Свет
Затворениците во Украина ќе можат да се приклучат на армијата, парламентот го поддржа предлогот

Украинските пратеници денеска во прво читање го усвоија нацрт-законот со кој на затворениците ќе им се овозможи да се приклучат на армијата, што треба да ја олесни ротацијата на исцрпените војници на бојното поле по две години војна со Русија.
Предлог-законот предвидува затворениците кои ќе се приклучат на армијата да добијат условно ослободување.
Оние кои се осудени за злосторства против човештвото, сексуално насилство, убиства или злосторства против националната безбедност нема да смеат да служат војска, објави претставникот Олексеј Хончаренко на Телеграм. Собранието во прво читање го усвои и предлог-законот со кој се предвидуваат големи казни за граѓаните кои не ги почитуваат правилата за мобилизација.
Не е познато колку луѓе ќе бидат подобни за војска на овој начин кога законот ќе стапи на сила. Украинскиот парламент почна да го разгледува конечното читање на сложениот предлог-закон кој ќе го промени процесот на мобилизација по неколкумесечни критики и дебата, а гласањето се очекува во четврток.
Украинскиот претседател Володимир Зеленски минатата недела потпиша нацрт-закон со кој се предвидува намалување на возраста за воена мобилизација од 27 на 25 години. Украинската армија претрпе загуби чии пропорции се чуваат во тајност, а денес, за разлика од почетокот на конфликтот, се бори да најде доброволци за фронтот.
Сегашниот систем на регрутирање многу Украинци го сметаат за нефер, неефикасен и често корумпиран, а има и барања за демобилизација на оние кои долго време се на фронтот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Белата куќа: Се водат чувствителни разговори за предлогот на Трамп за прекин на војната во Газа

Белата куќа денес објави дека се водат „чувствителни дискусии“ за предлогот на американскиот претседател Доналд Трамп за прекин на војната во Појасот Газа.
„Можам да ви кажам дека се водат некои многу чувствителни разговори, но секако не сакам да ги превенирам најавите од оваа говорница. Ќе им препуштам на специјалниот пратеник (Стивен) Виткоф и на претседателот на Соединетите Американски Држави да се справат со тоа“, изјави портпаролката на Белата куќа, Каролин Ливит, на редовниот брифинг за медиумите, објави Ројтерс.
Висок функционер на Хамас изјави за Би-Би-Си дека палестинската група веројатно ќе го отфрли мировниот план на американскиот претседател, тврдејќи дека тој „им служи на интересите на Израел“ и „ги игнорира интересите на палестинскиот народ“.
Фото: принтскрин
Свет
Трамп го потпиша указот за американски безбедносни гаранции за Катар

Претседателот на САД, Доналд Трамп, потпиша извршна наредба со која САД се обврзуваат да ја гарантираат безбедноста на Катар, што претставува значајна нова обврска кон клучен арапски сојузник кој не е член на НАТО, пишува CNN.
„САД ќе го сметаат секој вооружен напад врз територијата, суверенитетот или критичната инфраструктура на Државата Катар за закана за мирот и безбедноста на САД“, се вели во наредбата потпишана во понеделник.
Оваа одлука доаѓа во време кога израелскиот премиер Бенјамин Нетанјаху, за време на посетата на Белата куќа, му се извини по телефон на катарскиот премиер за израелскиот напад врз Доха минатиот месец. Потоа, Трамп, во заеднички настап со Нетанјаху, го претстави својот план од 20 точки за мир во Газа.
„Во случај на таков напад, САД ќе ги преземат сите законски и соодветни мерки – вклучувајќи дипломатски, економски и, доколку е потребно, воени – за да ги одбранат интересите на САД и Државата Катар и да го вратат мирот и стабилноста“, се вели во документот, според медиумот.
Фото: принтскрин
Свет
Макрон: Ја потценивме Русија

Францускиот претседател Емануел Макрон изјави дека не исклучува никакви опции доколку руските борбени авиони влезат во европскиот воздушен простор.
„Во согласност со доктрината за стратешка двосмисленост, можам да ви кажам дека ништо не е исклучено“, рече Макрон во интервју за весникот „Франкфуртер алгемајне цајтунг“, одговарајќи на прашање дали би поддржал соборување на руски борбен авион доколку влезе во европскиот воздушен простор без дозвола.
Макрон истакна дека ја потцениле Русија. Тој тврдеше дека Русија е најголемата структурна закана за Европејците, наведувајќи мешање во изборните кампањи, кибернапади, атентати на противници и ширење лажни информации.
„Постои француски нуклеарен чадор“
„Наивни сме ако не препознаеме дека тајната армија на Русија се шири во нашите демократии. Таа се состои од оние мали анонимни воини што ги нарекуваме дигитални ботови. Тие ја манипулираат демократијата во Франција, Германија и низ цела Европа“, предупреди тој.
Кога беше прашан за предлогот на Европската комисија да се користат замрзнати руски средства како колатерал за исплати на воени репарации на Украина, Макрон повтори дека средствата не можат едноставно да се конфискуваат, бидејќи тоа би го прекршило меѓународното право.
Макрон, исто така, потврди дека ќе одржи говор на почетокот на следната година за француската нуклеарна доктрина, која моментално се ажурира.
„Францускиот нуклеарен чадор постои. Моментално работам на ажурирање на нашата доктрина и сакам да продолжам со продлабочување на нашиот стратешки дијалог со Европејците кои сакаат да учествуваат“, рече тој.
Фото: принтскрин