиското шоу „Sept à Huit“ на францускиот канал TF1. Сепак, таа се соочи со бран на потсмев и сајбер малтретирање на социјалните мрежи, што довело до повлекување на емисијата од интернет. Ана изјавила: „Јас не сум луда или глупава“, нагласувајќи дека била жртва на софистицирана измама која користела напредни технологии за вештачка интелигенција.
Бред Пит го изрази својот бес поради оваа измама. Неговиот тим ги предупреди обожавателите да бидат внимателни на непознати пораки, истакнувајќи дека тој нема лични профили на социјалните мрежи.
„Се прашувам зошто ме избраа мене за ваква штета“, рече Ана за измамниците.
„Никогаш никому не сум строрила лошо. Тие луѓе заслужуваат пекол“, додаде таа.
Откако се емитуваше нејзината приказна, ситуацијата на Ана само се влоши бидејќи стана жртва на сајбер малтретирање.
Француската телевизија TF1 го повлече интервјуто поради омразата на интернет. Не се знае дали измамникот е фатен, а вчера „Дејли Мејл“ објави дека тим французи успеале да го лоцираат во Нигерија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) Силни ветрови, грмотевици и град: невреме ја погоди Хрватска

Силно невреме погоди неколку делови од Хрватска во четврток вечерта. Го погоди и регионот на Загреб, за кој Државниот хидрометеоролошки завод (DHMZ) издаде црвено предупредување поради исклучително опасни временски услови. Ситуацијата беше особено тешка во Бродско-посавската жупанија. Дирекцијата за цивилна заштита утрово објави дека Окружниот центар 112 во Славонски Брод добил бројни пријави од граѓани во текот на ноќта поради последиците од невремето проследено со обилни дождови и бурни ветрови.
-Во Бродско-посавската жупанија, помеѓу 00:15 и 02:45 часот, имало прекини на далноводите и прекини на трафостаниците. 2.944 корисници во некои општини останаа без електрична енергија-, се вели во соопштението. Екипите на Електра Славонски Брод веднаш излегоа на терен и работат на отстранување на дефектите, а целосно нормализирање на снабдувањето со електрична енергија се очекува во текот на утрото и попладнето.
Во пошироката област на Вуковар, граѓаните беа сведоци на многу силни ветрови, грмотевици и интензивни врнежи од дожд во текот на ноќта. „Во Вуковар имаше силен ветер, а молњите беа како луди“, опиша еден жител.
Загреб, исто така, ја почувствувал бурата, околу 3:00 часот наутро градот бил погоден од силни ветрови кои донеле обилен дожд. По краткотрајното затишје, непосредно пред 8:00 часот наутро, силен пороен дожд повторно го погоди Загреб, придружен со силни грмотевици и налети на ветер. На западот од земјата, во Истра, во некои делови беше регистриран и град.
Силната бура ја погоди и соседна Италија, каде што беа регистрирани обилни врнежи од дожд, бурен ветер и град. На социјалните мрежи кружат фотографии од големи парчиња град, кои сведочат за силата на бурата.
Свет
Постигнат договор меѓу САД и Кина? Ретки метали за Американците, помалку царини за Кинезите

САД постигнаа договор со Кина за тоа како да се забрзаат испораките на ретки земни метали во САД, изјави синоќа функционер на Белата куќа, во услови на напори за прекин на трговската војна меѓу најголемите економии во светот.
Претседателот Доналд Трамп претходно изјави дека САД потпишале договор со Кина во средата, без да даде дополнителни детали, и дека може да се постигне посебен договор за „отворање“ на Индија. За време на разговорите во Женева во мај, Кина вети дека ќе ги отстрани нетарифните контрамерки наметнати на САД на 2 април, иако не беше јасно како ќе се укинат некои од тие мерки.
Како дел од својата одмазда против новите американски царини, Кина го суспендираше извозот на широк спектар на критични минерали и магнети, нарушувајќи ги синџирите на снабдување од витално значење за производителите на автомобили, полупроводниците, воздухопловната и воената индустрија.
„Американската администрација и Кина се согласија за дополнителен договор за рамката за спроведување на Женевскиот договор“, изјави синоќа функционер на Белата куќа за Ројтерс. Договорот е за тоа „како повторно да ја забрзаме испораката на ретки земни метали во САД“, рече тој.
Друг функционер на администрацијата изјавил дека договорот меѓу САД и Кина е постигнат претходно оваа недела.
„Тие ќе ни снабдат ретки земни метали и кога ќе го сторат тоа, ние ќе ги укинеме нашите контрамерки“, изјави американскиот министер за трговија Хауард Лутник за Блумберг.
Кинеската амбасада во Вашингтон не одговори веднаш на барањето на Ројтерс за коментар.
Иако договорот покажува потенцијален напредок по месеци трговска несигурност и прекини откако Трамп ја презеде функцијата во јануари, тој исто така го нагласува долгиот пат до конечен, дефинитивен трговски договор меѓу двата економски соперници.
Регион
Запалил спирала против комарци па ја изгорел куќата во близина на Загреб

Вчера наутро во близина на Загреб избувна пожар во куќа во сопственост на 57-годишен маж, соопшти загрепската полиција.
Истрагата утврди дека пожарот најверојатно избувнал поради пад на запалена спирала од комарци што била закачена на дрвен столб, од каде што пожарот се проширил на мебелот, кој бил целосно изгорен, на ѕидот од скалите и дел од покривот, се вели во полициското соопштение.
Пожарот бил изгаснат од пожарникари, а 43-годишен член на семејството бил полесно повреден и добил медицинска помош во Клиничката болница.