Свет
Жена родила туѓо дете поради грешка на клиника за вештачко оплодување

„Монаш ИВФ“, клиника што работи низ цела Австралија, се извини откако пациентка во една од нивните клиники во Бризбејн примила погрешен ембрион, што значи дека родила дете од друга жена.
Грешката била откриена во февруари, кога родителите што го добиле детето побарале нивните преостанати ембриони да бидат префрлени во друг центар за вештачко оплодување, пренесува „Гардијан“.
„Наместо очекуваниот број ембриони, беше пронајден уште еден ембрион во складиштето на биолошките родители“, соопшти компанијата.
„Монаш ИВФ“ соопшти дека истрагата потврдила оти ембрион од друга пациентка бил по грешка одмрзнат и вграден кај парот.
Грешката се должи на човечки фактор.
Родителите биле известени во рок од една недела од откривањето на инцидентот.
Главниот извршен директор на „Монаш ИВФ“, Мајкл Кнап, се извини за настанот и истакна дека компанијата ќе продолжи да ги поддржува засегнатите пациенти.
„Сите ние во „Монаш ИВФ“ сме потресени и се извинуваме на сите вклучени“, рече тој.
„Преземавме дополнителни проверки и уверени сме дека ова е изолиран инцидент.“
Компанијата ангажирала и високиот правен советник од Викторија, Фиона Меклеод, за да спроведе независна истрага и се обврза да ги спроведе сите нејзини препораки. Инцидентот бил пријавен и до Комитетот за акредитација на репродуктивна технологија и до регулаторот за асистирана репродукција во Квинсленд.
„Монаш ИВФ“ во август постигна спогодба од 56 милиони австралиски долари со повеќе од 700 поранешни пациенти, откако наводно уништиле ембриони поради неисправен генетски скрининг.
Тужбата тврдеше дека околу 35 отсто од ембрионите што биле означени како абнормални преку погрешното тестирање, всушност биле нормални.
Групацијата „Монаш ИВФ“ потврди дека постигнала спогодба преку медијација, но не призна вина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Фото) Голем портрет од Нетанјаху и Трамп на плажа во Тел Авив: израелскиот премиер како Пинокио

Израелските демонстранти ја искористија средбата меѓу Доналд Трамп и Бенјамин Нетанјаху во Белата куќа за да испратат порака од плажа во Тел Авив, недалеку од американската амбасада. Тие нацртаа голем портрет од двајцата лидери на песок.
Цртежот ги прикажуваше Трамп и Нетанјаху лице в лице, а Нетанјаху нацртан со издолжен нос, како Пинокио.
Под него беше напишано: „Немојте повторно да се излажете“. Инсталацијата ја организираа активисти и семејства на затвореници. Ова не е прв пат вакви пораки да се појават на плажите во Тел Авив. Тие станаа еден вид симбол на отпор кон владата на Нетанјаху.
фото: принтскрин
Европа
Зеленски: Ослободивме повеќе од 174 квадратни километри од Украина

Украина повторно освои повеќе од 170 квадратни километри територија во близина на источниот град Добропил во неодамнешните контраофанзиви, изјави синоќа украинскиот претседател Володимир Зеленски.
„До денес, нашите сили ослободија повеќе од 174 квадратни километри од почетокот на операцијата, а повеќе од 194 квадратни километри се исчистени од руски саботажни групи“, рече Зеленски во видео обраќање во вечерта.
Тој рече дека руските сили изгубиле речиси 3.200 војници во операцијата. Зеленски призна дека украинските сили се соочуваат со тешки услови на неколку делови од фронтот, вклучувајќи ја и областа во близина на Купјанск во граничниот регион Харков и во областите помеѓу Донецк и Дњепропетровск.
На почетокот на август, руските сили неочекувано ја пробија фронтовската линија источно од Добропил, напредувајќи речиси 20 километри, но беа делумно потиснати откако беа испратени украински резервисти.
Сепак, украинските воени аналитичари прикажаа помалку оптимистичка слика од владата во Киев. Украина се брани од руска инвазија повеќе од три и пол години.
фото: принтскрин
Свет
Германија: Хамас мора да ја искористи оваа можност

Германскиот министер за надворешни работи Јохан Вадефул изјави дека планот презентиран од американскиот претседател Доналд Трамп за прекин на огнот во Појасот Газа претставува единствена можност за ставање крај на ужасната војна и дека не треба да се пропушти.
„Американскиот план за Газа нуди единствена можност за ставање крај на ужасната војна во Газа. Тој им дава надеж на стотици илјади луѓе во Газа кои страдаат од бруталниот конфликт и незамисливи хуманитарни тешкотии. Конечно им носи надеж на Израелците и Палестинците дека оваа војна наскоро би можела да заврши“, рече Вадефул.
„Оваа можност не смее да се пропушти. Хамас мора да ја искористи“, рече Вадефул, повикувајќи ги сите оние кои можат да влијаат врз Хамас да преземат итни мерки.
Вадефул им се заблагодари на американскиот претседател Трамп, на арапските држави во регионот и на другите муслимански земји кои ги поддржуваат мировните напори во Газа.
Вадефул рече дека Германија е подготвена да даде конкретна поддршка за планот, додавајќи дека планот може да го отвори патот за поширок процес на помирување на Блискиот Исток. Тој, исто така, изјави дека планира да го посети регионот овој викенд за таа цел.
фото: принтскрин