Свет
Затегнатите односи на САД со Иран и Кина главни прашања на самитот Г20

Светските лидери се собраа во јапонскиот град Осака на дводневниот самит на Г20 во време на зголемување на бројот на спорови и кризи на глобално ниво, во кои се вклучени и најголемите светски економии.
Според Си-ен-ен, се очекува дека лидерите зад затворени врати ќе зборуваат за опасноста од воен судир меѓу Вашингтон и Техеран и трговската војна меѓу САД и Кина.
На маргините на состанокот средба веќе одржаа американскиот и рускиот претседател, Доналд Трамп и Владимир Путин, а се очекува големо внимание да привлече и средбата меѓу Трамп и кинескиот претседател Шји Џјинпинг најавена за сабота.
Трамп изјави дека очекува продуктивна средба со Шји со кого ќе се сретне првпат по седум месеци во време на тензии во трговските односи меѓу двете земји.
„Којзнае, но мислам дека ќе биде продуктивна“, рече Трамп за средбата.
Сепак, запрашан дали му ветил на кинсекиот колега шестмесечно одлагање на таксите, Трамп изјави дека не го направил тоа.
„Ројтерс“ претходно анализира дека изгледите за напредок не се добри со оглед на фактот дека ниту една страна не попушта откако трговските преговори меѓу двете земји пропаднаа во мај.
Домаќинот на состанокот на светските лидери, јапонскиот премиер Шинзо Абе, сака фокусот на самитот да биде поставен на реформите на Светската трговска организација, подобрувањето на положбата на работниците и намалувањето на пластичниот отпад во океаните.
Тој исто така сака да разговара за глобалните правила за управување со податоци, кои ќе овозможат заштита на личната и интелектуалната сопственост, со слободен проток на медицински, индустриски и нелични податоци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Шахта во Њујорк експлодира неколку секунди откако по неа помина жена со деца

Безбедносна камера во американскиот град Паукипси, Њујорк, снимила драматичен момент кога капак на шахта експлодирал неколку секунди откако покрај неа поминала жена со количка и две деца, објави Би-Би-Си.
На видеото се гледа како жена турка количка и држи дете за рака додека оди по улица. Во моментот кога се оддалечени само неколку чекори има силна експлозија и од земјата избива оган и чад.
Според соопштението на противпожарната служба во инцидентот нема повредени, но во неколку згради во блокот била откриена висока концентрација на јаглерод моноксид.
„Жителите од околните згради се евакуирани додека нивото на гас не се сведе на безбедно ниво“, соопштија пожарникарите.
Причината за експлозијата се уште не е официјално потврдена, но се сомнева дека има технички дефект во електричната или гасната инфраструктура под коловозот.
Свет
Објавен мистериозниот портрет на Трамп кој Путин му го подари на американскиот претседател

Американската телевизиска мрежа Си-Ен-Ен го објави портретот што рускиот претседател Владимир Путин му го испрати на подарок на американскиот претседател Доналд Трамп во март.
На него е претставен американскиот претседател по обидот за атентат, а автор на портретот е рускиот уметник Никас Сафронов.
Сликата го покажува Трамп со крената тупаница и траги од крв на лицето – потсетување на моментот на атентатот за време на настап во кампањата во Пенсилванија на 13 јули 2024 година.
Зад него се вее американско знаме, а во позадина се видливи Статуата на слободата и Менхетен во Њујорк.
Свет
Зеленски: Спремни сме на директни разговори со Русија

Украинскиот претседател, Володимир Зеленски, изјави дека Украина е подготвена за директни разговори со Русија по прекинот на огнот
„Подготвени сме да седнеме во кој било формат“, изјави украинскиот претседател за новинарите на брифинг.
Да потсетиме дека вчера и рускиот претседател Владимир Путин изјави дека е подготвен за директни преговори со Киев.
Во изјавата за новинарите, Путин рече дека би било можно директно да се разговара со Киев за прекин на нападите врз цивилната инфраструктура.
„Имаме позитивен став кон прекинот на огнот“, рече Путин, мислејќи на одлуката на Русија да спроведе изненадувачки 30-часовен Велигденски прекин на огнот.