Јужн Кореја е подготвена да ги прифати севернокорејските војници заробени од украинската армија, доколку покажат желба да дојдат во земјата, објави „Јонхап“, повикувајќи се на соопштение на Министерството за надворешни работи на Република Кореја.

Корејското МНР, како што јави Јонхап, нагласува дека севернокорејските војници според уставот се државјани на Јужна Кореја. Тие додадоа дека почитувањето на нивната слободна волја во однос на репатријацијата е во согласност со меѓународното право и обичајните практики.

„Според тоа, владата ќе им ја обезбеди потребната заштита и поддршка доколку побараат да дојдат во Јужна Кореја, во согласност со основните принципи и релевантните закони за прием на сите поединци“, се вели во соопштението на Министерството за надворешни работи.

Министерството, исто така, истакна дека Јужна Кореја и ја пренела оваа позиција на Украина и дека ќе продолжи со консултациите со Киев. Тие нагласија дека луѓето не можат насилно да бидат вратени на места каде што би можеле да бидат прогонувани.

Според Јонхап, во интервју за дневниот весник Chosun Ilbo објавено денеска, еден од двајцата севернокорејски војници заробени од Украина во Курск изразил желба да оди во Јужна Кореја. Тоа ќе биде прв таков случај откако Северна Кореја испрати околу 11.000 војници за поддршка на Русија против Украина, додаваат тие.

Хамас е подготвен да ги ослободи сите преостанати заложници во Газа во размена како дел од следната фаза од договорот за прекин на огнот.

Израел и Хамас моментално се во процес на спроведување на првата фаза од кревкиот прекин на огнот во Газа, кој се одржува откако стапи на сила на 19-ти јануари и покрај меѓусебните обвинувања за негово прекршување.

Шефот на израелската дипломатија вчера изјави дека преговорите за втората фаза, која се очекува да подготви траен крај на војната, ќе започнат „оваа недела“.

„Ги информиравме посредниците дека Хамас е подготвен да ги ослободи сите заложници одеднаш во текот на втората фаза од договорот, наместо  постепено, како што е случајот во сегашната, прва фаза“, изјави за АФП високиот функционер на Хамас, Тахер ал-Нуну.

Тој не појасни колку заложници држат Хамас или другите милитантни групи.

Нуну рече: „Сакаме да ја потврдиме нашата сериозност и целосна подготвеност да продолжиме напред во решавањето на ова прашање, како и да продолжиме со чекорите кон консолидирање на прекинот на огнот и постигнување одржлив мир“.

Според првата фаза од договорот, милитантите досега ослободија 19 израелски заложници во замена за повеќе од 1.100 палестински затвореници ослободени од израелските затвори во серија размени со посредство на Црвениот крст.

Понудата од средата дојде откако Израел и Хамас објавија дека последните шест заложници ќе бидат ослободени овој викенд како дел од првата фаза од договорот.

По завршувањето на првата фаза, во Газа и понатаму ќе има 58 заложници.

Хамас, исто така, вчера се согласи да ги врати телата на осум заложници во две серии оваа недела и следната недела, вклучувајќи ги останките на Шира Бибас и нејзините два сина, Кфир и Ариел, кои станаа национални симболи на израелските заложници.

Таткото на момчето, Јарден Бибас, беше одвоено киднапиран на 7 октомври 2023 година и беше ослободен за време на претходната размена на затвореници.

Иако Хамас објави дека Шири Бибас и нејзините синови биле убиени во израелски воздушен напад на почетокот на војната, Израел никогаш не го потврдил тоа, а многумина сè уште не веруваат дека тие се навистина мртви, вклучително и членовите на семејството Бибас.

„Барам никој уште да не зборува за моето семејство (како да е веќе мртво). Ја одржуваме надежта 16 месеци и нема да се откажеме сега“, напиша тетката на момчето, Офри Бибас на Фејсбук доцна во вторникот, по објавата на Хамас.

Израелските власти потврдија дека останките на четворицата заложници ќе бидат вратени во четврток, иако не ги наведоа имињата.

Националниот институт за судска медицина во Тел Авив ангажирал 10 лекари за да го забрзаат процесот на идентификација, објави во средата јавниот радиодифузен сервис Кан.

Хамас и неговите сојузници киднапираа 251 лице за време на нивниот напад врз Израел на 7 октомври 2023 година, а 70 од нив остануваат во Газа, вклучително и 34 за кои израелската војска тврди дека се мртви.

Во нападот во октомври загинаа 1.211 луѓе, главно цивили, според израелските податоци.

Во израелски напади најмалку 48.297 луѓе се убиени во Газа, од кои повеќето цивили, според бројките на Министерството за здравство на територијата на Хамас, кои Обединетите нации ги сметаат за сигурни.

Украинскиот министер за надворешни работи Андриј Сибиха изјави дека никој не може да ја натера неговата земја да се откаже од своите права, откако Доналд Трамп ја критикуваше Украина и нејзиниот претседател.

Ќе го браниме нашето право да постоиме“, напиша Сибиха на платформата „Икс“.

Пораката дојде веднаш откако Трамп жестоко го нападна Володимир Зеленски во објава на „Трут соушал“, нарекувајќи го „диктатор“.